E faatura anaˈe i te iˈoa hanahana o Iehova
1 Ua faaino o Satani i te iˈoa o te Atua i to ˈna turairaa i to tatou mau metua matamua ia hara. Ua pari te Diabolo e ua haavare Iehova ia Adamu. (Gen. 3:1-5) I te mea e ua taaihia te iˈoa o te Atua i to ˈna mana no te faatupu i ta ˈna parau, ua riro te parau a Satani ei haavare rahi mau. Ma te faatupu mǎrû noa i ta ˈna opuaraa, ua tamâ o Iehova i to ˈna iˈoa i te mau faainoraa atoa e ua faahanahana ˈtu oia.—Isa. 63:12-14.
2 E nunaa tatou “i mairihia” e Iehova ‘i to ˈna ra iˈoa.’ (Ohi. 15:14, 17) E ravea te reira e faaite ai tatou i to tatou mau manaˈo hohonu no nia i te haamoˈaraa i taua iˈoa ra. E mea hanahana mau te iˈoa o Iehova no tatou no te mea e faahohoˈa te reira i te mau mea maitai, te au, te aroha e te tia. E faaî te hanahanaraa o teie nei iˈoa teitei ia tatou i te mǎtaˈu faatura. (Sal. 8:1; 99:3; 148:13) Eaha ïa ta te reira e turai ia tatou ia rave?
3 E haamoˈa anaˈe i te iˈoa o te Atua: Eita te iˈoa o te Atua e nehenehe e haamoˈa-faahou-hia ˈtu â, maoti râ to tatou haerea viivii ore e to tatou apitiraa i roto i te pororaa i te Basileia, te faahanahana ra tatou i te iˈoa o te Atua. E pii hua tatou e: “Haamaitai outou ia Iehova; e tiaoro atu i to ˈna iˈoa; e faaite i te taata i ta ˈna mau ravea puai; e faaite outou i te teitei o to ˈna ra iˈoa.” (Isa. 12:4) Nafea tatou e nehenehe ai e faaohipa i te reira?
4 E nehenehe tatou e faaohipa i te mau ravea atoa no te poro i te iˈoa o Iehova e te mau mea atoa ta te reira e faahohoˈa. E pororaa faanahohia anei aore ra eita, i tera fare e tera fare anei aore ra i tera fare toa e tera fare toa, i roto i te aroâ anei aore ra na roto i te niuniu paraparau, e faahanahana te reira ïa Iehova. Ia anaanatae te mau taata i ta tatou poroi, e tia ia faanaho maite tatou i te hoê taime taa ê no te hoˈi faahou e farerei e no te haapii hau atu â ia ratou no nia ia Iehova. E faatura maite ïa tatou i taua mau faanahoraa ra e e tutava tamau tatou no te haamata i te mau haapiiraa Bibilia. Te oaoa nei tatou i te iteraa ˈtu i te mau matahiti taitahi e rave rahi mau hanere tausani taata ia haapii, ia faatura e ia faaraa i te iˈoa hanahana o Iehova.
5 Ia apiti tatou i roto i te ohipa haamoˈaraa i te iˈoa o te Atua ma te mafatu taatoa, te faaite maite ra tatou i to tatou tiaraa no nia i te tumu parau i faahitihia e Satani i roto i te ô i Edene. O te ohipa faahiahia e te hanahana roa ˈˈe ta tatou e nehenehe e rave. No reira, e faatura anaˈe i te iˈoa hanahana o Iehova e e arue anaˈe ia ˈna ma te itoito.—Par. 1, 29:13.