E haamaitai anaˈe ia Iehova i roto i te amuiraa rahi
1, 2. Eaha te ravea ta te tairururaa mataeinaa e horoa maira e e nafea tatou e nehenehe ai e faatupu i te reira?
1 I te mau matahiti atoa, te horoa maira te mau tairururaa mataeinaa i te hoê ravea faahiahia no te faahanahana ia Iehova. Hoê â to tatou huru aau e to Davida, o tei himene e: “E haamaitai au ia oe i roto i te amuiraa rahi ra i reira; e arue au ia oe i te aro o te taata atoa e rave rahi.” (Sal. 35:18) I te tairururaa mataeinaa i mua nei, “Te auraroraa i te Atua,” e nafea tatou e nehenehe ai e papu e te arue ra tatou, ei nunaa tahoêhia, ia Iehova?
2 Hoê o te mau ravea, mea na roto ïa i to tatou haerea. Teie ta te tiaau o te hoê vahi i reira te tupuraa te hoê tairururaa i parau: “I to te tahi atu mau pǔpǔ faaroo aniraa e tarahu i to matou vahi, ua parau matou ia ratou ia haere mai e hiˈo mea nafea te mau Ite no Iehova i te faanahoraa i te hoê tairururaa. Ua rave matou i ta outou mau tairururaa ei hohoˈa faanahoraa.” E nehenehe tatou taitahi, na roto i to tatou huru rapaeau, haa-amui-raa e to tatou haerea, e faatupu i te mau arueraa, o te faataehia i to tatou Atua.—Pet. 1, 2:12.
3, 4. E nafea te aau faahaihai e tauturu ai ia tatou ia ahu mai te au i te mau tavini Kerisetiano, i te tairururaa e i muri aˈe i te mau rururaa?
3 To tatou iho huru rapaeau: E titauhia te aau faahaihai no te faaahuraa e te faaneheneheraa o te arue ia Iehova. (Tim. 1, 2:9) Te na ô ra te buka École du ministère i te api 132 e: “E turai te aau faahaihai ia tâuˈa e e eiaha ia faariri faufaa ore ia vetahi ê e eiaha ia huti i te ara-maite-raa i nia ia ˈna iho.” I te fenua e rave rahi, e mea matauhia te faaahuraa tano ore. Tera râ, mea au na Iehova te mau tutavaraa ta tatou e rave nei no te tia ˈtu no ˈna ma te tano. (Ohi. 15:14) Noa ˈtu e e faatupuhia te tairururaa i roto i te tahi mau piha tuaro aore ra te tahi atu vahi, e riro tera haaputuputuraa ei “amuiraa rahi” na tatou i te roaraa i na mahana e toru o te tairururaa. No reira, i te mea e te haaputuputu nei tatou i mua ia Iehova, e mea tia ia ahu tatou ma te tura no te Taata Rahi roa ˈˈe o te ao taatoa.—Par. 1, 29:11.
4 E mea titauhia atoa ia ara tatou i to tatou huru rapaeau i muri aˈe i te mahana rururaa taitahi. Noa ˈtu e e hinaaro tatou e oomo i te ahu au aˈe i te taime faafaaearaa aore ra i te fare tamaaraa, e mea faufaa ia au to tatou huru rapaeau i te mau taata “i mau i te paieti ra.” (Tim. 1, 2:10) E ere na te peu matauhia a teie nei ao e faaoti eaha te ahu e tano ia oomo. (Ioa. 1, 2:16, 17) E nehenehe tatou e hiˈo i te mau hohoˈa o te faaahuraa au noa e te naho maitai o te mau tane e vahine i roto i ta tatou mau papai Kerisetiano e te reira i roto i te mau tupuraa e rave rau. Ua riro te amoraa i ta tatou tareta i te motu i reira e tupu ai te tairururaa ei haamanaˈoraa e e tavini Kerisetiano tatou i te mau taime atoa.—Kor. 2, 6:3, 4.
5, 6. E nafea tatou e nehenehe ai e faaite i te faatura no te amuraa maa pae varua a Iehova?
