Pahonoraa i ta outou mau uiraa

◼ Nafea ia faatere i te mau putuputuraa no te pororaa?

Te fa o te putuputuraa no te pororaa, o te tautururaa ïa ia tatou ia haamau i to tatou feruriraa i nia i te ohipa e ravehia i muri iho: te taviniraa. No reira, e tia i te taeae faatere ia ineine maitai e ia nehenehe e horoa i te tahi mea faaitoito, te tano e te au ia faaohipa. Mai te peu e e tuati te irava mahana e te pororaa, e nehenehe ïa e taio i te reira e e tatara poto noa. Na mua roa râ, e tia ia haamau i te putuputuraa i nia i te ohipa e ravehia i taua mahana ra e ia tauturu i te feia atoa o te apiti atu ia ineine maitai aˈe.—Tim. 2, 4:5.

E nehenehe e haamanaˈo atu i te tahi mau manaˈo tauturu o Ta tatou taviniraa i te Basileia ia ite te feia atoa eaha te mau papai e faaite i taua avaˈe ra e nafea ia pûpû atu. I te mahana o te mau vea, e nehenehe e rave i te hoê faahiˈoraa ia au i te tumu parau tarenihia “Nafea ia pûpû i te mau vea.” I roto i te mau ohipa pororaa taa ê, e nehenehe e horoa hoê aore ra e piti omuaraa parau e tano i te tuhaa fenua e vai ra i roto i te buka Haaferuriraa. E nehenehe atoa e aparau i nia i te hoê tuhaa o te taviniraa: nafea ia faaohipa i te Bibilia i tera e tera fare, ia pahono i te hoê patoiraa, ia pûpû atu i te hoê haapiiraa bibilia aore ra ia atuatu i te anaanatae i faaitehia e te hoê taata.

Eiaha te mau putuputuraa no te pororaa, oia atoa te faanahoraa i te mau pǔpǔ, te tuharaa i te mau tuhaa fenua e te pure, ia hau atu i te 10 e tae atu i te 15 minuti. Ia hope te putuputuraa, e tia i te taata taitahi ia ite ihea e na muri ia vai oia e poro ai, e ia haere oioi atu i roto i te tuhaa fenua. No te poto o te putuputuraa, mea faufaa ia tae mai te taatoaraa i te hora tia. E poto roa ˈtu â te putuputuraa no te pororaa mai te peu e e faanahohia te reira i muri aˈe i te hoê putuputuraa a te amuiraa, mai te haapiiraa o Te Pare Tiairaa. E ere ïa i te mea faufaa ia hiˈopoa i te irava mahana, i te mea e ua fanaˈo aˈena tatou i te hoê aparauraa bibilia anaanatae.

I te mau taime atoa, e ani-na-mua-hia i te hoê taeae aravihi ia faatere i te putuputuraa. Mai te peu e aita hoê noa ˈˈe taeae e vata mai i te hoê mahana o te hebedoma, e maiti ïa te mau matahiapo i te mau tuahine o te nehenehe e haapao atu ia tupu noa ˈtu te reira. E nehenehe te tuahine, o te parahi noa, e hiˈopoa e te pǔpǔ i te irava mahana aore ra i te tahi mau manaˈo no nia i te pororaa, ma te haapoto noa i ta ˈna mau tatararaa. Eiaha oia e haamoe i te tapoˈi i to ˈna upoo.

E mau taime maitatai roa te mau putuputuraa no te pororaa no te faaitoito ia tatou e no te faaineine ia apiti atu i roto i te taviniraa. E faufaahia tatou paatoa, mai te peu e e faaineine maitai te taeae faatere ia ˈna.