Aita to outou mairiraa i itea-ore-hia!
1 I te tahi mau taime, peneiaˈe e aita tatou e tae mai ra i te hoê aore e rave rahi mau putuputuraa a te amuiraa ma te parau e: “Aita e peapea; eita roa ˈtu e itehia e ua mairi au i te putuputuraa.” E ere te reira i te parau mau! Mai te mau melo o te hoê tino, e tuhaa faufaa ta tatou paatoa i roto i te oraraa o te amuiraa. (Kor. 1, 12:12) E nehenehe to tatou mairiraa i te hoê putuputuraa hebedoma e faaino i te vai-maitai-raa i te pae varua o te feia i tae mai. Mai te peu e aita outou i te putuputuraa, ia papu ia outou e: aita to outou mairiraa i itea-ore-hia!
2 Te tuhaa faufaa a te taata tataitahi: E hinaaro ru noa na o Paulo i te putuputu e to ˈna mau taeae. Te faaite ra o ˈna e no te aha i roto i te Roma 1:11, 12: “Ia tuu atu . . . i ta te varua ia outou na, . . . ia mahanahana hoi au e outou atoa i to tatou faaroo, i to outou e i to ˈu atoa hoi.” Mai te reira atoa, na roto i ta tatou mau pahonoraa, te mau apitiraa, e te taeraa mai, te patu ra ïa tatou te tahi i te tahi, ma te faaitoito ia tatou ia vai taiva ore noa.—Tes. 1, 5:11.
3 Aita anei outou e hinaaro ru atoa nei i te farerei i to outou mau hoa kerisetiano i te mau putuputuraa a te amuiraa? Te faaroo maite ra outou i ta ratou mau pahonoraa e te au ra outou i ta ratou huru faaiteraa i to ratou faaroo. E patu mai ta ratou mau ô pae varua ia outou. Mai te peu e ua mairi vetahi, mai te mea ra e te erehia ra outou i te hoê mea faufaa. E mai te reira atoa to outou mau taeae e tuahine aita anaˈe outou e tae mai.
4 Te tuhaa faufaa a te mau putuputuraa: No te faufaaraa o te mau putuputuraa no to tatou huru pae varua, te faaite ra te hoê Pare Tiairaa e: “I roto i teie ao amahamaha e te taiata, ua riro mau â te amuiraa kerisetiano ei vahi haapuraa i te pae varua . . . , ei pu no te hau e te here. No reira, a haere tamau atu i te mau putuputuraa atoa.” (w93-TH 15/8 11) I te mau mahana atoa, te faaruru nei tatou i te mau huru tupuraa o te tamata rahi nei i to tatou huru pae varua. Mai te peu e eita tatou e ara, e nehenehe to tatou mau hepoheporaa tataitahi e haapeapea ia tatou, e haamoe roa ˈtu ai i te mau mea i te pae varua, o te tuhaa faufaa roa ˈˈe hoi. Te hinaaro paatoa nei tatou te tahi i te tahi ia noaa te mau faaitoitoraa titauhia e ia vai tahoê e te itoito i roto i te taviniraa i te Atua.—Heb. 10:24, 25.
5 E mea faufaa ia haere mai i te mau putuputuraa. I te tahi taime, na te maˈi aore ra na te hoê tupuraa manaˈo-ore-hia e tapea paha ia tatou ia tae mai, tera râ, i te rahiraa o te taime, e rave anaˈe i te opuaraa papu no te vai amui noa â i te feia o tei putuputu no te haamaitai ia Iehova!—Sal. 26:12.