“Ihea e itehia ˈi te taime?”
1 Mea rahi o tatou e autâ ra mai teie, ua î roa ino hoi te oraraa i te mau ohipa. Te parauhia ra no nia i te taime e o ta tatou ïa taoˈa faufaa roa ˈˈe e te poto roa ˈˈe. Ihea ïa e itehia ˈi ia tatou te taime e hinaarohia no te rave i te mea faufaa mau, mai te taioraa e te haapiiraa i te Parau a te Atua?—Phil. 1:10.
2 Te ravea, e ere ïa i te imi-hau-raa ˈtu â i te taime, o te opuaraa râ nafea tatou e faaohipa ˈi i to tatou taime. Te vai ra ia tatou paatoa 168 hora i te hebedoma hoê, fatata hoê hanere o teie rahiraa hora tei faataahia no te taoto e no te rave i te ohipa. Nafea ïa tatou e faahoona maitai ai i te mau hora e toe ra ia tatou? I roto i te Ephesia 5:15-17 (MN), te faaitoitohia nei tatou ia haere ‘eiaha mai ta te [feia paari] ore ra, mai ta te feia [paari] râ, ma te faaherehere maite i te taime e ma te taa eaha to [Iehova] ra hinaaro.’ Ia au i teie mau parau, mea faufaa ia faaohipa hope roa i te mau ravea e pûpûhia maira na tatou no te rave i te mea ta Iehova e hiˈo ra ei mea faufaa.
3 Ua faaau Iesu i to tatou tau i to Noa. (Luka 17:26, 27) Mea rahi roa ta te taata ohipa i te mau mahana atoa, ua ite râ Noa i te taime no te hamani i te hoê araka rahi e no te poro. (Heb. 11:7; Pet. 2, 2:5) Nafea? Ma te tuu i te hinaaro o te Atua na mua roa e ma te “rave maite” i te mea ta ˈna i faaue atu.—Gen. 6:22.
4 Eaha te tia ia tuu na mua roa? Ua parau Iesu e: “E ore te taata e ora i te maa anaˈe ra, i te mau [parau atoa râ no roto mai i te vaha o Iehova].” (Mat. 4:4; MN) I te mau hebedoma atoa, te fanaˈo nei tatou i te hoê “tufaa maa [pae varua] i te tufaraa mau ra.” (Luka 12:42) No te apo maitai e no te faahoona mau i te reira, e tia ia tatou ia faanaho i te hoê porotarama taioraa e haapiiraa tamau. Ma te mauruuru i te Atua no teie maa pae varua, eita tatou e amu vitiviti i te reira, mai ia tatou e tamaa vitiviti i roto i te hoê fare tamaaraa maa oti noa. E turai râ to tatou mauruuru ia tatou ia rave i te taime no te haapii e no te au i teie mau maa pae varua.
5 E nehenehe te amu-maitai-raa i te maa pae varua e aratai atu i te ora mure ore ra. (Ioa. 17:3) E tia ïa ia tuu i te reira na mua roa i roto i ta tatou porotarama tamahana. E itehia anei ia tatou te taime e hinaarohia no te taio i te Bibilia i te mau mahana atoa e no te faaineine i te mau putuputuraa Kerisetiano? E. E fanaˈo ïa tatou i te “utua rahi” e tiai maira i te taata e ite e e rave i te hinaaro o te Atua.—Sal. 19:7-11.