E tamau noa anaˈe i te poro
1 E hinaaro te Atua “i te [mau huru] taata atoa ia ora, e ia noaa te ite [mau] i te parau mau.” (Tim. 1, 2:4; MN) No reira, ua horoa mai oia i te ohipa e poro i te parau apî maitai na tatou. (Mat. 24:14) Mai te peu e e taa ia tatou no te aha e tia ˈi ia tatou ia tamau noa i te poro, aita hoê aˈe mea e tapea ia tatou, aita atoa te haaparuparuraa, aita atoa te tahi atu haapeapearaa.
2 No te aha e tamau ai? I roto i te ao, no te mau haapeapearaa e no te mau ohipa e rave rahi, e moe i te taata aore ra eita ratou e haapao i te mea ta tatou e parau atu ia ratou. Ia haamanaˈo noa ïa tatou ia ratou i te poroi faaoraraa a te Atua e tia ˈi. (Mat. 24:38, 39) I te tahi aˈe pae, e taui noa te huru tupuraa o te taata taitahi. E nehenehe to te ao iho e taui taue noa mai. (Kor. 1, 7:31) Ananahi, i te hebedoma i mua nei aore ra i te avaˈe i mua nei, e tupu taue mai te tahi atu â mau haapeapearaa aore ra mau fifi apî i nia i te hoê taata ta tatou i poro o te turai hoi ia ˈna ia feruriruri maite i te parau apî maitai ta tatou e faaite atu. Aita anei outou iho i mauruuru e ua tamau maite te Ite o tei faaite ia outou i te parau mau?
3 No te pee i te aroha o te Atua: Ma te faaoromai, te vaiiho ra Iehova e ia mairi te tau hou oia e faatupu ai i te haavaraa i nia i te feia iino. Na roto ia tatou nei, te tamau noa ra oia i te titau manihini i te mau taata parau-tia ia haere mai ia ˈna ra ia faaorahia ratou. (Pet. 2, 3:9) Mai te peu e e faaea tatou i te poro i te poroi î i te aroha a Iehova e te faaara i te taata e e faatupu oia i ta ˈna haavaraa i nia i te feia atoa o te ore e fariu ê mai i to ratou mau haerea iino, e hopoia ïa ta tatou ia pohe ratou. (Ezek. 33:1-11) Noa ˈtu e aita e farii-maitai-noa-hia ra ta tatou pororaa, eiaha roa ˈtu tatou e haaparuparu i ta tatou mau tutavaraa e tauturu i te mau taata haavare ore ia mauruuru i te aroha rahi o te Atua.—Ohi. 20:26, 27; Roma 12:11.
4 No te faaite i to tatou here: Na te Atua ra o Iehova, na roto i te arai o Iesu Mesia, i faaue e ia porohia te parau apî maitai i te fenua atoa nei. (Mat. 28:19, 20) Noa ˈtu e eita te taata e faaroo mai ia tatou, e nehenehe râ tatou e faaite i to tatou taairaa i te Atua e to tatou here ia ˈna ma te tamau i te rave i te mea maitai.—Ioa. 1, 5:3.
5 Ia faaoti ïa tatou e tamau noa i te poro, e e rave anaˈe i te reira ma te itoito, a vai noâ ˈi tatou i roto i te “mahana faaoraraa” a Iehova.—Kor. 2, 6:2.