Ia matau maitai tatou i to tatou mau hoa
1 Aita to tatou mau taairaa e to tatou mau hoa kerisetiano i taotiahia i te haere-noa-raa i te mau putuputuraa e o ratou. Te ohipa nei tatou ia au i te hinaaro o te Atua, ia nehenehe tatou e faatupu i te mau taairaa pae varua e o Iesu (Mareko 3:34, 35). Teie râ, te faatupu nei tatou, i roto i te amuiraa kerisetiano, i te mau taairaa fetii e to tatou mau taeae e mau tuahine pae varua o te tia ia tatou ia here (Ioane 13:35). No reira, e tia i te feia e apiti atu i te mau ‘melo o te fare o te Atua’ ia tutava i te haamatau maitai ia ratou iho.—Eph. 2:19.
2 Ia matau tatou i to tatou mau hoa na roto i to ratou iˈoa: Ua ite anei tatou i te iˈoa o te taeae e te tuahine tataitahi o ta tatou haapiiraa buka? I roto i te rahiraa o te tupuraa, e mea iti roa te pǔpǔ, e nehenehe ïa e mau ohie noa ia tatou te iˈoa o te rahiraa o te feia e putuputu mai, aore ra o te taatoaraa. Mai te peu e aita tatou i ite i to ratou iˈoa, e nehenehe anei tatou e parau e ua matau maitai tatou i to tatou mau hoa?
3 E no vetahi ê ïa, te mau tamarii atoa, o te haere mai ra i te mau putuputuraa i te Piha no te Basileia? E nehenehe tatou e haamatau i te tahi noa mau hoa. Noa ˈtu e e ere i te mea ino ia oaoa i te amuimui tamau i te tahi noa, eiaha râ tatou e taotia noa i ta tatou mau faaiteraa here, e te mau tauaparauraa faaitoito i te tahi noa mau taata. E tia ia tatou ia ‘haamahora’, ma te rave i te mau tutavaraa no te haamatau maitai i to tatou mau taeae e mau tuahine atoa (Kor. 2, 6:11-13). E tia iho â ïa ia tatou ia matau ia ratou na roto i to ratou iˈoa.
4 E tia i te mau taeae e aratai ra i te mau putuputuraa o te amuiraa ia tutava i te ite i te iˈoa o te taata tataitahi. Mai te peu e e piihia mai na mua i te taata tataitahi na roto i to ˈna iˈoa, e manaˈo oia e e te haafaufaahia ra ta ˈna pahonoraa. E tauturu atoa ïa te reira i te amuiraa ia ite i te iˈoa o vetahi ê. E parau mau, e haere noa mai iho â te feia apî aore ra te feia mataitai i te putuputuraa, e mea fifi ia ite i te taatoaraa o te mau iˈoa. Tera râ, na roto i te raveraa i te mau tutavaraa tuutuu ore, e faaitoito tatou i to tatou mau hoa e e faaite tatou i nia ia ratou i te hoê anaanatae rotahi.—Roma 1:11, 12.
5 Ia rave tatou i te faaotiraa e haamatau maitai ia tatou: I roto i te rahiraa o te tupuraa, e mea matau maitai i te mau tiaau ratere e rave rahi mau taeae e tuahine. Nafea ratou i te raveraa? E toru ravea taa ê: 1) te apiti tamau nei ratou i roto i te pororaa e o ratou; 2) ia au i ta ratou e nehenehe, te farii nei ratou i te mau titau-manihini-raa a te mau taeae e mau tuahine; e 3) te rave nei ratou i te faaotiraa e aroha i te feia paari e te mau tamarii atoa i te mau putuputuraa.
6 E nehenehe anei tatou i roto i te hoê huru aore ra i te tahi e haamahora i ta tatou mau amuimuiraa e e haapii i te haamatau maitai aˈe i to tatou mau hoa? E nehenehe tatou e ani ia ratou e apee mai ia tatou i roto i te pororaa. Te pororaa i tera e tera fare, te mau hoˈi-faahou-raa e farerei, te mau haapiiraa bibilia, e mau ravea faahiahia anaˈe teie no te haamatau atu â. I te tahi taime, e mea maitai atoa ia titau manihini ia vetahi ê i te fare, no te tamaa paha aore ra no te hoê amuamuraa noa. Ia tutava tatou i te anaanatae i te feia apî aore ra i te feia mamahu, e nehenehe ïa tatou e faaitoito rahi ia ratou i te pae varua, e noaa atoa râ ia tatou i te mau haamaitairaa rahi.—Ohipa 20:35; Tes. 1, 5:11.
7 Ua matau maitai ia Paulo to ˈna mau hoa. Na roto i te faahitiraa e rave rahi o ratou na roto i to ratou iˈoa i roto i ta ˈna mau rata, te haapapu ra te reira i to ˈna anaanatae e te here rotahi ta ˈna e faaite ra no ratou (Tes. 1, 2:17; Tim. 2, 4:19, 20). E haamaitaihia mai tatou pauroa no ta tatou mau tutavaraa e haamatau maitai aˈe i to tatou mau hoa.