Porotarama utuafare—Te irava mahana
1 I te mau mahana atoa e tutava rahi te mau metua î i te here i te horoa i te maa maitai na ta ratou mau tamarii. E mea faufaa ˈtu â te faaamuraa ia ratou i te maa varua no roto mai i te Parau a te Atua. (Mat. 4:4) Hoê ravea no te tauturu i ta outou mau tamarii ia hiaai maite i te maa varua e ia ‘paari no te ora,’ o te raveraa ïa i te taime i te mau mahana atoa no te hiˈopoa i te irava mahana e te tatararaa ei utuafare. (Pet. 1, 2:2) I teihea taime outou e faaô ai i te reira i roto i ta outou porotarama utuafare?
2 I te taime tamaaraa: E nehenehe te haamataraa i te mahana ma te hiˈopoa i te irava e tauturu i to outou utuafare ia haamanaˈo ia Iehova i te roaraa o te mahana. (Sal. 16:8) Aita aˈenei i moehia i te hoê metua vahine i te taio e i te aparau i te irava e te tatararaa e ta ˈna tamaiti a tamaa ai raua e i te pure e ta ˈna tamaiti hou oia a haere ai i te fare haapiiraa. Ua tauturu te reira i ta ˈna tamaiti ia rave i te hoê tiaraa fati ore i mua i te fifi o te here aiˈa, ia patoi i te mau faahemaraa morare ore e ia faaite ma te itoito i to ˈna faaroo i mua i to ˈna mau hoa e te mau orometua haapii. Noa ˈtu o oia anaˈe te Ite i roto i te fare haapiiraa, aita oia i moemoe noa ˈˈe.
3 Mai te peu e eita te hiˈopoaraa i te irava e nehenehe e tupu i te poipoi, e hiˈo paha ïa outou i te reira ei utuafare i te tahi atu taime, i te taime tamaaraa paha i te pae ahiahi. E faaohipa atoa vetahi i taua taime ra no te faahiti i te mau tupuraa i roto i te pororaa aore ra i te mau manaˈo faufaa no roto mai i ta ratou taioraa bibilia. E haamanaˈo e rave rahi i tera mau taime i nia i te amuraa maa mai te mau taime oaoa roa ˈˈe e te taatoaraa o te utuafare.
4 I te po: No vetahi mau utuafare, o te taime na mua noa ˈˈe i te taotoraa te taime maitai aˈe no te hiˈopoa i te irava mahana. E riro atoa ei taime maitai no te pure amui. Ia faaroo ta outou mau tamarii i te mau mahana atoa ia outou ia paraparau no nia ia Iehova e ia pure ia ˈna, e riro mai ïa o ˈna ei taata mau no ratou.
5 Ia haamaitai Iehova i ta outou mau tutavaraa no te faaô i te parau mau i roto i ta outou mau tamarii a faaohipa maitai ai outou i te buka iti E hiˈopoa anaˈe i te mau Papai i te mau mahana atoa!