E faahotu anaˈe i te anaanatae o te taata i Te parau apî o te Basileia
1 Tau hebedoma i teie nei to tatou opereraa ma te oaoa e te popou i te api parau iti ra Te parau apî o te Basileia n° 35, teie te upoo parau “E here anei te mau taata atoa i te tahi e te tahi?” Na te mau vahi atoa, te tutava nei te feia poro i te vaiiho i teie api parau iti i te rahiraa taata e “au.” (Mat. 10:11) E hope teie opereraa i te Sabati 16 no Novema, tera râ, mai te peu e aita te mau tuhaa fenua i oti i te porohia, e ani mai paha te mau matahiapo ia tatou ia tamau â i te opere i Te parau apî o te Basileia n° 35 haapao pau roa te mau api parau iti o ta tatou amuiraa.
2 Te faaara nei teie numera o Te parau apî o te Basileia i te anaanatae o te mau taata e rave rahi. Te ite nei hoi ratou e aita faahou te here natura i rotopu i te rahiraa o te mau taata i teie nei tau, e no reira, te aniani nei ratou e eaha te ohipa e tupu a muri aˈe. (Tim. 2, 3:3) Teie anaanatae i faaarahia, e tia ïa ia tatou ia faahotu atu.
3 Ua horoa mai te opereraa i Te parau apî o te Basileia i te mau hotu: I te opereraa i ravehia i te matahiti 1995, ua vaiihohia te hoê api parau Te parau apî o te Basileia i te hoê vahine, e ua haere roa mai oia i te hoê putuputuraa i te Piha no te Basileia no te ite hau atu â no nia i te mau tiaturiraa a te mau Ite no Iehova. Ua farii popou oia i te reira iho taime i te hoê haapiiraa Bibilia, e i muri iho, mea varavara to ˈna mairiraa i te hoê putuputuraa. Aita i maoro roa, ua faaore atura oia i to ˈna iˈoa i nia i te tabula a ta ˈna Ekalesia.
4 I teie mahana, e mau hanere taata i roto i ta tatou tuhaa fenua, o tei taio aˈena i te poroi e vauvauhia ra i roto i Te parau apî o te Basileia n° 35. Mea nafea râ to ratou fariiraa? Noa ˈtu e aita ratou i putapû i te parau o ta ratou i taio, eita te rahiraa e taui mai te peu e eita te hoê Ite no Iehova e haere faahou atu e hiˈo ia ratou. Ua opua anei tatou e hoˈi e hiˈo ia ratou? E tia hoi i te tapitapi no to tatou taata-tupu, faatupuhia e te here, ia turai ia tatou ia na reira. E tia ia hoˈi atu e farerei i te feia atoa tei anaanatae mai i Te parau apî o te Basileia.
5 Eaha ta tatou e parau ia hoˈi faahou atu tatou e farerei i te taata? E nehenehe tatou e faahiti i te tahi mau parau no nia i te tanoraa o te poroi e vai ra i roto i Te parau apî o te Basileia no to tatou nei tau, e i muri iho, e faahiti i te hoê uiraa o te turai i te taata ia feruri. A faaroo maitai i te pahonoraa a te taata, ia taa maitai ia tatou i te hohonuraa o to ˈna manaˈo. I muri iho, a huti i to ˈna ara-maite-raa i nia i te hoê manaˈo tano maitai o te vea iti ra Titau, o te vauvauhia ra i roto i Te parau apî o te Basileia. Mai te peu e e farii maitai mai te taata, a tamata ïa i te haamata i te haapiiraa Bibilia i reira iho.
6 Teie te tahi mau huru raveraa no te haamata faahou i te aparauraa e te feia i anaanatae mai i “Te parau apî o te Basileia” n° 35:
◼ “Te haamanaˈo ra paha oe i teie api parau iti o ta ˈu i vaiiho mai aita i maoro iho nei. Te faahiti ra oia i te hoê fifi rahi e faaamahamaha nei i te mau taata: oia hoi te ereraa i te here i te taata-tupu.” A faahiti i te tahi mau aamu e faatiahia ra i te api 2 o Te parau apî o te Basileia, i raro aˈe i te upoo parau ra “Ua iti te here i te taata-tupu.” A ani atu i muri iho e: “Ia manaˈo anaˈe oe, tera anei te huru oraraa ta te Atua i opua no te taata nei?” A faaroo i ta ˈna pahonoraa. A iriti i te vea iti ra Titau i te haapiiraa 5 e a tamata i te haamata i te haapiiraa Bibilia.
◼ “I to tâua farerei-matamua-raa, ua vaiiho mai au i te hoê api parau iti, teie hoi te uiraa: ‘E here anei te mau taata atoa i te tahi e te tahi?’ E manaˈo anei oe e e nehenehe te reira e tupu ati aˈe te ao nei?” A faaroo i ta ˈna pahonoraa. A iriti i te vea iti ra Titau i te haapiiraa 6 e a taio i te par. 6. I muri iho, a taio i te parau tǎpǔ a te Atua i roto i te Mika 4:3, 4. Mai te peu e te anaanatae mau ra te taata, a pûpû atu i te vea iti e te haapiiraa.
◼ “I to tâua farereiraa i te taime i mairi aˈenei, ua vaiiho mai au i te api parau iti ra ‘E here anei te mau taata atoa i te tahi e te tahi?’ Te pûpûhia ra i roto, te hoê haapiiraa Bibilia tamoni ore, i to oe iho fare. Ua hoˈi mai au e hiˈo ia oe no te faaite ia oe i te buka ta matou e faaohipa nei no te haapii i te Bibilia. [A faaite i te buka ra Te ite.] Te faataa maitai ra teie buka e afea tatou e nehenehe ai e tiaturi e e here te mau taata i te tahi e te tahi, e te pahono atoa nei i te mau uiraa ta oe atoa paha e uiui nei, oia hoi: No te aha tatou e ruau ai e e pohe ai? No te aha te Atua e faatia ˈi i te mauiui? Eaha te tupu i nia i te feia pohe herehia e tatou?” I muri iho, a ani atu e: “E nehenehe anei au e faaite ia oe e mea nafea matou ia rave i teie huru haapiiraa Bibilia?” Mai te peu e eita te taata e farii, a ani atu ïa mai te peu e mea au aˈe na ˈna ia taio i te buka o ˈna anaˈe. Mai te peu e e, a vaiiho atu ïa i te buka. A faanaho i te hoê hoˈi-faahou-raa e farerei.
7 Ia hope roa te tuhaa fenua i te porohia e Te parau apî o te Basileia n° 35, e nehenehe tatou e pûpû i te buka ra Te ite i te toea o te avaˈe. No te pûpû i teie buka, mea rahi roa te manaˈo e horoahia ra i te api hopea o Te taviniraa o te Basileia no Titema 1995; no Mati, Tiunu e Novema 1996; e no Tiunu 1997.
8 E taime tano roa te opereraa i Te parau apî o te Basileia no tatou tataitahi, no te tutava hau atu â i roto i te pororaa. Tauturuhia e Iehova, e nehenehe tatou e tiaturi e e manuïa teie opereraa: inaha, e tauturu oia i te mau taata ia ite e te opuaraa a te Atua, ia here ïa te mau taata i te tahi e te tahi. Ia tamau noa Iehova i te haamaitai mai i ta tatou mau tutavaraa no te faahotu i te anaanatae o te taata i Te parau apî o te Basileia, e tia ˈi!