E patu anaˈe tatou te tahi i te tahi ma te pahono i te mau putuputuraa
1 Te faaitoito nei te Hebera 10:24 ia tatou ia ‘faaaraara ˈtu te tahi i te tahi ia rahi te aroha, e ia rave i te mau ohipa maitatai.’ Te auraa ra e tia ia tatou ia patu tatou te tahi i te tahi ma te horoa i te mau pahonoraa feruri-maitai-hia i te mau putuputuraa a ta tatou amuiraa. No te aha e tia ia tatou ia pahono? Nafea ia pahono? O vai te faufaahia?
2 A feruri na i te rahiraa o te mau taime i reira tatou i faufaahia ˈi i to tatou faarooraa i te mau pahonoraa ohie e te maramarama o te haamaitai i to tatou taa-maitai-raa e o te faaitoito ia tatou i te pae varua. Te vai ra ia tatou te haamaitairaa ia na reira atoa no vetahi ê. Ia pahono tatou, te faaite ra ïa tatou i to tatou hinaaro ia “tuu atu [“i te tahi ô pae varua,” MN]” o te faaitoito i te taatoaraa o te feia i putuputu mai.—Roma 1:11, 12.
3 Nafea ia horoa i te mau pahonoraa maitatai: E haapae anaˈe i te mau pahonoraa roroa o te haapoto mai i te mau manaˈo atoa o te hoê paratarapha. I te rahiraa o te taime, aita roa ˈtu te reira e pahono maitai ra i te uiraa e e ore roa te anaanatae o vetahi ê no te pahono. E tia i te pahonoraa matamua i te hoê paratarapha ia vai poto noa e ia pahono tia ˈtu i te uiraa. E nehenehe to muri iho e faaite nafea e faaohipa i te reira aore ra e faaite i te tuatiraa e te mau irava. Hiˈo te Buka no te Haapiiraa, api 90-92.
4 Mai te peu e e taiâ tatou i te manaˈo-noa-raa e pahono, e faaineine anaˈe ïa i te hoê pahonoraa poto noa e e ani anaˈe i te taeae o te faatere ra i te putuputuraa ia ui mai ia tatou i te paratarapha maitihia. Ia na ô anaˈe tatou e rave rahi taime, e ohie roa no tatou i te pahono. E haamanaˈo anaˈe e ua feaa te manaˈo o Mose e o Ieremia no nia iho i to raua neheneheraa e paraparau i mua i te taata. (Exo. 4:10; Ier. 1:6, nota, MN) Tera râ, ua tauturu o Iehova ia raua i te paraparau i to ˈna ra iˈoa, e e tauturu atoa o ˈna ia tatou.
5 O vai te faufaahia e ta tatou mau pahonoraa? O tatou te matamua te faufaahia, inaha maoti ta tatou mau pahonoraa e mau maite te parau mau i roto i to tatou feruriraa e to tatou mafatu, o te tauturu ïa ia tatou ia haamanaˈo i muri iho. Hau atu â i te reira, e faufaa-atoa-hia vetahi ê i ta tatou mau pahonoraa maitatai. Oia mau, e faaitoitohia tatou ia haapapu anaˈe tatou paatoa i to tatou faaroo i te mau putuputuraa a te amuiraa noa ˈtu e mea aravihi, aore ra mea taurearea, mamahu aore ra mea apî tatou.
6 E ite papu tatou e e riro “te hoê parau i parauhia i te taime au ra, auê ïa i te maitai rahi e” ia faahitihia te reira no te faaitoito te tahi i te tahi i roto i te mau putuputuraa!—Mas. 15:23, MN.