A tauturu i te tiaau no ta outou haapiiraa buka
1 E rave rahi maitai e noaa mai ia tatou paatoa i te haapiiraa buka. I te avaˈe i mairi aˈenei, ua aparau tatou i nia i te tuhaa a te tiaau no te haapiiraa buka. E nafea râ tatou ia tauturu ia ˈna, ia faufaahia tatou e to tatou mau hoa ê atu?
2 Ia tae mai tatou i te mau hebedoma atoa: No te mea mea iti te feia e putuputu ra i roto i te mau haapiiraa buka atoa, mea faufaa roa ïa ia tae mai outou. A haamau ei fa e tae mai i te mau hebedoma atoa. E nehenehe atoa outou e haa amui na roto i te taeraa mai i te hora tia, ia haamata te tiaau i te putuputuraa ma te naho.—Kor. 1, 14:40.
3 Te mau pahonoraa o te patu: Te tahi ravea ê atu no te tauturu ia ˈna, o te faaineine-maitai-raa ïa ia ˈna e te horoaraa i te mau pahonoraa o te patu. O te mau pahonoraa i te hoê anaˈe manaˈo te mea maitai aˈe; hau atu â, e horoa te reira i te ravea na te tahi atu ia pahono atoa. Eiaha e tamata i te haapoto i te paratarafa. E faufaa-atoa-hia te aparauraa na roto i te horoaraa i te hoê manaˈo o te haapiiraa o tei haaputapû roa ia outou.—Pet. 1, 4:10.
4 Mai te peu e na outou te fanaˈoraa taa ê e taio i te mau paratarafa, a haapao maite i te reira. E tauturu te taio-maitai-raa ia manuïa te haapiiraa.—Tim. 1, 4:13.
5 Ei pǔpǔ faaiteraa: E faatupuhia te mau putuputuraa no te pororaa i roto e rave rahi haapiiraa buka. Na roto i to outou taeraa mai, e turu outou i te tiaau ia amo maitai i tera tuhaa ê atu o ta ˈna ohipa, te aratairaa ïa i te pororaa evanelia. A hiˈo i taua mau faanahoraa ra ei mau ravea no te haafatata ˈtu i to outou mau taeae e no te faaitoito ia ratou.
6 Tapura taviniraa taavaˈe: E haa amui atoa outou e te tiaau no ta outou haapiiraa buka ma te horoa i ta outou tapura pororaa i te mau hopea avaˈe atoa. E nehenehe ta outou e horoa rima roa ˈtu i ta outou api parau taviniraa, aore ra e tuu atu i roto i te afata tei faanahohia no te reira i te Piha a te Basileia. E nehenehe te papai parau e faaohipa i taua afata ra no te haaputu i te mau api parau taviniraa tei noaa i te mau tiaau no te haapiiraa buka.
7 E mauruuruhia to outou haa-amui-raa e te tiaau no ta outou haapiiraa buka. Hau atu â, ia papu ia outou e ‘ei to outou atoa na huru feruriraa’ o Iehova.—Phil. 4:23, MN.