Ua iritihia te opani rahi no te taviniraa
1 Mai te hoê taata poro itoito i te parau apî maitai, ua paimi na o Paulo i te mau tuhaa fenua e hinaaro-rahi-hia ra te mau taata poro. O te oire o Ephesia te hoê o taua mau tuhaa fenua ra. No to ˈna manuïa rahi i roto i te pororaa, ua papai atura oia i to ˈna mau hoa kerisetiano e: “E opani rahi hoi e te maitai tei iritihia ia ˈu nei.” (Kor. 1, 16:9) Ua tamau noa o Paulo i ta ˈna taviniraa i taua vahi ra, e ua tauturu atura e rave rahi mau taata no Ephesia ia riro mai ei feia faaroo.—Ohi. 19:1-20, 26.
2 I teie nei mahana, ua iriti-atoa-hia i mua ia tatou nei te hoê opani rahi no te taviniraa. Te titau-manihini-hia nei tatou ia turu atu i te mau amuiraa e aita i oti ia ratou i te poro i ta ratou tuhaa fenua i roto i te area o te hoê matahiti. Na roto i ta tatou mau tutavaraa, e nehenehe tatou e faaî i te hinaaro e vai ra i roto i vetahi mau vahi.—A hiˈo Korinetia 2, 8:13-15.
3 E nehenehe anei tatou e tavini i te vahi e te hinaaro-rahi-hia ra te feia poro? Ua pure anei tatou no te haere e tavini i te hoê vahi ê atu? Peneiaˈe te hinaaro ra te hoê amuiraa i roto i to tatou nei oire i te tauturu. A paraparau atu i te tiaau haaati, e na ˈna e horoa mai i te mau manaˈo faaau. Peneiaˈe atoa te vai ra i roto i te tuhaa fenua a ta tatou iho amuiraa te feia tariˈa turi aore ra te mau taata reo ěê e aitâ ratou i tauturuhia ˈtura. Eita anei tatou e nehenehe e tutava i te haapii i to ratou reo no te faaî i taua hinaaro ra?
4 I teie mau matahiti i mairi aˈenei, e mau tausani utuafare fetii kerisetiano tei haere e faaea i roto i vetahi mau fenua no te rave i te hoê faito rahi atu â o te auhune. Teie ta te hoê tane e ta ˈna vahine faaipoipo, o tei rave na i te reira tuhaa, e parau ra: “Ua hinaaro mâua e tavini ia Iehova i te vahi e faufaahia ˈi ta mâua ohipa.” Mai te peu e te hinaaro ra tatou e e nehenehe hoi ta tatou e taui i te faaearaa i roto i ta tatou tuhaa fenua, aore ra e nehenehe e haere atu e tavini i roto i te mau motu, na mua aˈe a paraparau atu i ta tatou mau opuaraa i te mau matahiapo o te amuiraa.
5 Mai te peu e e hinaaro outou i te mau haamaramaramaraa a te Taiete no nia i te mau vahi e hinaaro-rahi-hia ra te feia poro, a papai poto noa to outou mau hinaaro i roto i te hoê rata ta outou e horoa ˈtu i te tomite o te taviniraa o ta outou amuiraa. E tuu mai ïa te tomite vetahi mau manaˈo, a hapono atu ai ta outou rata i te Taiete. Noa ˈtu eaha te huru, e a vai iriti noa ˈi te opani rahi no te taviniraa, ia rave noa tatou i te ohipa i roto i te taviniraa a Iehova.—Kor. 1, 15:58.