E nehenehe tatou e rave i te mau ohipa rahi atu â
1 Te tuhaa rahi o te taviniraa a Iesu o te mau ohipa maere mau ïa. Ua faaamu semeio oia e mau tausani taata, ua faaora oia e rave rahi o ratou e ua faahoˈi mai oia i vetahi i te ora. (Mat. 8:1-17; 14:14-21; Ioa. 11:38-44) Ua huti ta ˈna ohipa i te ara-maite-raa o te hoê nunaa taatoa. Tera râ, na mua iti noa ˈˈe i to ˈna poheraa, ua parau oia i ta ˈna mau pǐpǐ haapao maitai e: “O te faaroo mai ia ˈu ra e rave atoa oia i teie nei mau ohipa ta ˈu e rave nei, e e rahi atu â ta ˈna e rave i teie.” (Ioa. 14:12) Nafea tatou e nehenehe ai e rave i te mau ohipa “rahi atu â”?
2 Ma te poro e rave rahi atu â tuhaa fenua: Ua taotiahia te tuhaa o te ohipa a Iesu i Paletetina; ua parau râ oia i ta ˈna mau pǐpǐ matamua ia riro mai ei Ite “e tae noa ˈtu i te hopea o te fenua ra,” oia hoi te auraa te vahi atea aˈe i te vahi i reira o ˈna iho i te pororaa. (Ohi. 1:8) Te ravehia ra te ohipa pororaa ta ˈna i haamata mai na te ao atoa nei, i roto e 232 fenua. (Mat. 24:14) Te apiti taatoa ra anei tatou ma te poro i te tuhaa fenua a ta tatou amuiraa?
3 Ma te poro i e rave rahi atu â mau taata: Mea iti roa te mau pǐpǐ i horoahia e Iesu te ohipa pororaa. I te matahiti 33 T.T. râ, i te mahana o te Penetekose, maoti ta ratou pororaa ieie, ua farii tau toru tausani nephe i te parau mau e ua bapetizohia ratou. (Ohi. 2:1-11, 37-41) Te haaputuputu-noa-hia nei te feia “[“aau farii maitai,” MN] no te ora mure ore ra” i to tatou anotau i reira, i nia i te hoê faito au noa 1 000 taata tei bapetizohia i te mau mahana atoa. (Ohi. 13:48) Te tutava mau ra anei tatou i te poro i te feia aau rotahi i te mau vahi atoa tei reira ratou e i te atuatu oioi i to ratou anaanatae?
4 Ma te poro maoro atu â: E toru matahiti e te afa noa te roaraa o te taviniraa a Iesu i nia i te fenua nei. Mea maoro aˈe te rahiraa o tatou i te pororaa i te reira. Noa ˈtu e e faatiahia e ia tamau maoro â tatou aore ra eita, te faaite nei tatou i to tatou mauruuru i te tauturu i te mau pǐpǐ apî atoa ia rave i te eˈa e aratai i te ora. (Mat. 7:14) Mea rahi anei ta tatou e rave i roto i te ohipa a te Fatu i te mau avaˈe atoa?—Kor. 1, 15:58.
5 Ei mau pǐpǐ mau na Iesu, e nehenehe tatou e tiaturi e ma te tauturuhia mai e ana e tamau â tatou i te rave i te mau ohipa rahi atu â.—Mat. 28:19, 20.