Te mau utuafare rahi i tahoêhia i roto i te taviniraa a te Atua
“TE TAMARII RA, E TUFAA ÏA NO Ǒ IA IEHOVA RA,” O TA TE PAPAI SALAMO ÏA I PAPAI. “TA TE OPU I FANAU RA, E UTUA [MAITAI] ÏA. MAI TE OHE I TE RIMA O TE FEIA PUAI RA, OIA ATOA TE TAMARII A TE TAATA ITOITO RA. E [OAOA] TE TAATA [PAUTUUTU] I Î [TA ˈNA VAIRAA] OHE IA RATOU!”—SALAMO 127:3-5; MN.
OIA mau, e nehenehe te mau tamarii e riro ei haamaitairaa no ǒ mai ia Iehova ra. Mai te hoê taata teˈa e oaoa inaha ua ite oia nafea ia faatano i te mau teˈa e vai ra i roto i ta ˈna vairaa, oia atoa te mau metua, e oaoa ratou ia aratai ratou i ta ratou mau tamarii na te eˈa e tae atu ai i te ora mure ore.—Mataio 7:14.
I mutaa ihora, mea pinepine ua ‘î te mau vairaa ohe’ a te mau utuafare i te mau tamarii e rave rahi, i rotopu i te nunaa o te Atua. A hiˈo na i to ratou faatîtîraahia i Aiphiti ehia matahiti i te maoro: “Tupu atura . . . te tamarii a Iseraela i te rahiraa, e rahi roa ˈtura, e riro atura ei feia itoito rahi; e î atura te fenua ia ratou.” (Exodo 1:7) Ia faaauhia te numera o te mau ati Iseraela i tae atu i Aiphiti e to ratou numera a faarue ai ratou i taua oire ra, e au ra e te faito au noa, hoê ahuru ïa tamarii ta te utuafare taitahi!
Ia maoro rii aˈe, ua paari mai o Iesu i roto i te hoê utuafare e mea rahi paha ia au i te rahiraa i teie mahana. O Iesu te matahiapo, e maha râ tamaiti ê atu ta Iosepha e ta Maria e te tahi mau tamahine. (Mataio 13:54-56) Peneiaˈe e no te rahi o ta raua mau tamarii i ore ai Maria raua o Iosepha i ite e aita o Iesu ia ratou ra i to ratou haamataraa i te hoˈi mai Ierusalema mai.—Luka 2:42-46.
Te mau utuafare rahi i teie mahana
I teie mahana, e rave rahi Kerisetiano o te faaoti nei e taotia i te rahi o to ratou utuafare no te mau tumu i te pae varua, i te pae faanavairaa faufaa, i te pae totiale, e te vai atu â. Noa ˈtu râ, te ite-pinepine-noa-hia ra te mau utuafare rahi i roto i te mau totaiete e rave rahi. Ia au i te tabula ra The State of the World’s Children 1997, tei te fenua Afirika i raro mai i te Sahara te faito teitei roa ˈˈe o te fanauraa. I reira, e ono tamarii ta te vahine au noa.
E ere i te mea ohie no te mau metua Kerisetiano e utuafare rahi to ratou, ia rave i ta ratou mau tamarii e here atu ai ratou ia Iehova, te manuïa nei râ e rave rahi. Tei te tahoêraa ïa te utuafare i roto i te haamoriraa viivii ore, e manuïa ˈi te reira. E tano atoa te mau parau a te aposetolo Paulo i te amuiraa no Korinetia, i te mau utuafare Kerisetiano i teie mahana. Teie ta ˈna i papai: “E teie nei, e au mau taeae, te aˈo atu nei au ia outou . . . e ei parau hoê ta outou atoa na, e eiaha ia amahamaha i roto ia outou: ia ati maite râ outou ma te aau hoê e te manaˈo hoê.” (Korinetia 1, 1:10) Nafea teie tahoêraa e tupu mai ai?
Ia riro te mau metua ei feia maitatai i te pae varua
E tia i te mau metua ia pûpû taatoa ia ratou no te Atua, e tuhaa faufaa teie. A hiˈo na i ta Mose i parau i te mau ati Iseraela: “E faaroo mai, e Iseraela e: O Iehova to tatou Atua, hoê Iehova: e teie nei, e [here] atu oe i to Atua ia Iehova ma to [mafatu] atoa, e ma to [nephe] atoa, e ma to puai atoa. E teie nei mau parau ta ˈu e parau atu ia oe i teie nei mahana, ei roto i to [mafatu] e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere noa oe na te eˈatia ra, e ia taoto noa oe ra, e ia tia noa oe i nia ra.”—Deuteronomi 6:4-7; MN.
