Tuhaa 10: E faatere anaˈe i te mau haapiiraa bibilia o te paturu i te mau haereraa i mua
E faaineine anaˈe i te piahi i roto i te taviniraa i tera fare i tera fare
1 Ia faaoti te mau matahiapo e te faaî ra te hoê piahi Bibilia i te mau titauraa no te riro ei taata poro bapetizo-ore-hia, e nehenehe o ˈna e haamata i te apiti i te taviniraa i mua i te taata e te amuiraa. (A hiˈo Organisés pour faire la volonté de Jéhovah, api 79-81.) E nafea ia tauturu i te piahi ia faaruru i te fifi o te pororaa?
2 A faaineine amui: Mea faufaa roa ia faaineine maitai. A faaite i te piahi e nafea e itea ˈi ia ˈna te mau faaiteraa i roto i Ta tatou taviniraa i te Basileia e te buka Haaferuriraa, e a tauturu ia ˈna ia maiti i te hoê omuaraa parau ohie, e tano i te tuhaa fenua a ta outou amuiraa. A faaitoito ia ˈna i te omuaraa iho â ia haafaufaa i te Bibilia i roto i te taviniraa.—Tim. 2, 4:2.
3 Mea maitai roa te mau taime faaineineraa no te taata poro apî. A faaineine ai te piahi i ta ˈna faaiteraa, a haapii ia ˈna ia pahono ma te faatano i te parau i te mau patoiraa matauhia i roto i te tuhaa fenua. (Kol. 4:6) A tamǎrû ia ˈna: aita e titauhia ra ia ite te tavini Kerisetiano i te pahonoraa o te mau uiraa atoa. Aita anaˈe tatou i ite i te pahonoraa o te hoê uiraa, e pinepine mea maitai aˈe e parau e e rave tatou i te mau maimiraa e e hoˈi atu tatou e paraparau â.—Mas. 15:28.
4 A poro amui: I te taime matamua e poro ai te piahi i tera fare i tera fare, a vaiiho ia ˈna ia hiˈo e nafea outou e faaohipa ˈi i te faaiteraa ta outou i faaineine e o ˈna. I muri iho, a faaô mai ia ˈna. I roto i te tahi mau tupuraa, mea maitai aˈe ia vaiiho i te piahi ia rave i te hoê tuhaa o te faaiteraa, mai te taioraa e te tatararaa i te hoê irava bibilia ei hiˈoraa. A haapao atoa i to ˈna huru e to ˈna aravihi. (Phil. 4:5) Eiaha e pipiri i te haapopou a faaineine noa ˈi outou ia ˈna i roto i te mau tuhaa rau o te taviniraa.
5 Mea faufaa ia tauturu i te hoê taata poro apî ia haamau i te hoê porotarama no te apiti tamau i te taviniraa, i te mau hebedoma atoa ia nehenehe. (Phil. 3:16) A faanaho maite ia outou no te poro e o ˈna e a faaitoito ia ˈna ia poro atoa e te tahi atu feia poro itoito rahi. E tauturu to ratou hiˈoraa e ta ratou amuimuiraa ia ˈna ia riro ei mea aravihi e ia ite i te oaoa i roto i te taviniraa i tera fare i tera fare.