No te aha e tamau noa ˈi i te poro?
1 Mea maoro anei te poro-noa-raahia te tuhaa fenua a ta outou amuiraa? (Mat. 24:14) Mai te peu e e, e manaˈo paha outou e ua poro-maitai-hia te reira. Ia poro outou, eita paha te rahiraa o te taata ta outou e farerei e tâuˈa i te poroi o te Basileia. Atira noa ˈtu, a tapao na eaha ta te buka Prophétie d’Isaïe II, api 141, e parau ra no nia i te mau pǐpǐ mau a Iesu: “I te tahi mau vahi, mea haihai paha te mau faahopearaa i noaa mai i roto i ta ratou taviniraa ia faaauhia i te rahiraa ohipa e tutavaraa ta ratou e rave ra. Teie râ, te tapea maite noa ra ratou.” No te aha râ e tamau noa ˈi i te poro?
2 A haamanaˈo ia Ieremia: E ere tei te faarooraa mai te taata ia tatou aore ra eita e tamau ai tatou ma te haapao maitai i te poro. Ua poro o Ieremia e 40 matahiti i te maoro i roto i taua noâ tuhaa fenua ra noa ˈtu e mea iti roa tei faaroo ia ˈna e mea rahi hoi tei patoi i ta ˈna poroi. No te aha Ieremia i tamau maite ai? No te mea te rave ra oia i te hoê ohipa ta te Atua i poroi ia ˈna e rave e i te mea e ua ite oia eaha te tupu i muri aˈe, ua tamau noa oia i te poro.—Ier. 1:17; 20:9.
3 Tera atoa to tatou huru tupuraa. Ua ‘poroi Iesu ia tatou e parau haere i te taata, e faaite hua ˈtu e oia tei haapaohia e te Atua ei haava i tei ora e tei pohe ra.’ (Ohi. 10:42) Te poroi ta tatou e faaite, e poroi ïa o te ora aore ra o te pohe no te feia e faaroo atu. E haavahia te taata ia au i to ratou huru i mua i te parau apî maitai. E no reira, e hopoia na tatou te rave-maite-raa i ta te Atua i poroi mai ia tatou e rave. Ia ore atoa te taata e faaroo mai, ua faaite ïa tatou i te hohonuraa o to tatou here ia ratou e to tatou paieti ia Iehova na roto i te tamau-noa-raa i te rave i ta tatou hopoia. E ere râ o te reira anaˈe.
4 E haamaitaihia tatou: E hopoi mai te raveraa i to te Atua hinaaro, aita e hiˈoraa eaha te huru o te taata i roto i te tuhaa fenua, i te hau o roto mai, te mauruuru, e te oaoa, o te ore e noaa mai na roto i te tahi atu ravea. (Sal. 40:8) E auraa e e tumu mau to to tatou oraraa. E rahi atu â tatou i te rave i te taviniraa, e rahi atu â to tatou aau e to tatou feruriraa i te haapao i te tiaturiraa e te oaoa e ora i roto i te ao apî tǎpǔhia e te Atua. Ia tiaturi tatou i tera mau parau tǎpǔ bibilia, e maitaihia ˈtu â to tatou ea pae varua e e papu atu â to tatou mau taairaa e o Iehova.
5 Noa ˈtu e eita tatou e ite i te mau faahopearaa oioi i roto i ta tatou pororaa, eita e ore e ua ueuehia te hoê huero o te parau mau i roto i te aau o te hoê taata e e tupu mai te reira i te taime i faataahia e Iehova. (Ioa. 6:44; Kor. 1, 3:6) Aita hoê aˈe i ite ehia ˈtu â taata o te haapii no nia i te Basileia maoti te mau tutavaraa a te nunaa o Iehova, i ǒ tatou anei aore ra i te ao nei.
6 Mai tei ore i itehia aˈenei, e tia ia tatou ia pee i teie faaueraa a Iesu: “E haapao maitai, e faaitoito, e e pure, aita hoi outou i ite i taua tau ra. E ta ˈu e parau atu ia outou na, o ta ˈu ïa parau i te taata atoa, E faaitoito.” (Mar. 13:33, 37) No reira, ia tamau tatou paatoa i te faaite haere i te parau apî maitai o te Basileia e ia faaoaoa tatou i to Iehova aau na roto i te faaraaraa i to ˈna iˈoa rahi e te moˈa.