E poro anaˈe i “te mau huru taata atoa”
1 Ia farerei anaˈe tatou i te mau taata no roto e rave rau ihotumu e e rave rau faaroo, e tia ia tatou ia papu maitai e e hinaaro o Iehova “i te [mau huru] taata atoa ia ora, e ia noaa te ite [papu] i te parau mau.” (Tim. 1, 2:4; MN) Taa ê atu e rave rahi mau api parau iti e mau vea iti i nenei-taa-ê-hia no te reira, te vai nei ia tatou ra e piti buka faahiahia roa o te nehenehe e faaohipahia i te mau taime atoa no te tauturu i te feia e aita te haapaoraa i haapii ia ratou i te parau mau no nia i te Atua e i te Mesia.
2 Te faaite ra te buka ra L’humanité à la recherche de Dieu i te mau tumu o te mau haapaoraa rarahi o te ao nei; e nehenehe ïa te reira e tauturu i te feia no te mau vahi atoa ia faaau i ta ratou mau tiaturiraa e ta te Bibilia e haapii ra no nia i te Atua mau hoê ra. Aore ra, ma te huti i te ara-maite-raa i nia i te oraraa o Iesu Mesia, e nehenehe te buka ra Te taata rahi roa ˈˈe i ora aˈenei e tauturu i te hoê taata ia ite maitai aˈe i te Tamaiti a te Atua e ia hutihia oia e ana, mai te ohipa i tupu i nia e rave rahi taata i te senekele matamua. (Ioa. 12:32) I te mau taime atoa e manaˈo ai tatou e tano, e tamata anaˈe ïa i te mau manaˈo i muri nei no te pûpû atu i teie mau buka:
3 Mai te peu e e manaˈo tatou e mea maitai ia pûpû i “Te taata rahi roa ˈˈe,” e ui anaˈe ïa i teie uiraa e:
◼ “Eaha te mea e ô mai i roto i to oe feruriraa ia manaˈo anaˈe oe ia Iesu Mesia? [A vaiiho i te taata ia pahono.] E rave rahi mau taata tuatapapa aamu e farii nei e ua riro na o Iesu ei taata rahi roa ˈˈe i ora aˈenei. [A faahiti i te hoê hiˈoraa i roto i te omuaraa o te buka ra Te taata rahi roa ˈˈe.] Te faaite ra te Bibilia e ua riro te oraraa o Iesu ei hiˈoraa te tia ia peehia e te huitaata.” A taio i te Petero 1, 2:21 e te paratarapha matamua o te api hopea o te omuaraa o te buka ra Te taata rahi roa ˈˈe. Mai te peu e e hinaaro te taata e haapii hau atu â no nia ia Iesu, a pûpû atu i te buka. Hou e vaiiho ai ia ˈna, a taio i te Ioane 17:3 e a ani atu e: “Nafea tatou e nehenehe ai e fanaˈo i taua ite ra o te aratai i te ora mure ore?” A faanaho i te hoê taime farereiraa papu no te hoˈi faahou mai e pahono i taua uiraa ra.
4 I te hoˈi-faahou-raa e farerei, no te faataa ˈtu nafea ia noaa te ite o te horoa i te ora, e nehenehe tatou e parau e:
◼ “Ua parau vau ia oe e e hoˈi mai au e faaite ia oe nafea e nehenehe ai e noaa ia tatou te ite e aratai i te ora mure ore.” A pûpû i te buka ra Te ite, e a faaite i te tereraa o te hoê haapiiraa ma te faaohipa i te pene matamua.