5 E faatura anaˈe i te amuraa maa a Iehova: Ua tuu te Fatu e Arii o te ao taatoa i te hoê amuraa maa rahi i mua ia tatou. (Isa. 25:6; Kor. 1, 10:21) Mai te peu e e haafaufaa roa tatou i te parahiraa e vai ra ia tatou i te amuraa pae varua a Iehova, ta tatou fa o te taeraa mai ïa i na mahana e toru o te tairururaa. Ua rave anei outou i te mau faanahoraa no te nohoraa, te utaraa, e i te mau mahana faaearaa ohipa? Ua faanaho atea anei outou i te taime e hinaarohia no te faaineineraa e no te revaraa ia nehenehe outou e tapae oioi i te tairururaa ia itea mai te parahiraa, ia amui atu i to outou mau taeae e ia apiti atu no te arue ia Iehova e o ratou i te roaraa o te himene e o te pure haamataraa?—Sal. 147:1.
6 E turai to tatou faatura i te amuraa maa a Iehova ia tatou ia haapao maite i te porotarama e ia haapae i te faatia parau ia vetahi ê, te tamaa e te hahaere na te mau vahi haereraa taata. Na roto i te pǔpǔ o te tavini haapao maitai e te paari, te horoa mai nei Iehova i te maa pae varua o ta tatou e hinaaro i teie atoa nei. (Mat. 24:45) Aita te hoê aˈe o tatou e nehenehe e haamâuˈa i te hoê tuhaa rii. E mea tia ia parahi te mau metua i pihai iho i ta ratou mau tamarii e ia tauturu ia ratou ia fanaˈo pauroa i te porotarama.—Deut. 31:12.
7. Eaha te anihia ra ia tatou ia rave no te maa i te avatea, e no te aha?
7 Te anihia ra ia tatou ia hopoi mai i te maa eiaha râ ia faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe e haapopouhia i te rahiraa o te feia i tae mai no to ratou peeraa i te mau faaueraa i te matahiti i mahemo o te tairururaa. E mea maitai roa ia na reira tatou paatoa i teie matahiti! (Heb. 13:17) E horoa teie faanahoraa i te hoê ravea faahiahia ia fanaˈo i te auhoaraa faaitoito o to tatou mau taeae e e faatupu i te auhoêraa e te hau o te faahanahana ia Iehova.—Sal. 133:1.
8, 9. Eaha te ravea hau no te arue ia Iehova ta te tairururaa e horoa mai?
8 E horoa anaˈe i te faaiteraa ma te faanaho-ore-hia: Ia haere tatou i te vahi tairururaa aore ra ia hoˈi mai tatou, te vai mau ra ia tatou e rave rahi ravea no te arue ia Iehova ma to tatou nei vaha. (Heb. 13:15) Noa ˈtu e te tamaa ra tatou i te hoê vahi tamaaraa aore ra te paraparau ra e te feia rave ohipa o te hotela, e imi anaˈe i te mau ravea no te poro. E î to tatou aau e feruriraa i te mau taoˈa pae varua ta tatou i fanaˈo i te tairururaa. E faaite anaˈe tera mau mea maitatai i te feia ta tatou e farerei atu ma te faanaho-ore-hia.—Pet. 1, 3:15.
9 Te hinaaro ru nei tatou e fanaˈo i teie ravea no te haamaitai ia Iehova “i roto i te mau amuiraa ra.” (Sal. 26:12) Ia haamaitai tatou ia Iehova ma te tahoê i te tairururaa mataeinaa “Te auraroraa i te Atua.”
[Tumu parau tarenihia i te api 5]
Tairururaa mataeinaa–haamanaˈoraa
◼ Hora: E haamata te porotarama i na mahana taitahi e toru i te hora 9 e te afa i te poipoi. E matara te opani i te hora 8 i te poipoi. Tau minuti na mua ˈˈe e haamata ˈi te rururaa, e haere te peretiteni e parahi i nia i te tahua a taˈi ai te upaupa o te Basileia. E mea titauhia ia tatou paatoa ia haere e parahi i taua taime ra ia nehenehe te porotarama e haamata ma te tura. E hope te porotarama e pae minuti mairi i te hora pae i te ahiahi i te Mahana pae e Mahana maa, e e ahuru minuti mairi i te hora maha i te ahiahi i te Tapati.
