“Te faaroo i roto i te Parau a te Atua”—Tairururaa Mataeinaa 1997
1 Ua faahaamanaˈo te aposetolo Paulo ia Timoteo e ‘mea faauruahia mai te Papai atoa e te Atua.’ (Tim. 2, 3:16) I te mea e ua faauruahia mai te Parau a te Atua, e mau tumu papu maitai ïa to tatou no te faatupu i te faaroo i roto i teie nei Parau. I teie matahiti, teie te upoo parau o te Tairururaa Mataeinaa, “Te faaroo i roto i te Parau a te Atua.” Noa ˈtu e e rave rahi matahiti tatou i roto i te parau mau, aore ra no ô noa maira tatou i roto i te faanahonahoraa a Iehova, e haapaari te porotarama i to tatou faaroo i roto i te Bibilia. E tia ia tatou tataitahi ia faanaho ia tatou no te haere atu i te taatoaraa o te tairururaa. Auê ïa faaitoitoraa ia tae atoa mai te feia e anaanatae apî ra i te parau mau, te feia iho â râ e haapii ra i te Bibilia na muri iho ia tatou!
2 E tairururaa e toru mahana: I teie matahiti, ua faanahohia te hoê tairururaa mataeinaa e toru mahana no to tatou maitai. Te horoa ra Te Pare Tiairaa o te 15 no Febuare 1997 i te tabula o na tairururaa e pae e tupu i Polinesia nei. I teie nei taime, ua ite aˈena outou i te tairururaa ta ta outou amuiraa e haere atu, e ua rave aˈena paha outou i te mau faanahoraa papu no te tae atu iho â i na mahana e toru. Ua ani anei outou i ta outou paoti ohipa i ta outou tau faaearaa ohipa? Mai te peu e te haere ra ta outou mau tamarii i te haapiiraa, ua faaara anei outou ma te faatura i ta ratou mau orometua haapii e eita ratou e tae mai i te haapiiraa i te Mahana pae, no te mea e tupu te hoê ohipa faufaa roa i te pae no ta ratou haapiiraa faaroo?—Deut. 31:12.
3 I te mahana tataitahi, e haamata te tairururaa i te hora 9 e te afa. E matara te mau opani i te hora 8. O te feia anaˈe e ohipa ta ratou, o te faatiahia ia tomo atu na mua ˈˈe i tera hora, teie râ, eita ratou e faatiahia ia faaherehere i te mau parahiraa hou te vahi tairururaa e matara ˈi no te taatoaraa o te taata.—Phil. 2:4.
4 E mea maitai ia haapao tatou: I te senekele matamua, ua faahaamanaˈo te aposetolo Petero i te mau Kerisetiano e, e mea maitai ia haapao ratou i te parau tohu mai te lamepa e anaana i te vahi pouri ra. (Pet. 2, 1:19) E tano atoa teie parau no tatou nei. Te ora nei hoi tatou i roto i te hoê ao tei raro aˈe i te mana o Satani, e mai te mea ra e tei roto tatou i te hoê vahi pouri. Te mauruuru nei tatou i te mea e, ua piihia mai tatou i rapae i te pouri pae varua. (Kol. 1:13; Pet. 1, 2:9; Ioa. 1, 5:19) Ia vai noa tatou i roto i te maramarama, e tia ia tatou ia tapea noa i te hoê faaroo puai, na roto i te haapaoraa i te Parau faauruahia a Iehova. Te reira mau ta ta tatou tairururaa mataeinaa i mua nei e faaitoito ia tatou ia rave.
