Nafea ia tahoê maite e te utuafare—i roto i te haapiiraa Bibilia
1 E horoa te parau mau i te hoê auraa e te hoê tapao mau i te oraraa utuafare, eita râ te mau faahopearaa maitatai e tupu haere noa mai noa ˈtu e te tavini noa ra tatou ia Iehova. E titauhia te taime e te tahi mau tutavaraa no te patu i te hoê utuafare puai i te pae varua. E mea faufaa ia tahoê maite te mau melo o te utuafare ia noaa taua fa ra. Teie te matamua o na tumu parau e toru o te tuatapapa i te ravea e nehenehe ai te mau utuafare e tahoê no te faatupuraa i te mau peu maitatai i te pae o te haapiiraa.
2 Na roto i te taioraa i te Bibilia i te mau mahana atoa: Te na ô ra te Maseli 24:5 e “te taata ite ra e haere ïa to ˈna puai i te rahiraa.” E horoa te ite e noaa na roto i te i te taioraa tamau i te Parau a te Atua i te puai hohonu e hinaarohia no te paruru i to ˈna maitai i te pae varua i te mau aroraa a Satani. (Sal. 1:1, 2) Te taio ra anei tatou i te Bibilia i te mau mahana atoa e te utuafare? Te horoa mai nei te porotarama no te Haapiiraa o te Taviniraa Teotaratia i te hoê “Poratarama hau no te taioraa Bibilia” tahebedoma i roto i te matahiti. No te pee i te reira, e titauhia ahuru minuti i te mahana taitahi e te utuafare. E maiti anaˈe i te hoê taime tano, ei hiˈoraa, i te taime tamaaraa i te poipoi, i muri aˈe i tamaraa i te ahiahi aore ra hou e taoto ai, no te taio i te Bibilia e no te tuatapapa i te irava mahana i roto i te buka iti ra E hiˈopoa anaˈe i te mau Papai i te mau mahana atoa. E tuu anaˈe i taua ohipa ra i roto i ta tatou porotarama utuafare no te mau mahana atoa.
3 Na roto i te haapii-amui-raa i te mau hebedoma atoa: Ia riro te haapiiraa utuafare ei taime faufaa roa ˈˈe o te hebedoma. E tia i te mau melo atoa o te utuafare ia turu i te reira na roto i te apitiraa ˈtu ma te ore e haamarirau. E hinaaro te upoo o te utuafare e hiˈo i te tahi mau hinaaro o to ˈna utuafare ia maiti oia i te mau tumu parau e haapiihia, te mahana, te hora e te maororaa o te haapiiraa. E horoa anaˈe i te parahiraa matamua i te haapiiraa utuafare i roto i ta tatou porotarama tahebedoma atoa. Eiaha e vaiiho i te tahi mau ohipa faufaa rii aˈe ia haafifi i te reira.—Phil. 1:10, 11.
4 Ua tâpû te hoê metua tane o tei taniuniu-pinepine-hia i ǒ na no te mau ohipa tapihoo i ta ˈna niuniu paraparau i te taime haapiiraa. Mai te peu e e haere mai te tahi feia faaau ohipa i ǒ na, e titau manihini oia ia ratou ia apiti mai i te haapiiraa aore ra ia tiai e tae roa ˈtu i te taime faaotiraa. Ua faaoti oia e eiaha roa ˈtu hoê noa ˈˈe mea e haafifi i te haapiiraa utuafare. Ua haaputapû roa te reira i ta ˈna mau tamarii e aita te reira i faataupupu e ia tere maitai ta ˈna ohipa tapihoo.
5 Auê te au ia tahoê te mau melo o te utuafare i roto i te mau ohipa i te pae varua! E haamaitaihia mai ta tatou mau tutavaraa no te apiti maite i te haapiiraa utuafare e Iehova.—Sal. 1:3.