Porotarama utuafare—Te mau putuputuraa a te amuiraa
1 Mai te peu e e metua Kerisetiano outou, e hinaaro outou ia riro mai ta outou mau tamarii ei feia paari o te here e o te tavini ra ia Iehova e, i te pae hopea, ia noaa te ora mure ore i roto i te ao apî fafauhia e te Atua. E nafea outou e nehenehe ai e tauturu ia ratou ia tuu na mua i te haamoriraa ia Iehova i roto i to ratou oraraa? Te hoê ravea faufaa roa e mea na roto ïa i to outou hiˈoraa. (Mas. 20:7) A haamanaˈo ai oia i te hiˈoraa o to ˈna metua vahine, ua parau te hoê tuahine e: “Eita roa ˈtu matou e uiui noa ˈˈe e e haere anei matou i te putuputuraa aore ra eita.” Ua tapao maoro te reira ia ˈna.
2 Te taa ra anei i to outou utuafare i te fa o te mau putuputuraa a te amuiraa? E faaitoito te haapiiraa ta tatou e fanaˈo ra i taua mau haaputuputuraa ra ia tatou ia rave tamau i to te Atua hinaaro, e e pu tamahanahanaraa faito ore te amuimuiraa e to tatou mau taeae. (Isa. 54:13; Roma 1:11, 12) Te fa matamua râ o teie mau putuputuraa, o te arueraa ïa ia Iehova “i roto i te mau amuiraa.” (Sal. 26:12) E mau ravea te mau putuputuraa Kerisetiano no te faaite i to tatou here ia Iehova e no te haamori ia ˈna.
3 “A ara”: Mai te peu e e taa ia tatou i te fa moˈa roa o ta tatou mau putuputuraa, e “ara” ïa tatou eiaha e haamatau i te mairi riirii noa ˈˈe i te mau putuputuraa no te haapao i te mau mea e ere i te mea faufaa roa. (Eph. 5:15, 16; Heb. 10:24, 25) A haamau ai outou i ta outou porotarama utuafare, e haamata paha ïa outou ma te tapao i te mau hora o te mau putuputuraa a te amuiraa. I muri aˈe, a ara ia ore te tahi atu mau ohipa ia haafifi i te reira. A faariro i te taeraa i te mau putuputuraa ei mea faufaa roa no to outou utuafare.
4 Aita anei tatou e putapû ra ia taio tatou i te mau haafifiraa ta to tatou mau taeae e faaruru ra ia tae iho â ratou i te mau putuputuraa e tairururaa? Noa ˈtu eita outou e rave i te mau tutavaraa rahi roa ino, te faaruru atoa ra paha outou i te fifi. Te haafifi noa ˈtura Satani i te nunaa o te Atua ia haamori ia Iehova. Ia papu râ ia outou e e ite iho â ta outou mau tamarii i te mau tutavaraa papu ta to outou utuafare e rave ra no te tae i te mau putuputuraa a te amuiraa. I te na reiraraa, e nehenehe ïa outou e horoa ˈtu na ratou i te hoê ô pae varua o te ore roa ˈtu e moehia.