E opere rahi anaˈe i Te parau apî o te Basileia n° 35
1 E ohipa rahi ta tatou paatoa e rave i te mau avaˈe Atopa e Novema. I te roaraa o na mahana matamua 11 no Atopa, e pûpû tatou i Te Pare Tiairaa e te A ara mai na! I muri iho, mai te sabati 12 no Atopa e tae atu i te sabati 16 no Novema, e opere tatou na te ao nei i Te parau apî o te Basileia n° 35. E nehenehe ïa tatou e faatae i te hoê poroi faufaa i te mau taata atoa o ta tatou tuhaa fenua. Te pahono ra teie poroi i te uiraa ra “E here anei te mau taata atoa i te tahi e te tahi?” I roto i taua ohipa taa ê ra, e opere tatou i Te parau apî o te Basileia i roto i te hebedoma; i te mau hopea hebedoma, e opere atoa tatou i te mau vea apî.
2 O vai te nehenehe e apiti mai? Mai ta ratou i matau i te rave, na te mau matahiapo e aratai i te ohipa. E oaoa ïa te taata tataitahi i te opereraa i Te parau apî o te Basileia, papu maitai e e rave rahi feia poro o te tavini ei pionie tauturu i te hoê avaˈe aore ra i na avaˈe e piti i reira e operehia ˈi te api parau iti. E hinaaro vetahi atu feia poro e apiti hau atu â i roto i te taviniraa.
3 Te haapii ra anei tatou i te hoê taata o tei haere maitai i mua i roto i te haapiiraa i te buka ra Te ite, e e fatata oia i te faaî i te mau titauraa no te apiti i roto i te pororaa? Peneiaˈe e nehenehe oia e riro mai ei taata poro bapetizo-ore-hia na mua ˈˈe e haamata ˈi te opereraa, ia nehenehe oia e apiti atoa mai. Te mea noa e titauhia ra no te opere i Te parau apî o te Basileia, o te hoê ïa faaiteraa ohie noa. Ei hiˈoraa, e nehenehe e parau e: “E mea faufaa roa teie poroi, e te faataehia nei na te ao nei i teie avaˈe na roto 169 reo. Te hinaaro nei au e horoa i te tahi na oe.” E nehenehe atoa te mau tamarii e apiti mai i roto i teie ohipa anaanatae.
4 E faaitoito te mau taeae e faatere ra i te haapiiraa buka i te mau melo atoa o ta ratou pǔpǔ ia apiti rahi mai i roto i te opereraa i Te parau apî o te Basileia n° 35. Te vai atoa ra paha te feia poro i paruparu, o te nehenehe e poro faahou mai te peu e e fanaˈo ratou i te mau faaitoitoraa ta ratou e hinaaro ra. Na mua ˈˈe e haamata ˈi teie ohipa, e tia ïa i te mau matahiapo ia haere e farerei i teie feia poro paruparu atoa, no te ite e nafea ia tauturu ia ratou ia haere na muri iho i te feia poro aravihi i roto i teie tuhaa o te taviniraa.
5 Afea tatou e nehenehe ai e putuputu no te pororaa? Te titau ra teie ohipa ia faanahohia te mau putuputuraa no te pororaa i te mau taime ohie e te tano. I te mau taime atoa e nehenehe, ia faanahohia te mau putuputuraa no te pororaa i te mahana tataitahi o te hebedoma, i te hopea hebedoma, e i te ahiahi. Ia faatupuhia te reira i te mau taime e vata te feia poro e te mau pionie no te faaohipa rahi i to ratou taime no te pororaa. E nehenehe atoa e faanaho i te mau putuputuraa i te hopea avatea no te mau taurearea haere haapiiraa, te mau rave ohipa tapǔpǔ e vetahi atu. E ara te tiaau no te taviniraa ia navai maitai te mau tuhaa fenua no te pororaa na te mau fare e na te mau fare toa, ia nehenehe te taata tataitahi e apiti rahi mai i roto i teie ohipa. I te mau vahi e mea rahi te feia poro, e haapao maitai ïa tatou ia ore ia rahi roa te feia poro i roto i te tuhaa fenua i faataahia.
6 E te mau taata ïa aita i te fare? Te hinaaro nei tatou e farerei roa e rave rahi mau taata, no te faataa ˈtu ia ratou e no te aha e tia ia ratou ia taio i Te parau apî o te Basileia n° 35. Mai te peu e aita e taata i te fare o ta tatou e haere atu, e tapao anaˈe ïa i te vahi faaearaa, e e hoˈi atu tatou i te tahi atu taime o te mahana. Mai te peu e aita iho â tatou i farerei i taua mau taata ra i te hebedoma hopea o te opereraa, e nehenehe ïa tatou e vaiiho i Te parau apî o te Basileia i te uputa, ma te ara ia ore te feia e haere na reira e ite atu. I roto i te mau vahi nohoraa, ia ineine tatou i te horoa i Te parau apî o te Basileia na te mau taata e haere ra na nia i te purumu. Mai te peu e e poro tatou i roto i te hoê tuhaa fenua rahi roa eita e oti i te roaraa o te opereraa, e nehenehe ïa tatou e vaiiho i Te parau apî o te Basileia i te mau fare aita e taata i te tere matamua.
7 Eaha ta tatou fa? E tia i te mau amuiraa ia tutava i te opere i Te parau apî o te Basileia atoa tei haponohia ˈtu na ratou i roto i ta ratou tuhaa fenua taatoa na mua ˈˈe e hope ai te ohipa i te 16 no Novema. Mai te peu e mea aano te tuhaa fenua o ta tatou amuiraa e aita e fifi ia poro tatou anaˈe, eiaha râ e piti, mea ohie aˈe paha ïa ia na reira. E nehenehe ïa tatou e faaite i te parau apî maitai i e rave rahi roa taata tei au. (Mat. 10:11) E mea maitai ia rave tatou i te tahi mau api parau iti i roto i to ratou rima, e te hoê Bibilia i roto i to tatou pute ahu aore ra ta tatou pute iti, eiaha râ i roto i te hoê pute rahi. E ara tatou i te tapao maitai i te anaanatae o te taata.
8 Ua ineine anei tatou no te haamata? E faataa atea te mau matahiapo e ehia rahiraa vea hau ta te amuiraa e hinaaro e e ani ratou ia au i teie numera. Aita e faufaa ia ani i Te parau apî o te Basileia no te mea e haponohia ˈtu iho â ta te amuiraa tataitahi. E horoahia na te mau pionie taa ê, tamau, e tauturu tataitahi 180 api parau iti no te opere, area te feia poro tataitahi ra, e 22 ïa api. Mea rahi ta tatou ohipa e rave. Te tiai ru ra anei tatou i te apiti i roto i teie ohipa anaanatae? Papu maitai! E opere rahi anaˈe ïa i te poroi Bibilia o Te parau apî o te Basileia n° 35!