E mea maitai roa ia tae tamau noa mai tatou!
1 Tau ahuru matahiti i te maoro, aita e rave rahi o to tatou mau taeae no Europa Hitia o te râ i nehenehe e putuputu i mua i te taata. A feruri na i to ratou oaoa i te mahana a nehenehe ai ratou e na reira ma te tiamâ, i te faaoreraahia te opaniraa!
2 Teie ta te hoê tiaau haaati i papai no nia i te hoê amuiraa o ta ˈna i farerei: “I te Mahana piti po, i te taime a tae mai ai au, ua ino te matini haaveavea. Mea toetoe roa i rapaeau e, i roto i te piha, e 5 teteri Celsius noa ïa. E pereue, e tahei, e rimarima, e taupoo e e tiaapuiti to te mau taeae. Eita roa ˈtu te hoê taata e nehenehe e apee i roto i ta ˈna Bibilia, no te mea eita e nehenehe e huri i te mau api. I nia i te tahua, i roto i to ˈu pereue, ua toetoe roa hoi au e ua ite au i to ˈu aho ia paraparau anaˈe au. Teie râ, te mea i haaputapû ia ˈu, oia hoi aita roa vau i faaroo noa ˈˈe i te amuamu. Ua parau te taatoaraa e ua oaoa roa ratou i te taeraa mai!” Aita roa ˈtu i ô mai i roto i te feruriraa o teie mau taeae e mairi i te putuputuraa!
3 Te feruri ra anei tatou mai ia ratou? Te haafaufaa ra anei tatou i te oaoa ia putuputu tatou ma te tiamâ i te mau hebedoma atoa? Aore ra te haere noa ra anei tatou i te mau putuputuraa ia maitai anaˈe te mau huru tupuraa? Peneiaˈe e ere i te mea ohie ia haere tamau atu e e nehenehe tatou e mairi no te mau tumu papu maitai. Teie râ, e feruri anaˈe i te feia i rotopu ia tatou, o te ite ra i te faufaaraa o te mau putuputuraa e o te tae tamau noa mai nei noa ˈtu to ratou matahiti, te maˈi ino mau, te hoê fifi i te pae tino, te mau hora ohipa o te haaparuparu ra ia ratou aore ra te mau hopoia rarahi mau. E pee anaˈe i teie mau hiˈoraa nehenehe mau!—Hiˈo Luka 2:37.
4 E haamatau anaˈe i te turu i te haamoriraa mau ma te haere-tamau-raa i te mau putuputuraa atoa, mai te haapiiraa buka iti e tae roa ˈtu i te mau tairururaa mataeinaa rarahi. No te aha e haafaufaa ˈi i taua mau haaputuputuraa ra? No te mea e titauraa no ǒ mai i te Atua ra ia haaputuputu. Teie râ, te vai ra te tahi atu â mau tumu faufaa roa. Te hinaaro nei tatou paatoa i te mau haamaitairaa o te haapiiraa no ǒ mai i te Atua ra e te tauturu a te varua moˈa. O ta tatou iho â ïa e fanaˈo nei i te mau putuputuraa. (Mat. 18:20) Hau atu e patuhia tatou e te mau faaitoitoraa o ta tatou e haafanaˈo nei e to tatou mau taeae e tuahine.—Heb. 10:24, 25.
5 I te faahuru-ê-raahia o Iesu, ua parau Petero e: “E te orometua, e mea maitai ia parahi tatou i ǒ nei.” (Luka 9:33) E faatupu tatou i te hoê â huru feruriraa no nia i ta tatou mau putuputuraa kerisetiano e tia ˈi. Oia, e mea maitai roa ia tae tamau noa mai tatou!