A huti mai i te puai no ǒ mai ia Iehova ra
1 Mea rahi te mau tumu e turui ai tatou i nia ia Iehova. E ohipa faauehia te pororaa i te parau apî maitai “e ati noa ˈˈe teie nei ao” o te titau i te itoito. (Mat. 24:14) Te aro tamau nei tatou i to tatou tino tia ore. (Roma 7:21-23) E hau atu â, ‘e [“aroraa,” MN] ta tatou i te mau tavana [hau aˈe i te puai i te taata nei] o teie nei ao pouri.’ (Eph. 6:11, 12) Mea hinaaro mau â na tatou i te tauturu. Nafea tatou e fanaˈo ai i te puai o Iehova?
2 Na roto i te pure: E horoa noa mai Iehova i to ˈna varua moˈa puai na ta ˈna mau tavini e ani atu ia ˈna ra. (Luka 11:13) Te feaa ra anei outou i to outou aravihi no te poro i tera e tera fare, i roto i te mau aroâ aore ra na roto i te ravea o te niuniu paraparau? Te tapeapea ra anei to outou mamahu ia outou ia poro ma te faanaho-ore-hia? Ua haaparuparu anei te tâuˈa ore o te taata o ta outou tuhaa fenua i to outou itoito? E mai te peu e e imihia i te turai ia outou ia faarue i to outou faaroo aore ra to outou taiva ore? A turui atu i nia ia Iehova. A pure no te fanaˈo i te puai.—Phil. 4:13.
3 Na roto i te haapiiraa taitahi: Mai ia tatou e tamaa ra ia puaihia tatou i te pae tino, e haapuai tatou ia tatou i te pae varua na roto i te faatamaa-tamau-raa ia tatou i te Parau a te Atua e te mau papai a “te tavini haapao maitai e te paari.” (Mat. 4:4; 24:45) I to ˈna uiraahia na te aha i horoa ia ˈna i te puai e hinaarohia no te faaoromai i te mau matahiti o ˈna anaˈe i roto i te fare tapearaa i Taina ma te Bibilia ore, ua pahono Stanley Jones e: “E nehenehe ta tatou e mau papu i roto i te faaroo. Mea faufaa mau iho â na mua roa te haapiiraa. Eita te puai no roto mai e noaa aita anaˈe e haapiiraa.”
4 Na roto i te haereraa mai i te mau putuputuraa: I te senekele matamua, i roto i te hoê putuputuraa Kerisetiano, “ua faaitoito” Iuda raua o Sila ‘i te mau taeae na roto i te mau oreroraa parau e rave rahi e ua haapuai ia ratou.’ (Ohi. 15:32, MN) I teie atoa mahana, e faarahi te mea ta tatou e faaroo i te mau putuputuraa i to tatou mauruuru ia Iehova, e patu i to tatou faaroo e e faaaraara ia tatou no te taviniraa. Maoti te mau putuputuraa e amuimui tamau ai tatou i “tei rave atoa mai i te ohipa i te basileia o te Atua nei,” tei riro no tatou ei “haamahanahana.”—Kol. 4:11.
5 I teie “mau tau ati rahi faaruru atâ,” mea hinaaro na tatou i te tauturu. (Tim. 2, 3:1, MN) No nia i te feia e huti mai i te puai no ǒ mai ia Iehova ra, e papu ïa ia tatou e: “E pee ratou i nia mai tei nia i te pererau o te aeto ra; e horo ratou, e e ore e rohirohi; e haere â hoi ratou, e e ore e matapourihia.”—Isa. 40:31.