E hamani maitai e e tufa anaˈe na vetahi ê
1 ‘E rahi ta Doreka ohipa maitai i rave, e te horoa i te taoˈa.’ (Ohi. 9:36, 39) Ua herehia o ˈna no to ˈna huru aau horoa e te taata i matau ia ˈna e e te Atua ra o Iehova atoa. Te na ô ra te Hebera 13:16 e: “Te hamani maitai, e te horoa [aore ra te tufa], eiaha roa ïa e haamairihia: te mauruuru roa ra hoi te Atua i te reira tusia.” E nafea tatou e nehenehe ai e hamani maitai e e tufa na vetahi ê i teie mahana?
2 Hoê ravea e nehenehe ai tatou e hamani maitai ia vetahi ê e mea na roto ïa i te tufaraa i ta tatou “mau taoˈa rarahi.” (Mas. 3:9) Na roto i te mau ô ta tatou e horoa ra no te turu i te ohipa na te ao nei e nehenehe ai e patu i te mau Piha a te Basileia, te mau Piha tairururaa, e te mau amaa i roto i te ao atoa nei. Maoti to tatou aau horoa, te fanaˈo ra e mau mirioni taata i te hoê haapiiraa teotaratia e te hoê amuimuiraa o te faaitoito i te pae varua.
3 E tufa anaˈe i te tamahanahanaraa: Ia tupu te hoê ati, ua ineine to Iehova nunaa i te “hamani maitai” i to ratou mau hoa faaroo e te feia atoa e faaroo ê to ratou. (Gal. 6:10) I muri aˈe i te hoê paainaraa i roto i te hoê pu hamaniraa taoˈa i Farani, ua parau te tahi nau taata faaipoipo e faaea ra i pihai iho i taua pu ra e: “Ua tae oioi mai to matou mau taeae Kerisetiano no te tauturu ia tamâ i to mâua piha e to vetahi ê atoa o te fare tahua. Ua maere roa to mâua feia tapiri i te iteraa i tera rahiraa taata i haere mai no te tauturu.” Ua na ô te tahi atu tuahine e: “Ua haere mai te mau matahiapo e aupuru ia matou. Ua faaitoito mai. O te reira hoi ta matou i hinaaro, hau atu â i te tauturu materia.”
4 Mea rahi te ravea e nehenehe ai tatou e hamani maitai i to tatou taata-tupu, te ravea faufaa roa ˈˈe râ e tauturu ai tatou ia ratou, o te tufaraa ïa i te ite faufaa roa o te parau mau, oia atoa “te tiaturi i te ora mure ore” ta Iehova iho i fafau. (Tito 1:1, 2) E horoa te poroi o te Bibilia i te tamahanahanaraa mau i te feia e oto ra no te mau huru tupuraa o te ao e no to ratou iho huru hara. (Mat. 5:4) Ia hamani maitai e ia tufa tatou na vetahi ê i te mau taime atoa e tei to tatou rima taua maitai ra ia hopoi atu.—Mas. 3:27.