E faaite anaˈe i te parau mau no nia ia Iesu
1 ‘Te mau maite ra’ te mau Kerisetiano faatavaihia, paturuhia e to ratou mau hoa, te mau mamoe ê atu, i “[te ohipa faaiteraa ia] Iesu.” (Apo. 12:17; MN) Mea faufaa taua ohipa faauehia ra no te mea maoti noa oia e ora ˈi tatou.—Ioa. 17:3; Ohi. 4:12.
2 ‘Te eˈa, te parau mau e te ora’: Ua parau Iesu e: “O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.” (Ioa. 14:6) Maoti anaˈe Iesu, “te eˈa,” e nehenehe ai tatou e pure i te Atua e e faatupu e o ˈna i te mau taairaa ta ˈna e farii. (Ioa. 15:16) O Iesu “te parau mau” i te auraa e ua tupu te mau parau tohu e te mau ata i papaihia i roto i te mau Papai Hebera i nia ia ˈna. (Ioa. 1:17; Kol. 2:16, 17) Oia mau, te fa matamua o te pue parau tohu mau, o te haamaramaramaraa ïa i ta ˈna tuhaa faufaa i roto i te tupuraa o te opuaraa a te Atua. (Apo. 19:10) E o Iesu “te ora”: no te fanaˈo i te ora mure ore, ia faaohipa te taata taitahi i te faaroo i ta ˈna tusia taraehara e tia ˈi.—Ioa. 3:16, 36; Heb. 2:9.
3 Raatira e Arii faatere: Ia farii atoa te taata i te mana faatere rahi ta Iehova i horoa i ta ˈna Tamaiti ra e tia ˈi. Ua faateronohia Iesu ei Arii o te Basileia o te Atua; “ei ia ˈna te auraro o te mau fenua.” (Gen. 49:10, MN) Hau atu â, ua faatoroa Iehova ia ˈna ei Upoo o te amuiraa. (Eph. 1:22, 23) Ia tauturu ïa tatou i te feia e haapii ra i te Bibilia e o tatou ia taa e nafea Iesu ia faatere i te amuiraa e e nafea oia ia faaohipa i “te tavini haapao maitai e te paari” no te horoa i te “maa [varua] i te hora mau.”—Mat. 24:45-47.
4 Tahuˈa Rahi aroha hamani maitai: No te mea ua faaruru oia i te mau tamataraa e ua mauiui ei taata, ‘e tia ia Iesu ia turu mai i te feia i roto i te ati.’ (Heb. 2:17, 18) Mea tamahanahana mau â no te mau taata tia ore ia ite e e hiˈo aroha mai Iesu i to ratou mau paruparu e ei tia oia ia ratou ma te maitai! (Roma 8:34) Maoti ta ˈna tusia e ta ˈna mau ohipa ei Tahuˈa Rahi, e nehenehe tatou e pure “noa ˈtu” ia Iehova ia noaa mai ‘te turu i te tau e au ai ra.’—Heb. 4:15, 16.
5 Ia faaitoito ïa ta tatou mau tutavaraa no te faaite i te parau mau no nia ia Iesu i to tatou mau taata-tupu ia faaroo ia ˈna e ia tavini ia ˈna i pihaiiho ia tatou!—Ioa. 14:15, 21.