E paraparau anaˈe no Iehova i te mau mahana atoa
1 E mea au na te taata e paraparau i te mau mea e auhia e ratou, no te mea no te î hoi o te aau i parau ai te vaha. (Luka 6:45b) E o tatou ïa, eaha te mea ta tatou e au nei? Te na ô ra te papai salamo e: “Ei reira tau vaha e parau ai i te parau-tia na oe, e ua tamau maite i te arue ia oe.” (Sal. 35:28) E mauruuru rahi to ˈna ia Iehova, e ua ite oia e e haamaitairaa mau i te paraparauraa no te Atua e i te faahanahanaraa ia ˈna i te mau taime atoa. No to ˈna taairaa piri e o Iehova, e rave rau mau tumu i oaoa ˈi te papai salamo. (Sal. 35:9) Nafea tatou ia pee i to ˈna hiˈoraa maitai?
2 E paraparau anaˈe no Iehova i roto i te utuafare: E tia ia paraparau no Iehova i roto i te utuafare fetii i te mau mahana atoa. No to ratou here puai ia Iehova, e ohie noa ïa te mau metua ia paraparau no ˈna i roto i ta ratou mau ohipa atoa. (Deut. 6:5-7) No reira, e ite te mau tamarii e te ora nei to ratou metua tane e metua vahine ma te faaroo, e te here ra raua i te ture a te Atua. E faariro ïa te mau tamarii i te haapiiraa Bibilia utuafare mai te hoê tapao papu o te taairaa o to ratou mau metua e o te Atua.—Pet. 2, 3:11
3 E paraparau anaˈe no Iehova i to tatou mau taeae: E faatupu mai te mau ohipa teotaratia o te hebedoma e rave rau mau ravea no te faaî i te pae varua i to tatou feruriraa e to tatou mafatu. Te vai noa ra te mau mea maitatai te nehenehe e aparauhia. (Luka 6:45a) Ua ite anei outou i roto i ta outou haapiiraa tataitahi aore ra i te taioraa Bibilia hebedoma i te hoê manaˈo o ta outou i au maitai? A paraparau atu i to outou mau taeae e tuahine, e tauturu ïa outou ia ratou ia roaa i te hoê here hohonu atu â no Iehova.—Sal. 35:18; Heb. 10:24.
4 E paraparau anaˈe no Iehova i te mau taata e haaati nei ia tatou: Na roto i te mau aparauraa i to tatou mau taata-tupu i te mau mahana atoa, i te vahi raveraa ohipa anei, i te mau hoa haapiiraa anei, aore ra i te mau melo o te fetii e tiaturiraa ê to ratou, e ia papu maitai e, te manaˈonaˈoraa matamua o to tatou nei oraraa, o te faaiteraa ïa i te parau no Iehova. Maoti i te rave mai i te parau au ore e te faufau a teie nei ao, e tia ia tatou ia faahanahana i te Atua na roto i ta tatou huru paraparau. I te mau mahana atoa, i te mau taime atoa, e faaite anaˈe i te parau apî maitai i faauehia ia tatou ia poro.—Ohi. 5:42; Kol. 4:6.
5 Ei feia haamori mau no Iehova, i te mau mahana atoa, e imi ïa tatou i te mau taime maitatai no te paraparau no to tatou Atua faito ore ra o Iehova.—Sal. 106:47.