E haapao anaˈe i te anaanatae i faatupuhia e te mau Parau apî o te Basileia n° 36
1 Ua oti anei ia outou i te opere i te mau Parau apî o te Basileia n° 36 tei horoahia na outou? Te ui ra teie api parau i te hoê uiraa e tano no teie tau e tia i te taata atoa ia feruri: “Te mileniuma apî—Eaha ta to a muri aˈe e hopoi mai na outou?” A fatata mai ai te matahiti 2000, ua faatupu te mileniuma apî i te mau huru tiaturiraa atoa. Te faaite ra te mau Parau apî o te Basileia n° 36 i te tahi o taua mau tiaturiraa ra e te haamanaˈo maira e aita te mau huru tupuraa na te ao atoa nei e pûpû ra i te mau tumu e tiaturi ai tatou i te hoê tauiraa. Te mileniuma hoê roa o te haamau i te hau e te panoonoo ore e tapihia ra e te rahiraa o te taata, o te Faatereraa Tausani Matahiti ïa a te Mesia ra o Iesu. Na to tatou tiaturi i te vai-mau-raa o to ˈna Basileia i turai ia tatou ia opere i te mau Parau apî o te Basileia n° 36 i te mau taata atoa ta tatou e farerei.
2 Te mau pahonoraa i te mau Parau apî o te Basileia: Mea faaitoito roa te mau opereraa na mua ˈtu i te mau Parau apî o te Basileia. Ua papai te amaa no Kanada no nia i te mau Parau apî o te Basileia n° 35 e: “Ua rave te feia poro e te mau pionie i taua ohipa taa ê ra ma te aau tae e ua fanaˈo ratou i te mau taime faaitoito e rave rahi.” Eita e ore e ua opere outou i te mau Parau apî o te Basileia n° 36 ma te hoê â aau tae.
3 Ua faataahia e e faaea tatou i te opere i te mau Parau apî o te Basileia i te 17 no Novema 2000. Ua oti anei ia outou i te poro i te tuhaa fenua atoa i faataahia na ta outou amuiraa? Mai te peu e aita, e ani paha te mau matahiapo ia outou e opere â i te reira e hope noa ˈtu ai te avaˈe Novema.
4 E tae mai i teie nei, eaha te huru o te taata o to outou fenua i mua i te mau Parau apî o te Basileia n° 36? E faaî te tahi mau taata i te tuhaa e tâpûhia i te api hopea e e ani ratou i te buka rairai Titau, e peneiaˈe, i te hoê haapiiraa Bibilia. Teie râ, eita paha te rahiraa o te taata tei anaanatae i te tumu parau o te mileniuma e rave i te tahi mea e tae noa ˈtu i te taime e hoˈi ai te hoê Ite no Iehova e hiˈo ia ratou. E hoˈi anaˈe ïa e farerei i te mau taata atoa tei faaite i te anaanatae. Afea? Mea maitai aˈe eiaha e haamarirau.
5 Ua tupu te mau aamu i muri nei i te hoˈiraahia ˈtu e farerei i te mau taata tei rave i te mau Parau apî o te Basileia n° 35. Ua vaiiho te hoê tuahine pionie no Irelane i te hoê na te fatu o te hoê fare tamaaraa. Ua maere roa teie vahine i te poroi e ua ani i te tuahine e hoˈi faahou mai. Ua hoˈi atu te tuahine e piti mahana i muri iho, e ua haamatahia te hoê haapiiraa Bibilia. I Danemata, ua vaiihohia te hoê Parau apî o te Basileia i te hoê fare aita e taata. I taua noâ mahana ra, ua hapono te fatu fare i te tuhaa e tâpûhia i te api hopea i te amaa ra, o tei faatae atu i te amuiraa no taua vahi ra. Hou te hopea hebedoma, ua hoˈi atu e piti tuahine, ua haamatahia te hoê haapiiraa Bibilia e ua haere te vahine i ta ˈna putuputuraa matamua i te Piha a te Basileia.
6 Eaha te parau ia hoˈi atu tatou? E ere i te mea fifi roa ia rave i te mau hoˈi-faahou-raa e farerei i muri aˈe i te vaiihoraa i te mau Parau apî o te Basileia e e tuhaa au maitai tera no ta tatou taviniraa. Mea maitai ia afai i te hoê Parau apî o te Basileia n° 36 i roto i te mau hoˈi-faahou-raa e farerei, no te mea aita faahou paha ta te taata. A tamata ïa i teie mau manaˈo tauturu:
7 I muri aˈe i te haamanaˈoraa ˈtu i te taata o vai outou, e nehenehe outou e parau e:
◼ “Ua vaiiho mai au i te hoê api parau, teie te upoo parau ‘Te mileniuma apî—Eaha ta to a muri aˈe e hopoi mai na outou?’ E ere anei i te mea faaitoito ia taio e e fatata te Faatereraa Tausani Matahiti a Iesu Mesia i te haamata? E mau huru tupuraa paradaiso te vai mai i nia i te fenua! [A faaite i te mau hohoˈa no nia i te Paradaiso i roto i te mau Parau apî o te Basileia n° 36.] I te api hopea, te titauhia ra outou e ani i te buka rairai Eaha ta te Atua e titau ra ia tatou?” E faaite tatou i te buka rairai, e iriti atu i te haapiiraa 5, e taio i te uiraa matamua e te mau paratarapha 1 e 2, e ani atu ai i to ˈna manaˈo. E taio tatou hoê aore ra e piti irava e tauaparau atu ai. Mai te peu e e nehenehe, e hiˈopoa tatou i te tahi atu uiraa e te tahi atu paratarapha, e faataa ˈtu ai i te hoê taime farereiraa no te tamau i te aparauraa.
8 I te mea e o te buka rairai “Titau” aore ra te buka “Ite” te pûpûhia i te avaˈe Novema, e nehenehe outou e parau e:
◼ “I to ˈu haereraa mai aita i maoro aˈenei, ua vaiiho mai au i te hoê api parau, teie te upoo parau ‘Te mileniuma apî—Eaha ta to a muri aˈe e hopoi mai na outou?’ Te pûpû ra oia i te hoê haapiiraa Bibilia tamoni ore i te fare o te taata. Ua hoˈi mai au e faaite ia oe i te buka haapiiraa ta matou e faaohipa nei. [A faaite i te buka rairai Titau e a hiˈo i te api hopea; aore ra te buka Ite e a iriti atu i te mau api 188-189.] E haamau te mileniuma ta te Bibilia e faaite ra i te mau huru tupuraa ta oe e ite ra i nia i teie hohoˈa. No te ora i roto i te Paradaiso, mea titauhia ia noaa mai te ite mau i te Atua. E hinaaro vau e faaite poto noa ˈtu nafea matou e haapii ai i te Bibilia.”
9 Ua faaitoito te opereraa i te mau Parau apî o te Basileia n° 36 ia tatou ia apiti rahi atu â i roto i te taviniraa, o tei horoa ïa i te hoê faaiteraa rahi. Peneiaˈe, ua faatupu te reira i te anaanatae o te mau taata e rave rahi i roto i te tuhaa fenua. Ia tahoê tatou i ta tatou mau tutavaraa no te haapao i taua anaanatae ra, e oaoa ïa tatou i te ite mai i te mau mamoe apî, maoti te tauturu a Iehova.—Mat. 10:11; Ohi. 13:48, 49, 52.