Te haapiiraa buka—no te aha tatou e hinaaro ai
1. Eaha te mau haamataraa o te haapiiraa buka?
1 I te matahiti 1895, ua topa te Feia haapii Bibilia (iˈoa tahito o te mau Ite no Iehova) i ta ratou mau pǔpǔ haapiiraa i te iˈoa Pǔpǔ o te Aahiata no te haapiiraa bibilia. E faaohipa na ratou i te mau buka o te Aahiata o te Mireniuma ei buka tumu no te aparauraa. I muri aˈe, ua parauhia tera mau pǔpǔ haapiiraa te mau Pǔpǔ no Berea no te haapiiraa bibilia. (Ohi. 17:11) E putuputu na te pǔpǔ iti taitahi i te po tano no te taatoaraa, mea pinepine i roto i te hoê utuafare. Mea na reira te haapiiraa buka i te haamataraa.
2. E nafea tatou paatoa e ‘mahanahana ˈi’ i te haapiiraa buka?
2 Te taeraa mai e te faaitoitoraa: No te mea e mea taotiahia iho â te mau taata o te pǔpǔ o te haapiiraa buka, e mea ohie roa no te feia e amui mai ia faaite i to ratou faaroo. I muri aˈe, e ‘mahanahana tatou paatoa i to tatou faaroo.’—Roma 1:12.
3, 4. E nafea te faanahoraa o te haapiiraa buka e tauturu ai ia tatou ia rave i ta tatou taviniraa?
3 E tauturu te haapao-maite-raa i ta te tiaau no te haapiiraa buka huru haapiiraa ia tatou ia ‘tufa i te parau mau ra ma te tia.’ (Tim. 2, 2:15) A tapao iho â râ e nafea oia e haafaufaa ˈi i te mau irava bibilia i faahitihia. Mai te peu e e tano i te papai e haapiihia ra, e nehenehe oia e haamahitihiti i te mau manaˈo faufaa na roto i te hoê hiˈo-faahou-raa hopea, ma te faaohipa i te Bibilia noa. E tauturu to ˈna hiˈoraa maitai ia tatou ia haamaitai i ta tatou huru haapiiraa i roto i te taviniraa Kerisetiano.—Kor. 1, 11:1.
4 Hau atu â i te faatere i te haapiiraa i te mau hebedoma atoa, e aratai te tiaau no te haapiiraa buka i te pororaa evanelia. E ohipa amui oia e te tiaau no te taviniraa no te faanaho i te mau putuputuraa tano no te pororaa. Hau atu â, e tutava oia i te tauturu i te taatoaraa o te mau melo o ta ˈna pǔpǔ ia amo i ta ratou hopoia e poro i te parau apî maitai e e faariro i te taata ei pǐpǐ.—Mat. 28:19, 20; Kor. 1, 9:16.
5. Eaha te tauturu ta tatou iho e fanaˈo na roto i te haapiiraa buka?
5 E anaanatae atoa te tiaau no te haapiiraa buka i te maitai pae varua o te melo atoa o ta ˈna pǔpǔ. E faaite oia i taua anaanatae ra i te mau putuputuraa a te amuiraa e ia poro oia e vetahi ê. E pûpû atoa oia i te mau faaitoitoraa pae varua a farerei ai oia i te mau taeae e tuahine i to ratou fare. Ia ore te taatoaraa ia taiâ i te haafatata ˈtu i te tiaau no te haapiiraa buka no te ani i te tauturu pae varua a hinaaro ai ratou e tia ˈi.—Isa. 32:1, 2.
6. (a) Mea nafea to tatou mau taeae no vetahi mau fenua i te faaitoitoraahia na roto i te putuputuraa ei pǔpǔ iti? (b) Eaha te mau maitai ta outou iho i fanaˈo na roto i te haapiiraa buka?
6 Te faaitoitoraa te tahi i te tahi: I te mau fenua i taotiahia ˈi ta te nunaa o te Atua ohipa, e pinepine te mau taeae i te putuputu ei pǔpǔ iti. Te haamanaˈo ra te hoê taeae: “Noa ˈtu e ua opanihia ta matou mau ohipa Kerisetiano, i te mau taime atoa e nehenehe ai, e faatupu matou i ta matou mau putuputuraa tahebedoma ei mau pǔpǔ 10 e tae atu i te 15 taata. Ua faaitoito tera mau putuputuraa ia matou, no te mea e haapii matou i te Bibilia e e oaoa matou i muri aˈe i te amuimuiraa te tahi i te tahi. E faaau na matou i to matou mau tupuraa, e e tauturu te reira ia matou ia ite e hoê â aroraa ta matou paatoa.” (Pet. 1, 5:9) Ia tutava atoa tatou i te faaitoito te tahi i te tahi ma te turu roa i te haapiiraa buka.—Eph. 4:16.