E tia ia ratou ia ‘farii maite i te parau ma te mafatu taatoa’!
1 E rave rahi mirioni taata o te haapii ra i te Bibilia e te mau Ite no Iehova. Mai te peu e te hinaaro ra ratou e fanaˈo i te ora mure ore, e tia ia ratou ia ‘farii maite i te parau [“ma te mafatu taatoa,” MN],’ mai teie 3 000 taata o tei tatarahapa e o tei bapetizo ia ratou i te mahana Penetekose, i te matahiti 33 T.T. (Ohi. 2:41) Eaha te hopoia e titauhia ia tatou ia amo i teie mahana?
2 E tia ia tatou ia tauturu i te feia o te haapii ra i te Bibilia e o tatou ia ati maite ia Iehova. (Tim. 1, 4:7-10) No te na reiraraa, teie ta te api hau o Te taviniraa o te Basileia no Tiunu 1996 e parau ra i te paratarapha 20: “I te roaraa o te haapiiraa, a imi i te mau taime no te turai [i te taata haapii] ia faaite i to ˈna mauruuru no Iehova no to ˈna mau huru maitatai. A faaite i to outou mau manaˈo hohonu no te Atua. A tauturu i te taata haapii ia feruri i nia i te ravea e nehenehe ai oia e faatupu i te mau taairaa piri e te mahanahana e o Iehova.”
3 Te fifi o ta tatou e farerei nei: E rave rahi taata, arataihia e te haapaoraa hape, o te au ra i te hoê haamoriraa o te ore e titau rahi roa i te taime e te tutavaraa, o te ore e titau i te tahi mau tauiraa papu i roto i to ratou oraraa. (Tim. 2, 3:5) Te fifi no tatou, o te tautururaa ïa i te feia e haapii ra i te Bibilia e o tatou ia taa e e titau te haamoriraa mau ia ratou ia riro hau atu ei feia faaroo tariˈa noa i te parau a te Atua. E tia ia ratou ia faaohipa i te mea o ta ratou e haapii ra i roto i to ratou oraraa. (Iak. 1:22-25) Mai te peu e te vai ra te tahi ohipa i roto i to ratou haerea o ta te Atua e ore e au, mea titauhia ratou ia ite e e tia ia ratou ia “fariu mai” e ia rave i te mea tia no te faaoaoa ia ˈna. (Ohi. 3:19) No te fanaˈo i te ora mure ore, e tia ia ratou ia “faaitoito hua” e ia tia papu i te pae o te parau mau.—Luka 13:24, 25.
4 Ia tuatapapa anaˈe tatou i te mau tuhaa taa ê o te huru morare, e ani tatou i te taata o te haapii ra i te Bibilia e o tatou eaha to ˈna manaˈo mau no nia i te reira e te mea e tia ia ˈna ia rave mai te peu e e ite o ˈna i te faufaaraa ia faatupu i te tahi mau tauiraa i roto i to ˈna oraraa. E aratai anaˈe ia ˈna i te faanahonahoraa o te haapii ra ia ˈna i te parau mau e e faaitoito anaˈe ia ˈna ia apiti i te mau putuputuraa atoa.—Heb. 10:25.
5 E haamau anaˈe i te fa e haapii ma te haaputapû i te mafatu o te feia haapii. E ite ïa tatou i te oaoa ma te turai i te feia haapii apî ia farii maite i te parau a te Atua ma te mafatu taatoa e ia bapetizo ia ratou.—Tes. 1, 2:13.