Eaha te faufaa ia tamau noa?
1 O ta outou paha i aniani i to outou faaineineraa no te hoê mahana pororaa. I te tahi mau vahi, te poro-pinepine-hia nei ta tatou tuhaa fenua, e peneiaˈe ua matau roa te taata ia tatou e te tiahi nei ratou ia tatou. Mea varavara roa te taata e farii maitai mai nei i ta tatou poroi. Te vai nei râ te mau tumu maitatai roa no te tamau noa.
2 A tahi, e titauraa teie na tatou ia haere tamau e poro i te poroi o te Basileia e tae noa ˈtu i te hopea. (Mat. 24:14; 28:19, 20) Ua ani te peropheta ra o Isaia i te Atua e, mai te aha te maoro e tamau noa ˈi oia i te poro. Mea papu maitai te pahonoraa i roto i te Isaia 6:11. Ua parau maira o Iehova ia ˈna ia tamau noa i te afai i te poroi a te Atua i te nunaa. Hoê â huru i teie nei tau. Te titau nei o Iehova e ia tamau noa tatou i te haere e hiˈo i te mau taata o ta tatou tuhaa fenua, noa ˈtu e te manaˈo ra tatou e eita ratou e farii mai. (Ezek. 3:10, 11) E hopoia moˈa teie tei horoahia mai na tatou.—Kor. 1, 9:17.
3 A piti, ua riro te tamau-noa-raa i te poro ei ravea no te faaite i te hohonuraa o to tatou here no Iehova. (Ioa. 1, 5:3) Hau atu, ia feruri anaˈe tatou i te ohipa e fatata roa i te roohia i nia i te huitaata nei, nafea tatou e nehenehe ai e faaea i te faaara i te mau taata, oia hoi to tatou taata-tupu, ma te here? (Tim. 2, 4:2; Iak. 2:8) Mai te peu e e haapao maitai tatou i ta tatou hopoia i mua ia ratou, e faarahi atu ïa tatou i te ravea e nehenehe ai ratou e farii i te poroi ora a te Atua, e eita ta ratou e nehenehe e parau e aita ratou i faaarahia.—Ezek. 5:13.
4 E o vai tei ite? E nehenehe hoi te mafatu o te tahi mau taata e taui. Peneiaˈe no te mea ua taui to ratou huru tupuraa, ua tupu te tahi ati i roto i te utuafare, aore ra no te mau tupuraa o te ao nei, e turaihia ratou ia feruri i te tau i mua nei. Aore ra, i te hoê mahana, i to ratou opani, e parau atu tatou i te tahi mea o te haaputapû ia ratou. (Koh. 9:11; Kor. 1, 7:31) E te taui atoa nei te taata i te vahi faaearaa. Peneiaˈe e farerei tatou i te mau taata tei tae apî mai i roto i ta tatou tuhaa fenua e e farii maitai mai ratou i te parau apî maitai, aore ra te mau taurearea taata paari aita faahou ratou i pihai iho i te metua, e o te uiui nei no nia i te tumu o to ratou oraraa.
5 E tamau noa anei tatou? E, papu maitai! Te horoa maira te mau Papai i te mau tumu maitatai no te haere e no te hoˈi e hiˈo i te taata. I te pae hopea, ia hope anaˈe te ohipa pororaa, e haamaitai mai o Iehova ia tatou no to tatou tutava-noa-raa i roto i te taviniraa e e haamaitai atoa oia i te feia aau mehara o tei farii i te parau apî maitai o te Basileia.—Tim. 1, 4:16.