Pahonoraa i ta outou mau uiraa

◼ Nafea ia haamaitai i ta tatou mau pahonoraa i te mau putuputuraa?

Te tiai ru nei tatou i te taime tatou e ruru ai i te mau putuputuraa o ta te amuiraa e faatupu nei i te mau hebedoma atoa. E nehenehe ïa tatou e faaite i to tatou faaroo e e faaitoito ia vetahi ê na roto i ta tatou mau pahonoraa (Mas. 20:15; Heb. 10:23, 24). E tia ia tatou ia faariro i te reira mai te hoê haamaitairaa taa ê e ia tutava i te tamau i te na reira. Nafea tatou e nehenehe ai e haamaitai i ta tatou apitiraa?

Na mua roa, ia faaineine tatou ia tatou. E mea faufaa ia taio tatou i te mau tumu parau na mua e ia feruri i nia iho. E tutava tatou i te taa i te auraa o te mau manaˈo hohorahia. Noa ˈtu e ua tuatapapa-aˈena-hia paha te tumu parau na mua ˈˈe, e imi anaˈe i te mau manaˈo apî aore ra te mau manaˈo o te haapapuhia ra. E tapea noa tatou i roto i te feruriraa i te upoo parau o te tumu parau tuatapapahia. Ia faaineine anaˈe tatou i te mau pahonoraa i roto i te hoê buka o te horoa ra i te hoê haapiiraa hohonu no nia i te hoê buka o te Bibilia, mai te buka ra Apokalupo: tatararaa hopea, e tamata tatou i te taa eaha te taairaa i roto i te hoê irava i te tahi atu. Mai te peu e e faaohipa tatou i teie mau manaˈo, e rahi to tatou aravihi no te feruri. E tauturu ïa te reira ia tatou ia faaineine i te mau pahonoraa maitatai e e ite i te oaoa no ta tatou faaineineraa.

Te mau pahonoraa faahiahia roa ˈˈe e mea poto ïa, faahitihia ma te ohie e no roto mai i te buka e haapiihia ra. E tia ïa i te taata matamua e paraparau ia pahono roa ˈtu i te uiraa, ma te vaiiho ia vetahi ê te ravea no te faaoti roa i te pahonoraa. A haapae i te mau pahonoraa roroa e aita e tuati ra, o te rave rahi roa i te taime e o te haapeapea ia vetahi ê ia apiti mai. Maoti râ i te taio i ta tatou mau pahonoraa mai tei papaihia i roto i te buka, a faaohipa i ta tatou iho mau parau. E faaô mai te mau pahonoraa hau i te mau manaˈo no roto mai i te mau irava faahitihia. E faaroo maitai tatou i ta vetahi ê e parau ra no te ape i te faahiti faahou ma te faufaa ore.

E mea maitai iho â ïa ia amo i te rima e rave rahi taime, eiaha râ i te mau paratarapha atoa. Te faaitoito nei matou i te mau taurearea ia apiti atoa mai. Mai te peu e te haamarirau nei outou i te pahono, e nehenehe outou e faaite i te taeae aratai i te haapiiraa i teihea paratarapha outou e hinaaro ai e pahono, e mea papu e faatia o ˈna ia outou ia pahono.

E tia ia tatou paatoa ia tutava ma te aau rotahi i te parau i te tahi manaˈo ia titauhia te feia i putuputu mai ia apiti mai. E haamanaˈo tatou e ua taaihia te manuïaraa o te mau putuputuraa, i roto i te hoê faito rahi, i nia i to tatou hinaaro e horoa i te mau pahonoraa e to ratou huru maitai.—Sal. 26:12.