Porotarama utuafare—Te pororaa ei utuafare
1 Te oaoa ra Iehova ia hiˈo i te feia apî i te haamaitairaa i to ˈna iˈoa. (Sal. 148:12, 13) I te tau o Iesu ua haamaitai atoa “te tamarii rii e te aiû rii” i te Atua. (Mat. 21:15, 16) Te reira atoa te ohipa e tupu ra i teie mahana. E te mau metua, e nafea outou e nehenehe ai e tauturu i ta outou mau tamarii ia riro mai ei Kerisetiano e haamaitai ra ia Iehova ma te itoito rahi i roto i te taviniraa? I teie â taime, mai tei haamahitihitihia i roto i to nia nei tumu parau no nia i te mau putuputuraa a te amuiraa, o to outou hiˈoraa te mea faufaa. Ua faaite te hoê metua tane i te mau huru aau o te mau metua no te mau vahi atoa ia ˈna i parau e: “Eita te mau tamarii e haa mai ta outou e parau; e haa ratou mai ta outou e rave!”
2 Te haamanaˈo ra te hoê tuahine o tei faaamuhia e te mau metua e mǎtaˈu ra i te Atua: “Aita roa ˈtu matou i tia mai i te hoê mahana maa ma te uiui e e haere anei matou i roto i te taviniraa. Ua ite matou e e haere matou.” E nehenehe atoa outou e faaô i te faufaaraa o te ohipa pororaa i roto i ta outou mau tamarii na roto i te faariroraa i te pororaa ei utuafare ei peu matauhia ia rave i te mau hebedoma atoa. E nehenehe ïa ta outou mau tamarii e haapii na roto i to outou hiˈoraa i te hoê pae, e i te tahi aˈe pae, e nehenehe outou e ite i to ratou huru aau, ta ratou mau peu maitatai e to ratou mau haereraa i mua.
3 Te hoê faaineineraa tamau: Ia au te tamarii i te taviniraa, e mea tia ia faaineinehia ratou ia apiti atu ma te aravihi. Ua parau faahou te tuahine i faahitihia na mua ˈtu e: “Aita roa ˈtu matou i riro ei tamarii apee o te na muri iho noa i to matou mau metua i roto i ta ratou ohipa pororaa. Ua ite matou e e tuhaa atoa ta matou, noa ˈtu e o te pate-noa-raa i te ôe i te hoê uputa e te vaiihoraa i te tahi api parau. Na roto i te faaineine-maitai-raa na mua ˈˈe i te mau ohipa atoa i te hopea hebedoma, ua ite matou e eaha ta matou e parau atu.” E nehenehe outou e haapii i ta outou mau tamarii mai te reira atoa, ma te rave tau minuti i te mau hebedoma atoa no te faaineine ia ratou no te taviniraa, no te aha e ore ai i te taime haapiiraa utuafare aore ra i te tahi atu taime?
4 E horoa mai te poro-amui-raa ei utuafare i te tahi atu â taime no te faaô i te parau mau i roto i ta outou mau tamarii. E rave na te hoê metua tane Kerisetiano i ta ˈna tamahine na muri ia ˈna ia haere atu oia na raro 10 kilometera i te atea no te opere i te mau api parau na te feia e faaea ra i roto i te oire iti i te tahi atu afaa. “I roto i taua mau taime ra e haere ai mâua na raro,” ta ˈna ïa e haamanaˈo ra ma te putapû mau, “to to ˈu papa tanu-hohonu-raa i te parau mau i roto i to ˈu aau.” (Deut. 6:7) E haamaitai-atoa-hia outou no te faaôraa i te pororaa i roto i ta outou porotarama utuafare i te mau hebedoma atoa.