E horoa anaˈe i te faaiteraa na roto i te hoê haerea maitai
1 I roto i te totaiete o te faatia noa nei i te mau mea atoa i teie nei mahana, te faaino nei e rave rahi taurearea tâuˈa ore i to ratou oraraa i te raau taero, te peu taiata, te orure-hau-raa e te haavîraa uˈana. Teie râ, mea oaoa roa ia hiˈo atu i te haerea maitai o te mau taurearea oraora i roto i te amuiraa kerisetiano e papu maitai e mea nehenehe te reira i mua i te aro o Iehova. E horoa te reira i te hoê faaiteraa puai mau o te nehenehe e huti mai i te tahi mau taata i te parau mau.—Pet. 1, 2:12.
2 E rave rahi mau tupuraa e faaite mai ra e ua horoa te haerea faahiahia o te mau taurearea kerisetiano i te hiˈoraa maitai i nia i te feia hiˈopoa. Ma te faahiti i te hoê o ta ˈna mau tamarii haapii Ite no Iehova, ua parau te hoê vahine haapii tamarii i mua i te taatoaraa e te Atua o taua tamahine ra, o Iehova, e Atua mau oia. E no te mea ua faaite noa taua tamahine ra i te hoê haerea faatura. Ua papai te tahi atu orometua haapii i te Taiete: “Te hinaaro nei au e haapopou ia outou no te mau taurearea hiˈoraa maitai roa i roto i ta outou haapaoraa. . . . E hiˈoraa faahiahia mau â to ta outou mau taurearea. Te faatura nei ratou i tei paari aˈe ia ratou e te ite hoi i te peu e e mea tura to ratou faaahuraa. Hau atu, ua ite papu ratou i te mau mea i papaihia i roto i te Bibilia! Tera te haapaoraa!”
3 Ua putapû roa te hoê vahine haapii tamarii i te haerea maitai o te hoê o ta ˈna mau tamarii haapii, e tamaroa Ite e hitu matahiti to ˈna. Ua hutihia oia e te huru mǎrû e te au o taua tamarii ra, o tei taa ê roa i te tahi atu mau tamaroa. Ua maere roa oia i to ˈna haapao maitai i nia i to ˈna mau tiaturiraa papu i te pae faaroo, i to ˈna iteraa e eita oia e haama i te faataa ê mai ia ˈna no ta ˈna mau tiaturiraa. Ua nehenehe atoa o ˈna e ite e e haava manaˈo haapiihia to ˈna e e nehenehe ta ˈna e ‘ite i te maitai e te ino.’ (Heb. 5:14) I muri iho, ua haere te metua vahine o taua tamaroa ra e farerei i te vahine haapii tamarii, e ua haamatahia ˈtura te hoê haapiiraa Bibilia. I muri aˈe, ua bapetizo atura te vahine haapii tamarii e i te pae hopea ua riro mai oia ei pionie tamau!
4 Ua putapû te hoê taata apî i te haerea maitai o te hoê Kerisetiano Ite no Iehova i ta ˈna fare haapiiraa. E mea taa ê mau â oia: mea ite roa i te peu, rave ohipa, e faaahu maitai noa oia ia ˈna; hau atu, taa ê atu i te tahi atu mau tamahine, eita roa oia e faahinaaro i te mau tamaroa. Ua ite taua taata apî ra e te pee ra o ˈna i te mau faaueraa tumu Bibilia i roto i to ˈna oraraa. Ua uiui oia ia ˈna no nia i ta ˈna mau tiaturiraa, e ua putapû roa oia i te mea o ta ˈna i haapii mai. Ua haapii atura oia, e aita i maoro ua bapetizo atura, e i muri iho ua riro oia ei pionie e i muri aˈe ei melo o te Betela.
5 Mai te peu e e Kerisetiano apî outou o te hinaaro ra e horoa i te hoê faaiteraa maitai ia vetahi ê, a vai ara noa ïa i nia i to outou haerea i roto i te mau huru tupuraa atoa. Eiaha roa ˈtu e haaparuparu ia outou ma te farii i te mau mea faatia-noa-hia e teie nei ao, i roto anei i to ˈna mau haerea, mau manaˈo aore ra mau huru oraraa. Ia riro outou ei hiˈoraa i nia i te hoê faito teitei i roto i ta outou mau parau, to outou faaahuraa, to outou faaneheneheraa rouru, eiaha noa ia apiti anaˈe outou i roto i te pororaa e ia haere anaˈe outou i te mau putuputuraa, ia haere atoa anaˈe râ outou i te fare haapiiraa aore ra i roto i ta outou mau faaanaanataeraa manaˈo. (Tim. 1, 4:12) Auê ïa outou i te oaoa e ia anaanatae anaˈe te hoê taata i te parau mau no te mea te ‘faaanaana ra outou i to outou maramarama’ maoti to outou haerea maitai!—Mat. 5:16.