E te mau metua, a faaineine i ta outou mau tamarii no te pororaa
1 Te oaoa nei ta tatou mau amuiraa i te mea e e rave rahi mau tamarii e hinaaro mau nei e tavini i te Atua ma te aau rotahi. (Koh. 12:1) O ratou atoa te farii nei i te titau-manihini-raa no te arue i te Atua. (Sal. 148:12-14) No reira, e tia te haapiiraa o ta te mau metua e horoa nei i ta ratou mau tamarii i te mau mahana atoa, i te tahi aˈe pae, ia faaineine ia ratou no te faaite i to ratou faaroo ia vetahi ê i roto i te pororaa.—Deut. 6:6, 7.
2 E haapii mǎrû noa i ta tatou mau tamarii: E faufaahia ta tatou mau tamarii ia haapii-anaˈe-hia ratou, mai to ratou apîraa mai â no te apee atu i to ratou mau metua i roto i te taviniraa. Hou aˈe e haere atu ai i roto i te pororaa, e faaineine anaˈe i ta tatou mau tamarii ia ohipa ratou ma te ieie. E haamata tatou i te faataa papu atu ia ratou e eaha na ta tatou e hinaaro ra ia ratou ia rave na te mau fare. E nehenehe te mau tamarii rii e horoa ˈtu i te mau api parau iti aore ra i te mau api parau titau-manihini-raa e e faaau atu i te mau taata ia haere mai i te Piha no te Basileia. E nehenehe atoa e ani atu i te mau tamarii apî o tei ite maitai i te taio, ia taio mai i te mau irava Bibilia. E nehenehe ratou e pûpû i te mau vea na roto i te vauvau-ohie-raa ˈtu. Ia rahi mai to ratou aravihi, e haapii anaˈe ia ratou i te faaohipa i te Bibilia i roto i ta ratou mau faaiteraa. Te vaiiho tamau nei vetahi mau taata apî te mau vea i te mau taata, e te hoˈi faahou atu nei e farerei ia ratou. E mea faufaa aˈe ia amuihia ˈtu te hoê tamarii i te hoê taata paari, i te hoê Kerisetiano apî. Na te taata paari e faaite atu i te taata e porohia ra e te haapiihia nei teie tamarii i roto i te taviniraa.
3 Ua ani te hoê tamahine apî i te mau matahiapo ia tauturuhia o ˈna no te faaî i te mau titauraa no te haere e poro. E pae matahiti anaˈe to ˈna i tera taime e aita oia i ite i te taio, tera râ, e nehenehe ta ˈna e faaite papu i te poroi o te Basileia i mua i te mau taata. Ua tapao o ˈna i te mau irava, e heheu oia i ta ˈna Bibilia i tera mau vahi, e e ani o ˈna i te taata i mua ia ˈna ia taio mai, e i reira oia e horoa ˈtu ai i te mau haamaramaramaraa.
4 Na roto i to ratou hiˈoraa, e tia i te mau metua ia haapii i ta ratou mau tamarii i te faufaaraa o te faanaho-maitai-raa no te tamau noa i te haere i roto i te pororaa. E mea tia ia haamau i te hoê porotarama no te mau mahana atoa no te taviniraa, e ia faaturahia te reira, ia ite papu te mau tamarii e eaha mau na te taime o te hebedoma i faataa-papu-hia no te pororaa.
5 Mai te peu e haapii na te mau tamarii mai to ratou apîraa mai â i te here i te taviniraa e te haereraa e poro, e turai te reira ia ratou ia haere i mua ia nehenehe ia roaa mai, i te tau a muri atu, te mau haamaitairaa hau atu, e peneiaˈe, ia rave i te taviniraa pionie. (Kor. 1, 15:58) E tia mau â ia tatou paatoa ia faaitoito i te mau tamarii i pihai iho ia tatou nei ia haere ratou i mua no te faahanahana ia Iehova.