‘Te hoê parau parauhia i te taime mau ra’
1 Mea fifi anei no outou ia faaite i te parau apî maitai o te ora ia vetahi ê? Te manaˈo ra anei outou e e tia ia parau i te tahi parau hohonu no te faahoruhoru i te mau taata e faaroo ra ia outou? I to Iesu tonoraa i ta ˈna mau pǐpǐ, ua faaue oia ia ratou e: “E poro haere outou, e na ô atu, Te fatata mai nei te basileia o to ao.” (Mat. 10:7) Mea ohie ia faaite i taua poroi ra, e mai te reira noâ i teie mahana.
2 E pinepine e navai noa te tahi mau parau no te haamata i te hoê aparauraa. I to ˈna farereiraa i te eunuka Etiopia, ua ui atu Philipa ia ˈna e: “Te ite na oe i ta oe e taio na?” (Ohi. 8:30) I muri noa iho, ua tupu te hoê aparauraa faufaa roa maoti ‘te hoê parau parauhia i te taime mau ra.’—Mas. 25:11.
3 E nehenehe outou e faaohipa i te hoê omuaraa parau mai te reira i roto i ta outou taviniraa. Nafea? Ma te hiˈopoa e ma te maiti i te tahi mau parau e tano i te tupuraa. A ui i te hoê uiraa e a tiai i te pahonoraa.
4 Te tahi mau uiraa huru au: No te haamata i te hoê aparauraa, e nehenehe outou e parau ei hiˈoraa:
◼ “Te faaohipa ra anei oe i te Pure a te Fatu i roto i ta oe haamoriraa?” (Mat. 6:9, 10) A faahiti atu i te hoê tuhaa, e a parau atu i muri iho e: “Te uiui nei vetahi mau taata o vai taua iˈoa ra o te Atua ta Iesu e hinaaro ra ia faaraahia. Te uiui nei te tahi atu mau taata e: ‘Eaha te basileia ta ˈna i parau e e tia ia tatou ia pure?’ Ua noaa aˈena anei ia oe te hoê pahonoraa i teie mau uiraa ta oe i mauruuru?”
◼ “Ua uiui aˈena anei oe e: ‘Eaha te auraa o te oraraa?’” A faaite e ua taaihia te reira i te ite i te Atua.—Koh. 12:13; Ioa. 17:3.
◼ “E tiaturi anei oe e e ore roa te pohe i te hoê mahana?” A faaohipa i te Isaia 25:8 e te Apokalupo 21:4 no te horoa i te hoê pahonoraa e tiaturihia.
◼ “Te vai ra anei te hoê ravea ohie no te faatitiaifaro i te mau fifi o te ao nei?” A faaite e te haapii maira te Atua ia ‘aroha tatou i to tatou taata-tupu.’—Mat. 22:39.
◼ “E mou anei to tatou paraneta na roto i te ûraa e te hoê paraneta nainai i te hoê mahana?” A taio i te tǎpǔ Bibilia e e vai noa mai te fenua e muri noa ˈtu.—Sal. 104:5.
5 A faaite i te parau apî maitai ma te ravea ohie, ma te tano e ma te mǎrû. E haamaitai mai Iehova i ta outou mau tutavaraa no te faaite i ‘te hoê noa parau’ mau ia vetahi ê.