O vai te nehenehe e farii i te hoê haapiiraa Bibilia?
1 Ua parau te peropheta Amosa e e itehia te oˈe i te fenua Iseraela, “e ere râ i te oˈe maa ore, e te hiaai i te pape, i te faaroo râ i te parau a Iehova.” (Amosa 8:11) Ia fanaˈo te feia e poia ra e e poihâ ra i te pae varua, te opere ra te faanahonahoraa a Iehova e rave rahi roa mau papai niuhia i nia i te Bibilia i te mau vahi atoa o te ao nei.
2 I teie taime, ua nenei tatou e 70 mirioni buka Te ite e e 91 mirioni buka rairai Titau. Mea au na tatou te ohie e te aravihi o taua mau papai ra no te haapii i te parau mau. Teie râ, aitâ e rave rahi taata tei farii i ta tatou mau papai e haapii ra i te Bibilia e o tatou. Eaha ta tatou e nehenehe e rave?
3 E nehenehe e haamatahia te hoê haapiiraa Bibilia maoti te mau papai atoa i vaiihohia: E rave anaˈe i te hiˈoraa o teie taata poro o tei pûpû i te hoê haapiiraa Bibilia i te hoê vahine i te taime matamua to ˈna farereiraa ia ˈna, i mua i to ˈna uputa. Ua farii oioi aˈera oia. I muri aˈe, ua faataa taua vahine ra ia ˈna e: “O oe te taata matamua i pûpû mai i te haapii i te Bibilia.” I roto i ta outou tuhaa fenua, ehia rahiraa taata i rave aˈena i ta tatou mau papai o te nehenehe e parau mai te reira te huru? Te pûpû ra te mau papai atoa i vaiihohia ˈtu i te ravea e faatupu i te mau hoˈi-faahou-raa e farerei e e faatere i te hoê haapiiraa Bibilia i te utuafare iho.
4 I te mea e e farerei pinepine tatou i te mau taata i rave aˈena i ta tatou mau papai, nafea ïa tatou e faaanaanatae ai ia ratou ia faahohonu i te tumu parau? Ua ani roa ˈtu te hoê tuahine i te vahine ta ˈna e tauaparau ra e mau uiraa anei ta ˈna no nia i te Bibilia; teie te pahonoraa ta ˈna i faaroo: “Aita.” Ua onoono aˈera te tuahine e: “Oia, te vai mau ra ta oe.” Tera mau iho â, e ua haamatahia te hoê haapiiraa. No te aha e ore ai e ani i te taata e e hinaaro anei oia e ite i te manaˈo o te Bibilia no nia i te hoê uiraa aore ra te hoê tumu parau ta ˈna e anaanatae ra? Ia ineine ïa outou i te faahiti i te hoê uiraa ta ˈna e anaanatae aita anaˈe to ˈna e manaˈo. E aratai taua mau huru tauaparauraa ra i nia i te hoê haapiiraa Bibilia tamau o te mau parau mau tumu o te Bibilia.
5 E tuhaa faufaa te ohipa haapiiraa Bibilia o ta tatou taviniraa. I te mea e aita tatou i ite o vai te nehenehe e farii i te hoê haapiiraa Bibilia, eiaha ïa tatou e haamarirau i te pûpû hoê i te taata atoa ta tatou e farerei. E paraparau anaˈe ia Iehova i roto i ta tatou mau pure e e ohipa anaˈe ia au i te reira. E nehenehe paha, i mua nei, te hoê taata ta tatou i pûpû atu e farii i te haapii i te Bibilia!—Ioa. 1, 5:14, 15.