“Te mileniuma apî—Eaha ta to a muri aˈe e hopoi mai na outou?”
1 Na te ao atoa nei, te uihia ra teie uiraa. Noa ˈtu e ua haere rahi te huitaata i mua i te roaraa o te mau senekele, te inoino ra te taata, no te mea te ati noa ra ratou i te mau fifi rahi ahia mileniuma i teie nei. (Ioba 14:1; Sal. 90:10) Ihea e itehia ˈi te ravea?
2 I te mau avaˈe Atopa e Novema, e taime maitai taa ê ta tatou no te faaite i te pahonoraa o taua uiraa ra i to tatou taata-tupu. Nafea? Na roto ïa i te opereraa i te mau Parau apî o te Basileia n° 36. Teie te upoo parau o te api parau, “Te mileniuma apî—Eaha ta to a muri aˈe e hopoi mai na outou?” I te afa matamua o te avaˈe Atopa, e pûpû tatou i Te Pare Tiairaa e te A ara mai na! Ia oti, mai te Monire 16 no Atopa ˈtu e i te Mahana pae 17 no Novema, e opere rahi ïa tatou i te mau Parau apî o te Basileia n° 36. I te roaraa o taua ohipa ra, i roto i te hebedoma, e opere iho â tatou i te mau Parau apî o te Basileia n° 36; i te hopea hebedoma, e opere ïa tatou i te reira e te mau vea apî.
3 E rave faahope anei outou i te reira? E hinaaro te mau matahiapo, te mau tavini tauturu e te mau pionie e horoa i te hiˈoraa i roto i taua opereraa ra, i te mea e o ratou to mua i roto i taua ohipa ra. Mea rahi te feia poro tei faanaho ia ratou no te riro ei pionie tauturu i te hoê o taua nau avaˈe ra i reira e ravehia ˈi te opereraa, aore ra i nau avaˈe e piti. E faanaho vetahi ê atu i te apiti rahi aˈe i tei matauhia i roto i te taviniraa.
4 E tano maitai e na te mau taeae faatere i te haapiiraa buka e faaitoito i te melo taitahi o ta ratou pǔpǔ ia rave faahope i te opereraa i te mau Parau apî o te Basileia n° 36. Aita te tahi feia poro e ohipa faahou ra. E haere ïa te mau matahiapo e hiˈo ia ratou no te ite nafea ia tauturu ia ratou. No te aha e ore ai e rave i te tahi mau faanahoraa ia poro te hoê taata poro aravihi e te feia atoa aita e ohipa faahou ra i te roaraa o na avaˈe opereraa? Peneiaˈe, o te faaiteraa ohie i te mau Parau apî o te Basileia n° 36 te ravea e au faahou ai taua feia poro ra i te pororaa.
5 Tera atoa paha te taime no te feia haapii Bibilia tei haere maitai i mua i roto i te haapiiraa i te buka Te ite e o te faaî ra i te mau titauraa no te feia poro bapetizo-ore-hia, ia haere i roto i te taviniraa. E nehenehe atoa te feia apî e rave i taua ohipa ra o te faaitoito.
6 E navai noa te hoê faaiteraa ohie. E nehenehe tatou e parau e:
◼ “Ua rave au i to ˈu taime no te horoa i teie poroi faufaa roa na te mau utuafare atoa no [a horoa i te iˈoa o te oire aore ra o te fenua]. Tera ta oe. Te faaitoito nei au ia oe ia taio i te reira.” Mea maitai aˈe paha eiaha e rave i te pute ia opere tatou i te mau Parau apî o te Basileia n° 36.
7 Te tahi mau putuputuraa no te pororaa faanaho-maitai-hia: E ara te mau matahiapo e ia au maitai te mau faanahoraa i ravehia no te pororaa. E ara iho â râ te tiaau no te taviniraa e ia navai maitai te mau tuhaa fenua no te pororaa na te mau fare e na te mau fare toa, ia rave faahope te feia poro atoa i taua ohipa ra. I te mau vahi atoa e nehenehe, e faanahohia te tahi mau putuputuraa no te pororaa i te mau mahana atoa o te hebedoma, i te hopea hebedoma e i te ahiahi. E nehenehe e faanaho i te tahi mau putuputuraa no te pororaa i te hopea taperaa mahana no te feia haere haapiiraa, te mau rave ohipa ma te tapǔpǔ, e te vai ra ˈtu â.
8 Te feia aita i te fare: Ta tatou fa, e paraparau ïa i te taata e rave rahi roa. Mai te peu e aita e taata i te hoê fare ia haere atu tatou, e tapao tatou i te vahi nohoraa e e hoˈi atu i te tahi atu taime. Mai te peu e aita tatou i farerei i te feia e noho ra i reira i te hebedoma hopea o te opereraa, e vaiiho atu ïa tatou i te hoê Parau apî o te Basileia n° 36 na ratou i te hoê vahi eita te taata e haere na reira e ite atu. E faaue paha te mau matahiapo i te amuiraa e vaiiho atu i te hoê apî parau iti i te mau fare aita e taata i te tere matamua i te mau mataeinaa aore ra mai te peu e mea rahi roa te tuhaa fenua eita e oti i te porohia i te roaraa o te opereraa.
9 E rohi anaˈe! E tutava te mau amuiraa i te poro faahope i ta ratou tuhaa fenua na mua ˈˈe i te hopea o te opereraa, i te 17 no Novema. Mai te peu e e tuhaa fenua rahi ta outou, e nehenehe te tahi feia poro e poro ratou anaˈe, mai te peu e mea ohie ia na reira e aita e fifi. E nehenehe ïa tatou e farerei e rave rahi atu â taata farii maitai. A tapao maitai i te anaanatae o te taata atoa.
10 E feruri te mau matahiapo ehia rahiraa vea hau ta te amuiraa e hinaaro, a ani atu ai. Aita e faufaa ia ani i te mau Parau apî o te Basileia n° 36, no te mea e haponohia ˈtu iho â ta te amuiraa taitahi. E horoahia e 250 api parau e opere na te mau pionie taa ê, tamau, e tauturu taitahi; e 50 na te feia poro. Ua ineine anei outou i te rohi i roto i taua ohipa taa ê ra? Te tiai ru ra anei outou i te reira? E fanaˈoraa taa ê mau â ta tatou e faataa i to tatou taata-tupu atoa eaha ta te Atua i tǎpǔ no te tau a muri aˈe e piri maira!