◼ Tapearaa pereoo: I te mau vahi atoa o te tairururaa i reira te tapearaa pereoo e tiaihia ˈi, e nehenehe ïa e tomo atu ma te tamoni ore e e faanahohia na mua te mau pereoo e tae matamua mai. E riro te mau tareta o te tairururaa ei parau faatia no te tomo atu. O te mau pereoo anaˈe e fanaˈo nei i te parau faatia a te ture no te tapearaa i te mau vahi faataahia no te mau huma mero te nehenehe e tapea i te vahi faataahia no ratou. I te mea e e mea pinepine e taotiahia te rahiraa pereoo i te tapearaa pereoo, te faaitoito atu nei matou ia outou mai te peu e e nehenehe eiaha e haere mai i te tairururaa hoê aore ra piti taata hoê pereoo.
◼ Tapaoraa i te parahiraa: E tapaohia te mau parahiraa no te feia anaˈe e tere ra na muri ia outou aore ra no te feia e faaea ra e o outou i roto i te hoê â fare.
◼ Ô: Te vai ra te mau haamâuˈaraa rahi ia faanahohia te hoê tairururaa mataeinaa. E nehenehe tatou e faaite i to tatou mauruuru ma te horoa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa i te iˈoa i muri nei: “Association les Témoins de Jéhovah.”
◼ Feia tariˈa turi: E horoahia ˈtu te mau haamaramaramaraa no te reira i te haamataraa iho â o te rururaa matamua. Tera râ, te haamanaˈo atu nei matou ia outou e e hurihia te porotarama na roto i te reo aparaa rima i te tairururaa o te 15 e tae atu i te 17 no Tiurai 2005.
◼ Tamaaraa i te avatea: A hopoi mai i ta outou maa eiaha râ e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe e faaohipahia te hoê farii faatoetoeraa maa nainai o te nehenehe e tuuhia i raro aˈe i te parahiraa. Eita e fariihia te farii faatoetoeraa maa rahi, te mau farii hiˈo e te ava i te vahi tairururaa.
◼ Faaharuharuraa: Eiaha ia patiahia te mau mauhaa faaharuharuraa rau atoa i nia i te mau faahaereraa uira aore ra i nia i te faanahoraa o te haapurororaa, e eiaha roa ˈtu to ratou faaohiparaa ia haapeapea ia vetahi ê.
◼ Pata hohoˈa: Ia pata outou i te hohoˈa, eiaha e faaohipahia te mori pura i te roaraa o te rururaa.
◼ Pageur e vini: Ia faatanohia te reira ia ore te feia i tae mai ia fifihia, e tia ˈi.
◼ Ati e piha ru: No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa o te faaara oioi i te utuuturaa matamua. I reira, na te hoê pǔpǔ tauturu rapaauraa e parau e mea atâta anei te tupuraa e e rave oia i tei titauhia. Ia hinaarohia, e niuniu o ˈna te piha rapaauraa ru.
◼ Hotela: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore outou i ta outou tarahuraa, a faaara oioi atu i te hotela. (3) A rave noa i te hoê paepae turairaa taihaa ia ineine anaˈe outou i te faaohipa i te reira. (4) Eiaha e tunu i te maa i roto i te mau piha mai te peu e aita e vahi tunuraa maa to roto. (5) Ia haere outou e taofe aore ra i te tahi atu tamaaraa i reira e pûpûhia ˈi te maa ma te taotia-ore-hia, ia vai faito noa ïa outou. E maa teie e amuhia i te hotela e te mau hoani. (6) A faaite i te hotu a te varua i nia te mau rave ohipa, i te taime iho â râ o te tapaoraa i te taeraa mai e te revaraa, e pinepine e mea huehue.