Mahana tairururaa taa ê: te porotarama apî
1 A turu noa ˈi te mau vea e te mau orometua haapii i te ruperuperaa materia, te faaitoito maira te Parau a te Atua ‘ia taoˈahia tatou i te ohipa maitatai.’ (Tim. 1, 6:18) Tera te manaˈo tumu o te mau mahana tairururaa taa ê e tupu mai te avaˈe Tetepa 2002 atu. Eaha te mau faaitoitoraa ta tatou e fanaˈo i reira?
2 E vauvau mai te tiaau haaati i te tumu parau ra “Ia taoˈahia tatou ia au i te manaˈo o te Atua,” e e uiui oia i te tahi mau Kerisetiano o te haa puai ra ia noaa ia ratou te mau faufaa pae varua. I roto i ta ˈna oreroraa parau matamua, e faaite mai te taeae orero ratere e nafea te mau tavini a te Atua e rave ai i te “mau ohipa maitatai i teie nei tau auhune.” E faaitoitohia tatou paatoa ia feruri e nafea tatou ia apiti hau atu â i roto i te ohipa ootiraa ta te Atua i faaue, e ravehia nei i teie mahana.
3 Auê tatou i te teoteo ia ite atu i te mau taurearea Kerisetiano e tapi ra i te mau faufaa pae varua e! Te faahanahana ra te reira ia Iehova e te haamau ra i te hoê niu maitai no te mau fanaˈoraa taa ê i te pae taviniraa no a muri aˈe. E haamahitihiti mai te oreroraa parau “E haapopou anaˈe i te feia apî no te ohipa maitatai o te arue ia Iehova” i te ohipa maitai e ravehia ra e te mau taurearea Kerisetiano o te tuhaa haaati.
4 Eaha te noaa mai ia rave i te mau ohipa maitatai? E faataa mai te taeae orero ratere i te reira i roto i ta ˈna oreroraa parau hopea, “E tamau anaˈe i te rave i te ohipa maitatai e e ooti anaˈe i te mau haamaitairaa a Iehova.” E faaite mai oia e maha tuhaa e ooti ai tatou i te mau haamaitairaa rahi: (1) ei taata taitahi, (2) i roto i te utuafare, (3) i roto i te amuiraa, e (4) i roto i te faanahonahoraa na te ao nei.
5 E nehenehe te feia i pûpû ia ratou na Iehova e bapetizohia. Mai te peu e ua ineine outou i te rave i taua taahiraa ra, a paraparau i teie iho nei i te tiaau peretiteni o ta outou amuiraa.
6 Ua oti anaˈe te taio mahana tairururaa o ta tatou tuhaa haaati i te faaarahia, e rave anaˈe i te tahi mau faanahoraa papu no te haere atu. E tutava anaˈe i te tae oioi mai no te apiti i te himene haamataraa e te pure. E haapuai to tatou taeraa mai e to tatou faaroo-maite-raa i te roaraa o te porotarama taatoa o taua mahana tairururaa taa ê ra ia tatou ia tamau i te ora i te hoê oraraa e taoˈa-mau-â-hia ˈi tatou ia au i te manaˈo o to tatou Atua ra o Iehova.