Mau utuafare puai i te pae varua: nafea?
1 E tano ia haapopou tatou i te mau utuafare Kerisetiano no te mea ‘te rave ra ratou i te paieti i roto i to ratou iho fetii.’ (Tim. 1, 5:4) Teie râ, no te rahiraa o te mau mana iino o te nehenehe e haaparuparu i to ratou faaroo, mea faufaa roa ia haa puai te mau utuafare ia vai puai noa ratou i te pae varua. Nafea?
2 Mau upoo utuafare e au i te Mesia: E tia i te mau upoo utuafare ia amo i ta ratou hopoia e haapuai i to ratou utuafare, ia au i te raveraa a Iesu Mesia. Aita noa Iesu i faaite i te hoê mahana i to ˈna aroha na roto i to ˈna pohe tusia, tera râ, te ‘faaamu ra e te faaherehere maite’ tamau ra oia i te amuiraa. (Eph. 5:25-29) Te aupuru atoa ra te mau metua î i te here i to ratou utuafare na roto i te haapaoraa i to ratou mau hinaaro pae varua i tera e i tera mahana. E tia iho â râ ia ratou ia faatere i te hoê haapiiraa bibilia utuafare i te mau hebedoma atoa, ia tauaparau i nia i te mau tumu parau hohonu i te pae varua i te mau taime atoa e nehenehe, e ia faaafaro i te mau fifi ia hiti mai te reira.—Deut. 6:6, 7.
3 I roto i te taviniraa: E tia i te mau melo utuafare atoa ia faariro i te faaiteraa ia vetahi ê no nia ia Iehova e ta ˈna mau opuaraa, ei tuhaa faufaa o ta ratou haamoriraa. (Isa. 43:10-12) Mai te peu e e hinaaro outou, te mau metua, ia riro mai ta outou mau tamarii ei mau Ite no Iehova haapao maitai, e tia ïa ia outou ia haamata oioi roa i te faaineine i to ratou aau no te taviniraa. A faataa ia ratou no te aha mea titauhia ia rave ratou i te taviniraa ma te haapae ia ratou e i te mau hebedoma atoa. (Mat. 22:37-39) Ia oti, a rave i te tahi mau faanahoraa ia apee tamau ratou ia outou i roto i te taviniraa.
4 A tauturu ia ratou ia taa ia ratou te faufaaraa o te pororaa na roto i te faataaraa i te taime i roto i te haapiiraa utuafare i te mau hebedoma atoa no te faaineine i te hoê vauvauraa maitai e no te faahiti na nia iho noa. A faaineine roa ˈtu i ta outou mau tamarii, e nehenehe atu ai ratou e haere i mua ia au i to ratou faito matahiti e to ratou aravihi. I muri aˈe i te pororaa e o ratou, a tauaparau nafea to ratou fanaˈo-roa-raa i te maitai o Iehova. A faatia i te tahi mau tupuraa o te haapaari i to ratou faaroo. E rahi atu â te mau utuafare i ‘te ite e e hamani maitai to te Fatu,’ e piri noa ˈtu â ratou ia Iehova e e itoito noa ˈtu â ratou i te patoi i ‘te mau mea iino atoa.’—Pet. 1, 2:1-3.
5 I te mau putuputuraa: Mea maitai ia tauturu te mau melo utuafare te tahi i te tahi ia haere i te mau putuputuraa atoa a te amuiraa, mai te peu iho â râ e ua rohirohi, ua toaruaru, aore ra ua teimaha roa hoê o ratou. “Ia hoˈi mai oia na te ohipa mai, ua rohirohi roa to ˈu papa,” o ta te hoê tuahine apî ïa e parau ra. “E faaite râ vau ia ˈna i te tahi manaˈo anaanatae o te tauaparauhia i te putuputuraa i taua po ra e e faaitoito te reira ia ˈna ia haere mai. E mai te peu e o vau tei rohirohi, na ˈna ïa e faaitoito mai ia ˈu.”—Heb. 10:24, 25.
6 Ia ohipa amui ratou: E tia i te mau utuafare ia rave amui i te tahi mau ohipa, mai te mau ohipa fare. E tia atoa ia ratou ia faataa i te taime no te faaanaanatae ia ratou ma te tano. Te tamaaraa i rapaeau, te hahaereraa, te hautiraa e te haereraa e hiˈo i te fetii aore ra i te mau hoa, e mau taime oaoa ïa e ore e moehia.—Koh. 3:4.
7 Te faaruru ra te mau utuafare Kerisetiano puai i te mau fifi i te mau mahana atoa o te nehenehe e haaparuparu i to ratou ea pae varua. Na roto i te haafatata-roa-raa ˈtu ia Iehova, te ite ra ratou e te horoa maira oia i to ˈna puai.—Eph. 6:10.