E haapii anaˈe i te haamatau i to tatou mau taeae
1 Ia au i te Bibilia, e ati-maite-aˈe-hia te hoê hoa mau i te hoê taeae; e vai tamau noa to ˈna auhoaraa e to ˈna haapao maitai, e e tauturu oia i to ˈna hoa i roto i te ati. (Mas. 17:17; 18:24) Eita tatou e erehia i taua mau hoa ra i roto i te amuiraa mai te peu e e tutava tatou i te haapii i te haamatau ia tatou iho e i te here tatou iho i te tahi e te tahi.—Ioa. 13:35.
2 Te vai nei i mua ia tatou te mau taime maitatai e matau maitai aˈe ai tatou i to tatou mau taeae na mua ˈˈe e i muri aˈe i te mau putuputuraa. No te aha e ore ai e tae oioi mai e e faaea rii mai i muri aˈe no te fanaˈo i te hoê amuimuiraa mahanahana e te putapû mau? E haafatata anaˈe i te mau taeae huru rau no te tauaparau atu e o ratou, te feia ruhiruhia iho â râ, ua noaa ia ratou te paari, te mau taurearea aore ra te tahi atu â e mea mamahu ratou.
3 E haamata anaˈe i te tauaparauraa: Eita tatou e faaea noa i nia i te aroha-noa-raa ˈtu. E nehenehe tatou e haamata i te hoê tauaparauraa ma te faahiti i te hoê tupuraa i roto i te pororaa, te hoê manaˈo anaanatae i roto i te hoê vea apî aore ra no nia i te putuputuraa tei faaoti noa ˈtura. E haapii rahi mai tatou no nia i to tatou mau taeae ia ite tatou i te faaroo ia ratou, ia faaitoito atu tatou ia ratou ia faatia i te oraraa o ta ratou i faaruru e ia faahiti i te mau mea o ta ratou i haapii. E nehenehe te ani-noa-raa ˈtu i te hoê taata e mea nafea to ˈna iteraa ia Iehova e faaite mai ia tatou e rave rahi mau mea. Ua faaruru na vetahi i te mau fifi o tei haapuai i to ratou faaroo, area te tahi pae ra te faaruru nei ïa i teie taime i te mau tupuraa e eita e manaˈohia e te rahiraa. Ma te ite i te reira, e ohipa ïa tatou mai te mau hoa mau o te haapao i te mau hinaaro o vetahi ê e o te haamâha ˈtu.
4 E haafaufaa anaˈe te tahi i te tahi: I muri aˈe i te poheraa o ta ˈna tamahine apî, mea fifi roa na te hoê vahine Kerisetiano ia himene i te mau himene o te Basileia no nia i te tia-faahou-raa. Te haamanaˈo ra oia e: “I te hoê mahana, ua ite mai te hoê tuahine o te parahi ra i te tahi aˈe pae ia ˈu i te taˈiraa. Ua haere mai oia i pihai iho ia ˈu, ua tauahi mai ia ˈu e ua himene mâua i te toea o te himene. Ua î-roa-hia vau i te here no te mau taeae e te mau tuahine e ua oaoa roa vau e ua haere mai matou i te putuputuraa, no te mea ua taa ia ˈu e tei ǒ nei, i te Piha no te Basileia tatou e fanaˈo ai i te tauturu.” E tia ia tatou ia haafaufaa i to tatou mau taeae e mau tuahine ma te afai atu i te tamahanahanaraa ia hinaaro ratou e te mau faaitoitoraa i te mau taime atoa.—Heb. 10:24, 25.
5 I te mea e te ino noa ˈtura teie nei ao, e tutava anaˈe i te haapii i te haamatau maitai aˈe i to tatou mau taeae. E riro ïa te faaitoitoraa i te tahi e te tahi ma te aau rotahi ei haamaitairaa no tatou paatoa.—Roma 1:11, 12.