E haafifiraa anei teie ia ore au e poro?

¹ E oraraa ohipa roa to te rahiraa o te taata. Tei roto atoa tatou, te mau Ite no Iehova, i te feia ohipa roa ˈˈe. Te haapii ra tatou i te Parau a te Atua, te haere ra tatou i te mau putuputuraa a ta tatou amuiraa e te poro ra tatou. Hau atu â, te haa ra tatou i te rave i ta tatou ohipa i roto i te ao, i te mau ohipa fare aore ra te mau ohipa haapiiraa e e rave rahi atu â mau hopoia, e e hinaarohia hoi te taime no tera mau ohipa atoa. Mea fifi iho â râ no te mau upoo utuafare.

² I te mau vahi e rave rau, mea ino roa te mau tupuraa i te pae faanavairaa faufaa, e tia ïa i te mau upoo utuafare ia rave puai i te ohipa e rave rahi hora i te maoro ei imiraa na ratou. Ia pau rahi anaˈe to ratou taime e to ratou puai i roto i ta ratou ohipa, mea iti roa ïa te toe mai no te pororaa. I te mea e e tia ia ratou ia haapao i te mau hinaaro materia o to ratou utuafare, e nehenehe te tahi pae e manaˈo e eita ratou e nehenehe e apiti rahi i roto i te taviniraa. (Tim. 1, 5:8) Parau mau e i teie mahana, te faaruru ra te taata o te hinaaro ia noaa mai te mau mea faufaa o te oraraa i te faaheporaa puai. Teie râ, eiaha ta tatou ohipa i roto i te ao e haafifi ia tatou ia ore tatou e poro i te parau apî maitai. (Mar. 13:10) No reira, mea maitai ia hiˈopoa tatou i to tatou huru tupuraa.

³ I te mea e te taui tamau noa nei teie nei ao, e hinaaro paha te hoê upoo utuafare e horoa rahi i te taime no ta ˈna ohipa no te faaherehere i te moni ta ˈna e faaohipa ia tupu noa mai te tahi mau fifi manaˈo-ore-hia. (Kor. 1, 7:31) Parau mau, ia rave rahi atu â tatou i te ohipa, mea rahi atu â ïa te mau taoˈa materia e noaa mai aore ra e nehenehe tatou e faaanaanatae rahi atu â. Tera râ, e rahi atu â anei to tatou utuafare i te oaoa mai te peu e ua haapaehia te taime i faataahia no te mau ohipa pae varua e te haereraa i te mau putuputuraa no tera mau mea? Papu maitai e e hinaaro tatou e ape i te mau mea atoa o te haafifi i to tatou ea pae varua. E haerea paari ia haapao tatou i te mau aˈoraa a Iesu ‘e haapue i te taoˈa na tatou i nia i te raˈi’ e ‘ia rahi ta tatou taoˈa i te Atua ra.’—Mat. 6:19-21; Luka 12:15-21.

⁴ E imi na mua anaˈe i te mau faufaa a te Basileia: Ua haapii Iesu i ta ˈna mau pǐpǐ ia tuu i te mau ohipa pae varua na mua ˈˈe i te mau mea atoa. Teie ta ˈna i faaue ia ratou: “Eiaha outou e tapitapi noa, a na ô ai ra, Eaha ta matou ia amu? e, Eaha ta matou ia inu? e Eaha to matou ahu ia ahu?” No te aha oia i na reira ˈi i te parau? Ua faataa oia e: “Ua ite hoi to outou Metua i te ao ra, e ia noaa taua mau mea ra ia outou e tia ˈi.” Mai te peu e ua papu roa ia tatou teie parau, eita ïa hoê noa ˈˈe mea e haafifi ia tatou ia ore e rave i ta Iesu i parau i muri iho: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea [materia ta outou e hinaaro] ra ia outou.” Na te Atua e haapao i te reira! (Mat. 6:31-33) E ere roa ˈtu teie i te taime no te faataupupu ma te manaˈonaˈo na mua i te tahi imiraa aore ra i te hoê oraraa fanaˈo i roto i te hoê faanahoraa o te mau mea e fatata i te mou.—Pet. 1, 5:7; Ioa. 1, 2:15-17.

⁵ Na mua, maoti te hoê ohipa i roto i te ao e nehenehe ai tatou e haapao i to tatou mau hinaaro. Eaha râ ta tatou e hinaaro mau? Ua papai te aposetolo Paulo e: “E maa ta tatou, e te ahu, ia mauruuru tatou i te reira.” Te titau rahi atu â ra anei tatou? Mai te peu e e, te faaruru ra paha tatou i te mau faahopearaa i faaitehia e Paulo: “Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore.” (Tim. 1, 6:8, 9; Mat. 6:24; Luka 14:33) Nafea ia ite e te haafifi ra te hinaaro-rahi-roa-raa i te tahi mau mea ia tatou?

⁶ Mai te peu e mea iti ta tatou pororaa no ta tatou mau ohipa i roto i te ao aore ra aita tatou e ite ra i te faufaaraa ia rave i te mau haapaeraa no te parau apî maitai, e tia ïa ia tatou ia hiˈo faahou i ta tatou mau fa matamua. (Heb. 13:15, 16) Ia tapi tatou i te hoê oraraa haehaa aˈe, e faaore aˈena ïa tatou i te hoê tuhaa rahi o te mea e haafifi ra ia tatou ia ore e poro. Mea titauhia ia faaohipa noa tatou i to tatou taime e to tatou puai na mua no te mau faufaa a te Basileia.

⁷ Te ohipa e ere i te mea faufaa ore: Te faaitoito maira te mau parau a Paulo ia tatou ‘ia rahi noâ te rave i te ohipa a te Fatu eiaha e faaea, ua ite hoi tatou e e ere i te mea faufaa ore te ohipa a te Fatu ta tatou e rave na.’ (Kor. 1, 15:58) “Te ohipa” faufaa roa ˈˈe “a te Fatu,” o te pororaa ïa i te Basileia e te faariroraa i te taata ei pǐpǐ. (Mat. 24:14; 28:19, 20) Mai te peu e e hinaaro tatou e apiti hau atu â i roto i te taviniraa, e tia ïa ia tatou ia faataa i te taime no te reira i te hebedoma taitahi e ia ore e faaohipa i tera taime no te tahi atu â mau ohipa. (Eph. 5:15-17) Eita ïa ta tatou ohipa i roto i te ao e te tahi atu â mau mea atoa e riro ei haafifiraa i ta tatou taviniraa.

⁸ Ia imi tatou i te mau ravea atoa no te faaite i te mau parau mau bibilia, e ite tatou i te oaoa rahi e horoa. (Ohi. 20:35) Mai te peu e e tamau tatou i te poro i te Basileia, e nehenehe tatou e hiˈo i te tau no a muri aˈe ma te tiaturi, no te mea “e ere te Atua i te Atua parau-tia ore, a haamoe ai oia i ta [tatou] ohipa i rave, e to [tatou] hinaaro i to ˈna ra iˈoa.”—Heb. 6:10.