Te faatia ra te feia poro i te Basileia

Te mau ohipa maitatai o te faahanahana ia Iehova

I ROTO i ta ˈna Aˈoraa i nia i te Mouˈa, ua parau o Iesu i ta ˈna mau pǐpǐ e: “Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau [ohipa, MN] maitai, e ia haamaitai i to outou Metua i te ao ra.” (Mataio 5:16) Te rave atoa nei te mau kerisetiano mau i teie mahana i te mau ‘ohipa maitatai’ o te faahanahana ia Iehova.

Eaha taua mau ohipa maitatai ra? O te pororaa ïa i te parau apî maitai, e tuhaa faufaa atoa râ to tatou haerea maitai. Na to tatou haerea maitai e aratai pinepine nei i te mau taata i te amuiraa kerisetiano. Te faaite ra te mau tupuraa i muri nei e mea nafea te mau Ite no Iehova no Matinita i te ‘faaanaanaraa i to ratou maramarama i mua i te mau taata.’

◻ A poro noa ˈi na te mau fare, ua farerei te hoê Ite no Iehova i te hoê vahine katolika. E 25 matahiti to teie vahine faaea-noa-raa e te hoê tane ma te faaipoipo ore. Ua ite o ˈna i te mau haapiiraa a te mau Ite no Iehova, i te mea e e hitu matahiti na mua ˈtu, ua fanaˈo oia i te buka ra E nehenehe oe e ora e a muri noa ˈtu i roto i te paradaiso i nia i te fenua nei.a Ua parau taua vahine ra i te Ite e: “Ua rahi roa te haapaoraa. Aita vau i ite e ta vai te tiaturi i rotopu i teie huenaneraa atoa.” Ua faataa te Ite e e ite-noa-hia te parau mau i roto i te Bibilia e ia noaa mai te reira, e tia ia ˈna ia haapii maite i te mau Papai e ia pure e ia horoa mai te Atua i to ˈna varua e ta ˈna aratairaa.

No te hoê area taime, noa ˈtu e ua anaanatae oia i te haapii i te Bibilia, ua patoi taua vahine ra e rave rahi titau-manihini-raa e haere i te mau putuputuraa kerisetiano i te Piha no te Basileia a te mau Ite no Iehova. No te aha? Ua haama roa oia. I te titau-manihini-raahia râ oia i te oroa Haamanaˈoraa i te poheraa o te Mesia, ua na nia iho oia i to ˈna haama e ua haere atu oia.

Te mea o tei haaputapû roa ˈˈe ia ˈna i te putuputuraa, o te aroha ïa e vai ra i roto i te Piha no te Basileia. Aita oia i ite aˈenei i teie huru auhoaraa mau i roto i ta ˈna ekalesia! I muri aˈe i taua putuputuraa ra, ua haamata oia i te haere i te mau putuputuraa atoa faaterehia e te mau Ite o to ˈna vahi, e aita i maoro ua faaipoipo oia e te tane o ta ˈna e faaea ra. E melo bapetizohia o ˈna i teie nei i roto i te amuiraa.

◻ Ua faatupu te mau ohipa maitatai a te tahi atu Ite i te mau faahopearaa maitatai. E tiaraa mana to ˈna i roto i te hoê piha ohiparaa. I muri aˈe i te tihepuraahia te hoê taata no te motu Réunion mai, ua haamata vetahi mau rave ohipa i te faaooo ia ˈna no to ˈna poto. Ua faaooo-noa-hia ˈtura oia e te taatoaraa. Ei taa-ê-raa, ua faaite noa te Ite i te maitai e te tura i taua taata ra. Aita i maoro ua ani aˈera o ˈna e no te aha oia i taa ê ai.

Ua faataa te Ite e na te mau faaueraa tumu a te Bibilia o ta ˈna i haapii e te mau Ite no Iehova e turai ra ia ˈna ia faaite i te tura. Ua faaite atoa o ˈna ia ˈna e eaha ta te mau Papai e parau ra no nia i te mau opuaraa a te Atua e te tiaturiraa no nia i te hoê ao apî. Ua farii taua taata ra i te hoê haapiiraa bibilia, ua haamata oia i te haere i te mau putuputuraa kerisetiano, e ua faaipoipo oia e te vahine o ta ˈna e faaea ra.

I te pae hopea ua hoˈi o ˈna i Réunion. I mutaa ihora, ua farerei oia i te mau fifi e to ˈna mau fetii, e te utuafare iho â râ o ta ˈna vahine. I teie nei râ, ua maere roa ratou i to ˈna haerea kerisetiano maitai. Ua bapetizo teie taata e e tavini tauturu oia i teie nei. Te tavini atoa ra e rave rahi mau melo o te utuafare, ta ˈna vahine e ta ˈna nau tamahine toopiti atoa, i roto i te amuiraa kerisetiano ei feia poro i te parau apî maitai o te Basileia o te Atua.

[Nota i raro i te api]