E poro anei outou ma te mǎtaˈu ore?
1 Noa ˈtu e ua haruhia e ua haamǎtaˈuhia raua e te tahi mau taata patoi, ua tamau noa o Petero e o Ioane i te faaite ma te mǎtaˈu ore i te poroi o te Basileia. (Ohi. 4:17, 21, 31) Eaha râ te auraa no tatou i teie mahana e poro ma te mǎtaˈu ore?
2 E poro anaˈe ma te mǎtaˈu ore: O te taˈo “faatoa” te hoê o te mau parau huriaro o te taˈo “mǎtaˈu ore”; teie te auraa “o te ore e mǎtaˈu i te ati . . . Tuutuu ore.” No te mau Kerisetiano, e poro ma te mǎtaˈu ore, o te oreraa ïa e mǎtaˈu i te paraparau i te mau taime atoa e nehenehe ai ratou e faaite i te parau apî maitai. (Ohi. 4:20; Pet. 1, 3:15) Te auraa atoa eiaha e haama i te parau apî maitai. (Sal. 119:46; Roma 1:16; Tim. 2, 1:8) E huru maitai faufaa ïa te mǎtaˈu ore no te rave i ta tatou ohipa i faauehia, e poro i te parau apî maitai o te Basileia i teie tau hopea. E turai te reira ia tatou ia faaite i taua parau apî maitai ra i te mau vahi atoa to reira te taata.—Ohi. 4:29; Kor. 1, 9:23.
3 Te mǎtaˈu ore i te fare haapiiraa: Mea fifi anei no outou ia poro i to outou mau hoa haapiiraa no to outou huru taiâ aore ra mamahu? E ere noa i te mea ohie, e tautooraa mau atoa râ e tia ia faaruru atu. Teie râ, e horoa mai Iehova i te puai na outou ia poro i to outou mau hoa haapiiraa ia pure outou ia ˈna ia horoa mai i te mǎtaˈu ore e hinaarohia. (Sal. 138:3) E tauturu atoa te mǎtaˈu ore ia outou ia faaite e e Ite no Iehova outou e ia faaoromai i te mau faaoooraa. Maoti ta outou pororaa i te fare haapiiraa, e nehenehe te feia e faaroo ia outou e faaorahia.—Tim. 1, 4:16.
4 Te mǎtaˈu ore i ta outou vahi raveraa ohipa: Ua matauhia anei outou ei Ite no Iehova i ta outou vahi raveraa ohipa? E raeahia paha to outou mau hoa ohipa i te parau apî maitai mai te peu noa e e paraparau atu outou. E tauturu atoa te mǎtaˈu ore ia outou ia ani i te tahi hora ohipa ia nehenehe outou e haere i te mau putuputuraa Kerisetiano aore ra te mau mahana faafaaearaa ta outou e hinaaro no te haere atu i te mau tairururaa.
5 Te mǎtaˈu ore i roto i te mau tamataraa: I mua i te patoiraa, mea faufaa ia faaite i te mǎtaˈu ore. (Tes. 1, 2:1, 2) E tauturu te reira ia tatou ia ati maite i to tatou faaroo ia haamǎtaˈuhia mai tatou, ia faaooohia mai aore ra ia hamani-ino-hia mai ma te huna ore. (Phil. 1:27, 28) E horoa mai te reira i te puai no te patoi maite i te mau faaheporaa e ofati i te mau faaueraa tumu a to tatou Atua ra o Iehova, oia atoa râ no te faaea hau noa ia tupu mai te tatamaˈiraa.—Roma 12:18.
6 Noa ˈtu eaha to tatou iho mau fifi, e tamau anaˈe i te poro i te parau apî maitai ma te mǎtaˈu ore.—Eph. 6:18-20.