Tuhaa 11: E faatere anaˈe i te mau haapiiraa bibilia o te paturu i te mau haereraa i mua
A tauturu i te piahi ia rave i te mau farerei-faahou-raa
1 Ia haamata te hoê piahi i te poro, e farerei o ˈna i te mau taata e anaanatae ra i te parau apî maitai. E nafea tatou e nehenehe ai e tauturu i te taata poro apî ia rave ma te aravihi i te mau farerei-faahou-raa e ia atuatu i te anaanatae i faatupuhia?
2 E haamata te faaineineraa o te farerei-faahou-raa i te aparauraa matamua. A faaitoito i te piahi ia anaanatae ma te haavare ore i te feia e faaroo ra ia ˈna. (Phil. 2:4) A faaineine riirii ia ˈna ia nehenehe o ˈna e turai ia ratou ia parau i to ratou manaˈo, ia faaroo o ˈna i ta ratou mau parau e ia haroaroa o ˈna i te mea e haapeapea ra ia ratou. Ia faaite te hoê taata i te anaanatae, a ara e ia papai te taata poro i te mau mea tano maitai no nia i te aparauraa matamua. A faaohipa i tera mau tapaopaoraa no te tauturu ia ˈna ia faaineine i te mau aparauraa i mua.
3 A faaineine i te hoˈi faahou: A hiˈopoa i te tereraa o te aparauraa matamua, e a haapii i te piahi ia maiti i te hoê tuhaa o te poroi o te Basileia ta te taata e faaroo ra ia ˈna e au. (Kor. 1, 9:19-23) A faaineine amui i te hoê faaiteraa poto e nehenehe ai e taio i te hoê irava bibilia e te hoê paratarafa o te hoê papai e haapiihia. Hau atu â, a faaineine i te hoê uiraa o te nehenehe e tuuhia ˈtu i te hopea o te tauaparauraa no te haamau i te niu o te farereiraa i mua. A faaite i te piahi e nafea ia haapii rii atu â i te taata no nia i te Parau a te Atua i te mau farereiraa atoa.
4 E mea faufaa atoa ia horoa i te hoê omuaraa parau ohie i te piahi. I muri aˈe i te aroharaa ˈtu i te fatu fare, e nehenehe oia e parau e: “Ua oaoa vau i ta tâua aparauraa na mua ˈtu, e ua hoˈi mai au no te faaite ia oe i te tahi atu mau manaˈo bibilia no nia i te [a faahiti i te tumu parau].” E nehenehe atoa outou e faataa i te taata poro apî i ta ˈna e nehenehe e parau mai te peu e e taata ê te haere mai i te uputa.
5 A atuatu oioi i te anaanatae: A faaitoito i te piahi ia haamatau i te hoˈi oioi faahou e hiˈo i te feia atoa e faatupu ra i te anaanatae. I te tahi taime, e mea tia ia tamau maite tatou no te farerei i te mau taata. A haapii i te piahi i te haamau i te mau hoˈi-faahou-raa e farerei, e a tauturu ia ˈna ia taa i te faufaaraa e hoˈi faahou mai tei faaauhia. (Mat. 5:37) A haamatau ia ˈna i te faaite i te hamani maitai, te haapao maitai e te faatura a imi ai o ˈna i te mau taata e au i te mamoe e a atuatu ai o ˈna i to ratou anaanatae.—Tito 3:2.