E ora te mau huru taata atoa
1. Tei te aha to tatou roo i mua i te Atua?
1 Ua iriti to te Atua maitai rahi i te eˈa no te ora. O te hinaaro o Iehova “i te [mau huru] taata atoa ia ora, e ia noaa te ite [mau] i te parau mau.” (Tim. 1, 2:3, 4; MN) To tatou roo i mua i te Atua, tei to tatou ïa faaroo i to Iesu tusia taraehara, eiaha râ tei to tatou iri, tiaraa totiare, aravihi, aore ra huru rapaeau. (Ioa. 3:16, 36) Ei hoa rave ohipa no te Atua, e mea tia ia tinai tatou i te mau manaˈo oti noa atoa, o te nehenehe e faahema ia tatou ia faaatea ê i te feia ta Iehova e farii ra.
2, 3. Eaha te nehenehe e tauturu ia tatou ia ore e haava i te taata na nia i to ratou huru rapaeau?
2 Eiaha e haava: E hiˈo Iehova i te mea e vai ra i roto i te taata, ma te manaˈo ino ore aore ra paetahi ore. (Sam. 1, 16:7) E hiˈo atoa oia i te mau ravea e vai ra i roto ia ratou. E mea hinaarohia ïa e ana te feia e hinaaro e faaoaoa ia ˈna. (Hag. 2:7) Te hiˈo ra anei tatou ia vetahi ê mai ta te Atua e rave ra?
3 E huru ê paha tatou ia farerei tatou i te tahi mau taata i roto i te taviniraa no to ratou huru rapaeau. E ahu mutumutu aore ra haapaoraa ore paha to ratou, e mau huruhuru taa roa, aore ra e tapea ihu aore ra tapea vaha to ratou. Aita paha to te tahi atu e fare. E etaeta mai paha vetahi i nia ia tatou. Eita tatou e haava i tera mau taata ma te manaˈo e e ore roa ratou e haamori ia Iehova, e mea tia râ ia tapea tatou i te hoê huru feruriraa tano, no te mea e “ite ore atoa to tatou i mutaa ihora, e te faaroo ore, e te hapa.” (Tito 3:3) Ma te ite i te reira, e anaanatae aˈe tatou i te poro i te taata taitahi, oia atoa i te feia, no te huru rapaeau, eita e au ia porohia.
4, 5. Eaha ta tatou e haapii na roto i te hiˈoraa o Iesu e o Paulo?
4 Te mau hiˈoraa o te senekele matamua: Ua tauturu o Iesu Mesia i te feia o ta vetahi ê paha i manaˈo e eita roa ratou e riro ei feia haamori ia Iehova. (Luka 8:26-39) Ma te ore e tapo i te mata i nia i te mau peu iino, ua ite oia e e nehenehe â te taata e pee i te hoê huru oraraa ino. (Luka 7:37, 38, 44-48) No reira oia i taa ˈi i te huru o te taata, “aroha ˈtura ia ratou; no te mea mai te nǎnǎ mamoe tiai ore ra ratou.” (Mar. 6:34) E nehenehe anei tatou e pee roa ˈtu â i to ˈna hiˈoraa?
5 Ua pehihia te aposetolo Paulo i te ofai, ua taparahihia, e ua hurihia i te fare tapearaa. (Ohi. 14:19; 16:22, 23) Ua turai anei tera mau tamataraa etaeta ia ˈna ia inoino e ia faaoti e te haamâuˈa ra oia i to ˈna taime i rotopu i te tahi mau nunaa e pǔpǔ taata rau? Aita roa ˈtu. Ua ite oia e te vai ra te mau taata aau haavare ore i rotopu i te mau pǔpǔ taata rau atoa, e ua faaoti papu oia e imi ia ratou. Mea na reira anei tatou ia hiˈo i te feia e huru tupuraa e e taˈere taa ê to ratou i roto i ta tatou tuhaa fenua?
6. Eaha te faahopearaa o to tatou huru i nia i te feia a tahi ra a haere mai ai i te mau putuputuraa a te amuiraa?
6 E farii anaˈe ia vetahi ê i teie mahana: Te oaoa ra e rave rahi i roto i te nunaa o te Atua i to te mau taeae e tuahine fariiraa ia ratou i roto i te amuiraa ma te ore e hiˈo i te huru rapaeau. Ua haere mai te hoê taata huruhuru taa roa e te rouru roa i te tapono ra, e te ahu reporepo, i te Piha a te Basileia i Heremani. E roo ino atoa to ˈna. Noa ˈtu râ, ua farii-mahanahana-hia o ˈna i te putuputuraa. Ua maere roa o ˈna e ua hoˈi atu oia i te hebedoma i muri aˈe. I roto maa taime poto, ua taui oia i to ˈna huru rapaeau, ua faaea i te puhipuhi i te avaava, e ua faatiamâ i to ˈna mau taairaa e to ˈna hoa vahine. Aita i maoro, ua tavini raua e ta raua tamarii ia Iehova ei utuafare tahoê.
7. E nafea tatou e nehenehe ai e pee i to tatou Atua paetahi ore?
7 E pee anaˈe i to tatou Atua paetahi ore ma te titau manihini i te taata atoa ia fanaˈo i te maitai rahi o te Atua!
[Parau iti faaôhia i te api 3]
“E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.