A tapao na e te haapapu ra Mose e ia vai te mau faaueraa a te Atua ‘i roto i te mafatu’ o te mau metua. I reira noa ïa te mau metua e horoa tamau ai i te haapiiraa i te pae varua i ta ratou mau tamarii. Inaha, mai te peu e mea puai te mau metua i te pae varua, e hinaaro ru ratou e haapii i te mau mea i te pae varua i ta ratou mau tamarii.
No te riro ei taata maitai i te pae varua e no te here ia Iehova ma to ˈna mafatu taatoa, mea faufaa roa ia taio, ia feruri maite, e ia faaohipa tamau oia i te Parau a te Atua. Ua parau te papai salamo e te taata e oaoa ra e e taio ra i te ture a Iehova i ‘te rui e te ao, e au ïa oia i te raau i tanuhia i te hiti anavai ra, o tei hotu i to ˈna ra tau mau, e o tei ore roa i maheahea to ˈna rau; oia atoa, o ta ˈna atoa e rave ra, te maitai ra ïa.’—Salamo 1:2, 3.
Mai te hoê tumu raau o te hotu maitai ia pîpî-noa-hia oia, e faatupu atoa ïa te mau utuafare e faatamaahia ra i te pae varua i te hotu paieti, no te arue ia Iehova. Te vai ra te hiˈoraa o te utuafare o Uwadiegwu, e faaea ra i Afirika Tooa o te râ. Noa ˈtu e e vau tamarii ta Uwadiegwu raua ta ˈna vahine, te tavini ra raua ei pionie tamau, aore ra tavini Ite no Iehova ma te taime taatoa. Te na ô ra o ˈna e: “Ua faatupu to mâua utuafare i te haapiiraa Bibilia utuafare tamau hau atu i te 20 matahiti i te maoro. Ua haapii mâua i te Parau a te Atua i te mau tamarii mai to ratou tamarii-rii-raa mai, eiaha noa i roto i ta matou haapiiraa utuafare, i roto atoa râ i te taviniraa e i te tahi atu mau taime. Ua riro pauroa ta mâua mau tamarii ei feia poro i te parau apî maitai o te Basileia, o te hopea noa ïa, e ono matahiti, aita i bapetizohia ˈtura.”
Te ohiparaa ei pǔpǔ
“E patuhia te [“hoê utuafare,” MN] i te paari e oti atu,” o ta te Bibilia ïa e parau ra. (Maseli 24:3) I roto i te utuafare, e faatupu teie paari i te ohiparaa ei pǔpǔ. Te “raatira” o te pǔpǔ utuafare, o te metua tane ïa; o ˈna ta te Atua i nomino ei upoo o te utuafare. (Korinetia 1, 11:3) Ua haamatara te aposetolo faauruahia o Paulo i te faufaaraa o te hopoia a te upoo, a papai ai e: “O te taata hoi aore i hamani maitai i to ˈna ihora [i te pae materia e i te pae varua], e rahi atu â i to ˈna ihora utuafare, ua faarue ïa oia i te [“faaroo,” MN], e e rahi atu ïa to ˈna ino i to te taata [“faaroo,” MN] ore ra.”—Timoteo 1, 5:8.
Ia au i teie aˈoraa a te Parau a te Atua, e tia i te mau tane Kerisetiano ia haapao i te huru i te pae varua o ta ratou vahine. Ia teimaha roa te mau vahine faaipoipo i te mau ohipa utuafare, e fifihia to ratou huru i te pae varua. I te hoê fenua no Afirika, ua autâ te hoê Kerisetiano bapetizo-apî-hia i nia i te mau matahiapo o ta ˈna amuiraa, no te mea e au ra e aita ta ˈna vahine e tâuˈa ra i te mau ohipa i te pae varua. Ua parau atura te mau matahiapo e te hinaaro ra ta ˈna vahine i te tahi tauturu ohie. Ua haamata ˈtura te tane e tauturu ia ˈna no te rave i te mau ohipa utuafare. Ua horoa atoa oia i te taime no te tauturu ia ˈna ia haamaitai i ta ˈna taioraa e to ˈna ite i te Bibilia. Ua maitai mai oia, e i teie nei, ua tahoê te utuafare taatoa i roto i te taviniraa a te Atua.
E tia atoa i te mau metua tane ia haapao i te huru maitai i te pae varua o ta ratou mau tamarii. Teie ta Paulo i papai: “O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari i roto i te aˈo [“e te mau faaararaa a Iehova,” MN].” (Ephesia 6:4) Ia pee te mau metua i te aˈoraa eiaha e faaooo i ta ratou mau tamarii ia riri, e te aratairaa no te haapii ia ratou, e manaˈo ïa te mau tamarii e tei roto atoa ratou i te pǔpǔ utuafare. Ei faahopearaa, e riro paha te mau tamarii i te tauturu e i te faaitoito te tahi i te tahi ia naeahia te mau tapao i te pae varua.