5 Mai te peu e e hinaaro tatou e pûpû i te buka ra “L’humanité à la recherche de Dieu,” a haamata ma te tuu i teie uiraa e:
◼ “Te vai nei e rave rahi haapaoraa i teie mahana: ua uiui aˈena anei oe e nafea e itehia ˈi teihea ta te Atua e farii?” I muri aˈe i te faarooraa i ta ˈna pahonoraa, a iriti i te buka ra L’humanité à la recherche de Dieu i te api 377. A haamatara i te manaˈo numera 7, e a ani i te taata e mai te peu e te manaˈo atoa ra o ˈna e e tia i te haapaoraa mau ia tahoê i te mau huru taata atoa. A rave i te hoê o te mau irava i faahitihia e, mai te peu e e taimehia, a faataa i te tahi atu manaˈo i roto i teie tabula. Mai te peu e e anaanatae mau â te taata, a pûpû atu ïa ia ˈna i te buka. I te taime e haere ai tatou, e nehenehe tatou e tuu i teie uiraa: “Nafea te haapaoraa mau tia ˈi ia ohipa i nia i te haerea o to ˈna mau taata?” A faanaho i te hoê taime farereiraa no te pahono i taua uiraa ra.
6 Ia hoˈi anaˈe mai tatou no te faataa nafea te haapaoraa mau ia ohipa i nia i te oraraa o to ˈna mau taata, e nehenehe tatou e ani e:
◼ “I to oe manaˈoraa, e tia anei i te haapaoraa ia ohipa i nia i te haerea o to ˈna mau taata? [A vaiiho ia ˈna ia pahono.] Ua horoa mai te Mesia i te hoê tapao i reira e tia ˈi ia haava i te hoê haapaoraa.” A taio roa ˈtu i te Mataio 7:17-20 i te api 12 e 13 o te buka ra L’humanité à la recherche de Dieu. I muri iho, a ani i te taata ia taio i te par. 20 i te mau api 13 e 14. Mai te peu e e taimehia, a tauaparau i nia i te mau par. 25-29 i te mau api 16-18. Peneiaˈe e nehenehe tatou e haamata i te hoê haapiiraa i nia anei i te vea iti ra Titau, aore ra i nia i te buka ra Te ite.
7 Nafea ia haamata i te tauaparauraa: Te vai nei e rave rahi mauhaa no te haapiiraa i roto i te buka ra L’humanité à la recherche de Dieu, o te nehenehe e faaohipahia no te haamata i te tauaparauraa i te farereiraa matamua anei, aore ra i te piti o te farereiraa. E nehenehe tatou e haamata i te tauaparauraa na roto noa i te uiraa ia ˈna i te hoê uiraa e tano. Ei hiˈoraa, teie e rave rau mau uiraa e mau tumu parau o ta tatou e ite i te tatararaa i te mau api faahitihia:
“Te mau uiraa e titauhia i te pahonoraa”: mau api 17-18
“E aai noa anei o Iesu?”: api 237
“Na vai i papai i te Bibilia?”: api 241
“Te Qurʼān e te Bibilia”: api 285
“Te mau haapapuraa o te tia-mau-raa o te Bibilia”: mau api 340-341
“Te mau tiaturiraa a te mau Ite no Iehova”: mau api 356-357
“Nafea e itehia ˈi te haapaoraa mau”: api 377
8 E nehenehe tatou e rave mai i te mau api maitihia i roto i te buka ra L’humanité à la recherche de Dieu e e faataa i te manaˈo tuatapapahia. I muri iho, a faanaho i te hoê mahana no te hoˈi mai ma te ui i te hoê uiraa ia au i te tumu parau tauaparauhia e o ta tatou e nehenehe e pahono atu na roto anei i te vea iti ra Titau, aore ra na roto i te buka ra Te ite. Eiaha ia moehia ia tatou i te titau manihini i te taata i te putuputuraa huiraatira.
9 Te imi nei te mau huru taata haavare ore atoa i te parau mau no nia i te Atua e te Mesia. E nehenehe tatou e tauturu ia ratou na roto i ta tatou ohipa pororaa. No reira, e tamau anaˈe i te ‘rohi e i te [tutava], no te mea te tiaturi nei tatou i te Atua ora ra, i te Ora o te [mau huru] taata atoa nei.’—Tim. 1, 4:10; MN.