Te mau tiaau o te aratai nei ia tatou: te tiaau peretiteni
1 E hopoia teimaha mau i te riroraa ei tiaau i roto i te amuiraa. (Ohi. 20:28; Tim. 1, 3:1) E tuhaa matamua teie no te hoê anairaa tumu parau o te faaite mai i te mau hopoia huru rau a te mau matahiapo, ia nehenehe tatou e ite i te ohipa faufaa e ravehia ra e ratou no tatou.
2 E nomino te Taiete i te tiaau peretiteni no te hoê roaraa taotia-ore-hia. E faatere oia i te mau ohipa, o te tauturu i te mau matahiapo atoa ia haafaufaa i te mau hopoia i horoahia na ratou. (Notre ministère, api 41-42) Eaha ïa to ˈna auraa?
3 E faataehia te rata a te amuiraa i te tiaau peretiteni ra e e horoa oioi atu oia i te taeae papai parau ia hiˈopoa o ˈna. Ia faaineine anaˈe te tiaau peretiteni i te mau putuputuraa a te mau matahiapo, e titau oia i te mau manaˈo o te tahi atu mau matahiapo no nia i te mau tumu parau te tia ia tuatapapahia e e faanaho oia i te tabula ohipa. E na te tiaau peretiteni atoa e faatere i te mau putuputuraa a te mau matahiapo. Mai te peu e ua ravehia te mau faaotiraa, e ara oia e ia faaturahia te reira. Na ˈna e haapao i te faaineineraa i te putuputuraa no te taviniraa e te porotarama no te mau oreroraa parau huiraatira. E horoa oia i te parau faatia no te mau parau faaara atoa o te faaitehia i mua i te amuiraa, e faatia i te aufauraa o te mau haamâuˈaraa matauhia e e ara oia e ia ravehia te hiˈopoaraa o te tabula faufaa moni i te mau toru avaˈe atoa.
4 E peretiteni teie taeae no te tomite no te taviniraa e e faatere oia i te ohipa. Ia ani anaˈe te hoê taata o te haapii ra i te Bibilia ia riro mai ei taata poro bapetizo-ore-hia aore ra ia hinaaro te hoê taata poro ia bapetizohia, e rave te tiaau peretiteni i te mau faanahoraa ia nehenehe te mau matahiapo ia putuputu mai e o ˈna. Na te tiaau peretiteni atoa e faanaho i te tere farereiraa a te tiaau haaati ia nehenehe te amuiraa e fanaˈo i taua hebedoma ohiparaa taa ê ra.
5 E rave rau mau hopoia taa ê ta te tiaau peretiteni. A amo noa ˈi oia “ma te haapao maitai” e te haehaa i te reira, e nehenehe tatou tataitahi e rave i ta ˈna tuhaa ma te rave amui i te ohipa e te mau matahiapo. (Roma 12:8) Mai te peu e e “faaroo” e e “auraro” tatou i te feia o te aratai ra ia tatou, e rahi atu â ïa to ratou oaoa ia rave ratou i ta ratou ohipa.—Heb. 13:17.