Te ohiparaa ei pǔpǔ, o te horoa-atoa-raa ïa i te mau hopoia i te pae varua i te mau tamarii, ia ineine ratou no te reira. I te poipoi, e tia oioi te hoê metua tane i nia, e matahiapo Kerisetiano oia e 11 tamarii ta ˈna, e e faatere oia i te mau haapiiraa e e rave rahi o ratou hou oia a haere ai i te ohipa. I muri aˈe i to ratou bapetizoraahia, na te mau tamarii paari aˈe ïa te tahi i muri i te tahi e tauturu i to ratou mau taeae e mau tuahine apî aˈe, tae noa ˈtu i te haapiiraa ia ratou i te Bibilia. E hiˈopoa e e haapopou te metua tane i ta ratou mau tutavaraa. Ua bapetizohia e ono tamarii, e te tamau noa ra te toea i te rohi e tae atu ai i taua taahiraa avae ra.
Te aparauraa maitai, te mau tapao tufahia
Mea faufaa roa te aparauraa î i te here e te mau tapao i te pae varua tufahia no te mau utuafare tahoê. E metua tane e e matahiapo Kerisetiano o Gordon, e faaea ra i Nigeria, e hitu tamarii ta ˈna mai te 11 e tae atu i te 27 matahiti. E pionie e ono o ratou, mai te mau metua. Te apiti tamau noa ra te hopea, i bapetizohia aita i maoro aˈenei, i roto i te ohipa e faariro i te taata ei pǐpǐ e te toea o te utuafare. E tavini tauturu na tamaiti paari e piti i roto i te amuiraa.
Na Gordon iho i faatere i te mau haapiiraa Bibilia e ta ˈna mau tamarii taitahi. Hau atu â, e porotarama taa maitai ta te utuafare no te haapiiraa Bibilia. I te mau poipoi atoa, e putuputu ratou no te hiˈopoa i te hoê irava Bibilia e e faaineine atu ai i te mau putuputuraa a te amuiraa.
Hoê o te mau tapao i haamauhia no te melo taitahi o te utuafare, o te taioraa ïa i te mau tumu parau atoa o Te Pare Tiairaa e te A ara mai na! Aita i maoro aˈenei, ua faaô atoa mai ratou i te taioraa Bibilia i te mau mahana atoa. Na roto i te tauaparauraa no nia i ta ratou i taio, e faaitoito ïa te mau melo o te utuafare te tahi i te tahi ia tamau noa i te na reira.
I te mea e ua mau papu roa te haapiiraa Bibilia utuafare i te mau hebedoma atoa, aita e faufaa ia faahaamanaˈo ia ratou—e tiai iho â te taatoaraa i taua taime ra. I te roaraa o te mau matahiti, ua tauiui te tumu parau, te huru tupuraa, e te roaraa o te haapiiraa utuafare ia au i te matahiti e te mau hinaaro o te mau tamarii. Ua piri atu te utuafare i te tahi atu mau tavini haapao maitai a te Atua, e ua haamaitai te reira i te mau tamarii.
Ei utuafare, e rave amui ratou i te ohipa e e faataa i te taime no te faaanaanataeraa. Hoê taime i te hebedoma, e faatupu ratou i te hoê “hautiraa po utuafare,” mai te tahi mau uiuiraa, mau ohipa arearea au maitai, te hautiraa i te piana, te faatiaraa i te aamu, e te faafaaearaa huru rau. I te tahi mau taime, e haere ratou i te pae tahatai e i te tahi atu mau vahi anaanatae.
Te turuiraa i nia ia Iehova
Aita hoê aˈe o te feia i faahitihia mai nei e faaiti ra i te fifi e haapao i te hoê utuafare rahi. “E tautooraa rahi ia riro ei metua tane maitai no na tamarii e vau,” o ta te hoê Kerisetiano ïa i parau. “E titauhia e rave rahi maa i te pae materia e i te pae varua no te faatamaa ia ratou; e tia ia ˈu ia rohi ia noaa mai te moni no te haapao ia ratou. Ua taurearea mai te mau tamarii paari aˈe, e te haere noa ra na tamarii e vau atoa i te haapiiraa. Ua ite au e mea faufaa roa te haapiiraa i te pae varua, tera râ, mea etaeta e mea faaroo ore vetahi o ta ˈu mau tamarii. E haapeapea ratou ia ˈu, ua ite râ vau e i te tahi mau taime e rave au i te tahi mau mea o te haapeapea i te mafatu o Iehova, e te faaore ra oia i ta ˈu mau hapa. E tia ïa ia ˈu ia tamau noa i te faatitiaifaro i ta ˈu mau tamarii ma te faaoromai e tae noa ˈtu i te taime e hoˈi mai ai to ratou huru mau.
