E tauturu te pororaa ia tatou ia tamau maite
1 Te aˈo ra te Parau a te Atua ia tatou ia ‘horo tamau maite i te hororaa i mua ia tatou nei.’ (Heb. 12:1) Mai te hoê taata horo o te hinaaro i te tamau maite no te upootia i roto i te hoê tataˈuraa, e hinaaro atoa tatou i te tamau maite ia noaa mai te utua maitai o te ora mure ore. (Heb. 10:36) E nafea te taviniraa Kerisetiano e nehenehe ai e tauturu ia tatou ia mau papu noa e tae noa ˈtu i te hopea?—Mat. 24:13.
2 Faaitoitohia i te pae varua: E tauturu te faaite-haere-raa i te parau fafau bibilia faahiahia o te hoê ao apî parau-tia, i te faaoraora i to tatou tiaturiraa. (Tes. 1, 5:8, MN) Ma te haere tamau i roto i te taviniraa, e nehenehe tatou e faaite i te pue parau mau ta tatou i haapii i roto i te Bibilia, e e paruru atoa râ i to tatou faaroo, o te faaitoito hoi ia tatou i te pae varua.
3 No te haapii maitai i te pue parau mau bibilia ia vetahi ê, e titauhia ia taa maitai tatou iho i te reira. E mea tia ia rave tatou i te mau maimiraa e ia feruriruri i ta tatou e taio ra. Maoti te mau tutavaraa papu ta tatou e rave i roto i taua tuhaa ra e rahi ai to tatou ite, e puai ai to tatou faaroo e e itoito ai tatou i te pae varua. (Mas. 2:3-5) No reira, a tutava ˈi tatou i te tauturu ia vetahi ê, te haapuai ra tatou ia tatou iho.—Tim. 1, 4:15, 16.
4 E tuhaa faufaa roa te apitiraa itoito rahi i te taviniraa o “te haana tamaˈi atoa a te Atua,” ta tatou e hinaaro no te patoi i te Diabolo e te mau demoni. (Eph. 6:10-13, 15) Ia haa tatou i roto i te taviniraa moˈa, e mea ohie aˈe ia haamau i to tatou feruriraa i nia i te mau manaˈo faaitoito e ia ore e hema i te ao a Satani. (Kol. 3:2) E haamanaˈo noa mai te haapiiraa i te mau faaueraa tumu a Iehova ia vetahi ê i te faufaaraa ia moˈa to tatou haerea.—Pet. 1, 2:12.
5 Haapuaihia e te Atua: I te pae hopea, e haapii mai te apitiraa i te ohipa pororaa evanelia ia turui i nia ia Iehova. (Kor. 2, 4:1, 7) Mea maitai roa ïa. Ma te tiaturi atu â i te Atua, e nehenehe tatou eiaha noa e rave i ta tatou taviniraa, e faaruru atoa râ i te mau huru fifi atoa. (Phil. 4:11-13) Oia mau, mea faufaa roa ia haapii i te tiaturi roa ia Iehova no te tamau maite. (Sal. 55:22) No reira, na roto e rave rahi ravea, e tauturu te pororaa ia tatou ia tamau maite.