E mau Ite ma te taime taatoa anei tatou?
1 E nehenehe anei tatou e pahono e e, i teie uiraa? Parau mau, eita te mau tavini pûpûhia atoa a Iehova e nehenehe e rave i te taviniraa ma te taime taatoa, tera râ, e ere anei i te mea tano ia faariro tatou tataitahi ia tatou mai te hoê Ite ma te taime taatoa? Papu maitai.
2 Aita e Kerisetiano ma te afa taime. Ua na ô o Iesu no nia i to ˈna Metua e: “Aore hoi au i faaea i te rave i te mea e mauruuru ai oia ra.” (Ioa. 8:29) Ua faaue mai o Paulo, o tei manaˈo atoa mai teie te huru, ia tatou ia ‘rave i te mau mea atoa ma te haamaitai i te Atua.’ (Kor. 1, 10:31) E tia ïa ia tatou tataitahi ia hiˈo ia ˈna iho ei Ite no Iehova ma te taime taatoa. E mana maitai mai te reira i nia ia tatou i roto i ta tatou mau ohipa atoa.
3 E hiˈo anaˈe i te mau tupuraa: E nehenehe to tatou faaahuraa, ta tatou mau parau e to tatou haerea e faaite ia vetahi ê e e Ite no Iehova tatou. Te ite ra tatou i te faufaaraa ia faaahu ma te au, ia faahiti i te mau parau maitatai, e ia faaite i te hoê haerea maitai, ia poro anaˈe tatou aore ra ia haere tatou i te mau putuputuraa kerisetiano. Tera râ, e tia ia itehia i te fare haapiiraa anei, i te vahi raveraa ohipa aore ra i te mau taime faaanaanataeraa, e te faatura nei tatou i te mau ture tia a Iehova i roto i to tatou oraraa.
4 Ua parau o Iesu e: “E oire faatiahia i nia i te mouˈa ra, eita ïa e moe. . . . to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.” (Mat. 5:14-16) Ia ite-papu-hia te reira i roto i ta tatou mau ohipa atoa e rave, i te mau taime atoa. Mai te peu e e ite noa ˈtu tatou e te haamarirau ra tatou i te poro no te vahi tei reira tatou aore ra no ta tatou ohipa e rave ra, e tia ïa ia tatou ia uiui e: ‘Te tavini ra anei au ia Iehova ma te taime taatoa aore ra ma te afa taime?’ Eiaha roa ˈtu tatou e vaiiho i te hoê taime ia mairi no te faaite ia vetahi ê i te parau apî maitai o te Basileia o te Atua!
5 E haamanaˈo tatou e te faahanahana nei e te faaoaoa nei tatou ia Iehova mai te peu e e pahono tatou ma te feaa ore e: “E!” i te uiraa ra “E Ite ma te taime taatoa anei oe?”