E mǎtaˈu anaˈe ia Iehova i te mahana taatoa
1 “O te matamua o te paari ra, oia te mǎtaˈu ia Iehova.” (Sal. 111:10) E turai te reira ia tatou ia rave i te mau ohipa maitatai e e tauturu ia tatou ia fariu ê i te ino. (Mas. 16:6) Taua mǎtaˈu ra, o te hoê ïa faatura hohonu i to tatou Atua Poiete, o te turai ia tatou eiaha e haapeapea aore ra eiaha e faaroo ore ia ˈna. E titauhia tatou ia faahotu e ia faaite i te reira i te mahana taatoa.—Mas. 8:13.
2 I te mau mahana atoa, te faahepo rahi roa ra te huru feruriraa o te ao a Satani ia tatou ia pee atu tatou i ta ˈna mau huru raveraa. (Eph. 6:11, 12) Mea hara to tatou tino tia ore e e hinaaro atu iho â i te mea ino. (Gal. 5:17) No reira, ia auraro tatou i te mau faaueraa a Iehova, ia oaoa e ia fanaˈo i te ora, e tia ia tatou ia mǎtaˈu ia ˈna i te mahana taatoa.—Deut. 10:12, 13.
3 I roto i te Hebera 10:24, 25, te aˈohia ra tatou ia putuputu tatou no te faaitoito “rahi atu â” te tahi i te tahi no te tau ta tatou e ora nei. Mea faufaa te haere-tamau-raa mai i te mau putuputuraa ia hinaaro tatou e ora ˈtu i teie mau mahana hopea. E turai to tatou mǎtaˈu i te haapeapea i te Atua ia putuputu tatou e e tauturu ia tatou ia taa no te aha mea titauhia te mau putuputuraa. Te hiˈo ra te feia e mǎtaˈu ra i te Atua i te apitiraa i roto i te mau putuputuraa Kerisetiano mai te hoê fanaˈoraa taa ê moˈa.
4 Te auraroraa i te faaueraa e poro i te parau apî maitai o te Basileia, e ravea ê atu â ïa no te faaite e te mǎtaˈu ra tatou i te Atua. (Mat. 28:19, 20; Ohi. 10:42) Hoê o ta tatou mau fa matamua ia poro tatou, te tautururaa ïa i to tatou taata-tupu ia faahotu ratou i te mǎtaˈu ia Iehova e ia farii i to ˈna hinaaro. E raea ia tatou te reira na roto i te mau hoˈi-faahou-raa e farerei, na roto i te tutavaraa i te haamata i te mau haapiiraa Bibilia i te mau fare, e i muri iho, na roto i te haapiiraa i te mau faaueraa atoa a te Atua ia vetahi ê. Mea na reira tatou e faaite ai e te mǎtaˈu ra tatou ia Iehova e te here ra tatou i to tatou taata-tupu.—Mat. 22:37-39.
5 Eita te feia o te ore e mǎtaˈu ra i te Atua e haafaufaa noa ˈˈe i te mau mea pae varua e e roohia ratou i te mahu pohe o te ao, oia hoi to ˈna huru feruriraa puai. (Eph. 2:2) Ia faaoti papu tatou e “pûpû i te hoê taviniraa moˈa i te Atua . . . ma te mǎtaˈu i te Atua e te paieti”! (Heb. 12:28, MN) E fanaˈo ïa tatou i te mau haamaitairaa tei faataahia no te feia e mǎtaˈu ia Iehova i te mahana taatoa.