Porotarama utuafare—Te haapiiraa utuafare
1 Te ô rahi roa ˈˈe ta outou ei metua Kerisetiano e nehenehe e tufa i ta outou mau tamarii o to outou ïa here no Iehova. Te hoê taime tano roa no te reira, ‘ia parahi noa ïa oe i roto i te fare’ no te haapiiraa bibilia utuafare tahebedoma. (Deut. 6:5-7) Noa ˈtu e te turu ra to outou hoa faaipoipo i ta outou mau tiaturiraa aore ra aita, aore ra te aupuru ra outou i ta outou mau tamarii ei metua otahi, e nehenehe outou e tauturu ia ratou ia haafatata mai ia outou e ia Iehova maori ra te hoê haapiiraa utuafare tamau.
2 A haamata maitai: Te taahiraa matamua, o te haamataroraa ïa i te haapii ei utuafare. Ia ore outou e papu afea e faatupu ai te haapiiraa, no te aha e ore ai e paraparau i te reira ei utuafare? (Mas. 15:22) Mai te peu e e mau tamarii apî ta outou, e hinaaro paha outou e faatupu e rave rahi taime haapiiraa poto i roto i te hebedoma. A faaoti eaha te mea maitai roa ˈˈe no to outou utuafare. A haamau i te hoê hora taa maitai no te haapiiraa i nia i ta outou porotarama utuafare e a faaoti e pee maite i te reira.
3 Eaha ta outou e nehenehe e haapii? E faaineine vetahi i te haapiiraa e hiˈopoahia i te Haapiiraa buka a te amuiraa aore ra i te Haapiiraa o Te Pare Tiairaa. E oaoa vetahi i te hiˈopoa i te mau papai faaineine-taa-ê-hia no te feia apî. Te parau ra te metua tane o te hoê tamaiti e tamahine apî e: “Te hoê mea o te faariro i ta matou haapiiraa ei taime faufaa no te mau tamarii i roto i te hebedoma, ia hauti ïa matou i te mau aamu i roto i Ta ˈu Buka Aamu Bibilia. Mea faufaa aˈe te hohonu o te putapûraa e o te maramaramaraa e noaa mai i te rahiraa paratarafa ta matou e hiˈopoa ra.”
4 A haapii i te mau hebedoma atoa: E mea tia ia tupu tamau te haapiiraa utuafare e ia tiaihia ma te ru e te taatoaraa o te utuafare. E nehenehe te tahi mau faaauraa mai te mahana e te hora e ravehia no te faatano atu i te mau tupuraa manaˈo-ore-hia. I te tahi atu mau taime e titau-atoa-hia paha ia faatano i te haapiiraa i nia i te mau hinaaro. Eiaha râ te hoê noa ˈˈe tauiraa ia faataupupu maoro i te porotarama haapiiraa utuafare. Te parau ra te tamahine e: “Mai te peu e e tauihia te hora o ta matou haapiiraa, e tuu noa na o Papa i te hora apî i nia i te opani faatoetoeraa ia ite hoi matou pauroa i te reira.” Auê ïa mau tutavaraa faahiahia no te tapea i te hoê haapiiraa utuafare tamau! A tamau ai outou i te haapii i ta outou mau tamarii “ia paari ma te aˈo a te Fatu ra [o Iehova],” te faaite ra ïa outou i to outou here ia ratou e i to tatou Metua i te raˈi ra.—Eph. 6:4.