“Te tutava nei au i te pee i te hiˈoraa o Iehova, inaha te faaoromai nei oia ia tatou no te mea te hinaaro ra oia ia tatarahapa te taatoaraa. Te haapii nei au e to ˈu utuafare, e te ohipa nei vetahi o ta ˈu mau tamarii e tae atu ai i te bapetizoraa. Aita vau e turui nei i nia i to ˈu iho puai no te manuïa; mea iti ta to ˈu puai e nehenehe e rave. Te tutava nei au i te haafatata roa ˈtu â ia Iehova na roto i te pure e i te faaohipa i te maseli e parau ra e: ‘E tiaturi ia Iehova ma to [mafatu] atoa ra; eiaha râ e tiaturi i to oe ihora [maramarama]. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.’ E tauturu mai Iehova ia haapii au i ta ˈu mau tamarii.”—Maseli 3:5, 6; MN.
Eiaha roa ˈtu e tuu!
I te tahi mau taime, e au ra e aita te haapiiraa i te mau tamarii e mauruuruhia ra, eiaha râ e tuu! A tapea maite! Mai te peu e aita ta outou mau tamarii e farii ra aore ra e mauruuru ra i ta outou mau tutavaraa i teie nei, e na reira paha ratou i muri aˈe. E titauhia te taime ia paari mai te hoê tamarii no te riro ei Kerisetiano o te faatupu i te hotu o te varua.—Galatia 5:22, 23.
O Monica, e faaea ra i Kenya, te hoê o na tamarii hoê ahuru. Te na ô ra o ˈna e: “Ua haapii to matou nau metua i te parau mau a te Bibilia ia matou mai to matou tamarii-rii-raa mai. E haapii o Papa i te mau papai Kerisetiano e o matou i te mau hebedoma atoa. No ta ˈna ohipa, eita te haapiiraa e faatere-noa-hia i te hoê â mahana. I te tahi mau taime, ia hoˈi mai oia i te fare mai ta ˈna ohipa mai, e ite mai o ˈna ia matou ia hauti i rapaeau e e parau mai o ˈna e i roto e pae minuti, e haere pauroa matou i roto i te fare no ta matou haapiiraa Bibilia. Ia oti ta matou haapiiraa Bibilia, e faaitoitohia matou ia ui i te tahi mau uiraa aore ra ia paraparau no nia i te tahi mau fifi.
“E hiˈo oia e te amuimui ra anei matou i te mau tamarii paieti. E haere tamau o Papa i te fare haapiiraa no te ani i te mau orometua haapii no nia i to matou haerea. I te hoê taime, ua faaroo oia e ua taputô to ˈu na tuaana e toru e te tahi mau tamaroa, e mea haavî ratou i te tahi mau taime. Ua faautua o Papa ia ratou no to ratou haerea ino, ua rave atoa râ i te taime no te faataa ia ratou na roto i te mau Papai no te aha e tia ia ratou ia faaite i te hoê haerea paieti.
“Ua faaite mai to matou nau metua i te faufaaraa e haere i te mau putuputuraa na roto i te faaineineraa i te mau tumu parau o te putuputuraa e o matou. Ua haapiihia matou no te riro ei mau tavini na roto i te raveraa i te tahi mau taime faaineineraa i te fare. Mai to matou tamarii-rii-raa mai, ua apee matou i to matou nau metua i roto i te pororaa.
“I teie mahana, e pionie taa ê e piti tuaana, e pionie tamau hoê tuahine, e te tahi atu tuahine, i faaipoipo e e utuafare to ˈna, e Ite itoito ïa. E mau tamahine poro bapetizohia to ˈu na tuahine apî aˈe, 18 e 16 matahiti to raua. Te haapiihia ra na tamaroa apî aˈe e piti. Te tavini ra vau i te amaa a te mau Ite no Iehova no Kenya e toru matahiti i teie nei. Te here e te mauruuru nei au i to ˈu nau metua no te mea e mau taata maitatai raua i te pae varua; ua horoa mai raua i te hoê hiˈoraa maitai.”
Noa ˈtu ehia rahiraa tamarii ta outou, eiaha roa ˈtu e tuu i te tauturu ia ratou ia haere na te eˈa e aratai i te ora mure ore. A haamaitai ai o Iehova i ta outou mau tutavaraa, e faahiti faahou outou i ta te aposetolo Ioane i parau no nia i ta ˈna mau tamarii i te pae varua e: “Aita ˈtu o ˈu oaoa rahi maori râ ia ite au, e te haapao ra tau mau tamarii i te parau mau.”—Ioane 3, 4.