5 Mai te peu e e hinaaro tatou e haapao maite i te tairururaa, e titau te reira i te mau tutavaraa, tera râ, e haamaitaihia tatou mai te peu e e na reira tatou. Ia mâha maitai to tatou rohirohi e tia ˈi, ia nehenehe tatou e faaroo maite i te mau tuhaa taa ê o te porotarama. I te mahana tataitahi, ia haere oioi mai tatou i te tairururaa ia nehenehe tatou e parahi hou te mau rururaa e haamata ˈi. I muri iho, e himene atoa tatou i te himene matamua e e faaroo tatou i te pure. E tia i te mau taata paari ia horoa i te hiˈoraa, e e tia i te mau metua ia faaineine i ta ratou mau tamarii.—Eph. 6:4.
6 Mai te peu e e hiˈopoa na mua tatou i te porotarama o te mau oreroraa parau e vauvauhia i taua mahana ra, e nehenehe tatou e tamata i te feruri atea i te mau manaˈo e haamatarahia mai paha. E faarahi ïa te reira i to tatou anaanatae i te taime e vauvauhia mai ai. E nehenehe tatou e apo mai i te mau manaˈo o te tauturu ia tatou ia faataa ˈtu ia vetahi ê i te mau tumu no reira tatou e tiaturi ai i te Atua, e i ta ˈna parau tǎpǔ papu mau e e haamaitai oia i te feia e imi mau ra ia ˈna. (Heb. 11:1, 6) Te faaitoitohia ra tatou ia rave i te mau tapaopaoraa poto noa no nia i te mau manaˈo faufaa roa ˈˈe o te tairururaa. Mai te peu e e rahi roa ta tatou mau tapaopaoraa, peneiaˈe eita tatou e haapao faahou i te mau manaˈo faufaa roa ˈˈe, no te mea tei nia to tatou feruriraa i te papairaa.
7 I te matahiti i mairi aˈenei, ua ite-faahou-hia te mau taata paari e te mau taurearea e rave rahi i te taime rururaa i te ori-haere-noa-raa na roto i te mau eˈa haereraa taata, i te faafaaea-noa-raa i rapaeau e i te paraparauraa i te tahi atu mau taata, maoti hoi i te faaroo i ta “te tavini haapao maitai e te paari” i faaineine mai no to tatou maitai. Ua tǎpǔ o Iesu e e horoa mai oia i te maa pae varua i te taime mau ra. (Mat. 24:45-47) No reira, e tia ia tatou ia parahi no te huti mai i te faufaaraa o taua maa ra, eiaha râ tatou ia haafaufaa ore i te reira. (Kor. 2, 6:1) E au atoa ra e, te fiu nei te mau tamarii e te ani pinepine nei ratou ia haere i te vahi haumitiraa, tera râ, e ravea noa te reira no te tiatia e no te ori haere. E tia ia haapii-maitai-hia te mau tamarii i te fare ia ore ratou ia afai-pinepine-roa-hia i te vahi haumitiraa. I te tahi mau taime, e parahi te mau pǔpǔ taurearea i te atea ê rii, e paraparau ratou, e omuhumuhu, e e opere ratou i te tahi mau poroi iti i te tahi e te tahi. I teie nei tau, te farerei nei ta tatou mau taurearea i te mau haafifiraa, e te hinaaro nei ratou e faaroo maite i te mau tumu parau e vauvauhia maira, ma te ore e rave i te tahi atu ohipa i roto i te mau taime rururaa. E tia ia haapae i te mau hinaaro o te apîraa ra, o te ore e tano e te mau faaueraa tumu a te Bibilia. (Hiˈo Timoteo 2, 2:22.) Na roto i to tatou haapao-maitai-raa, e faahanahana pauroa tatou, te taata paari e te taurearea, ia Iehova e e oaoa atoa oia.
8 Mai te peu e e titauhia ia paraparau atu te hoê melo no te pǔpǔ fariiraa i te hoê taata no nia i teie tuhaa, e tia ia faariro i teie aˈoraa mai te hoê tapao aroha no ǒ mai ia Iehova ra. (Gal. 6:1) E tia i te taata tataitahi ia haamanaˈo e, te tumu oia e tutava ˈi no te tae mai i te tairururaa, ‘no te [“faaroo,” MN] ïa e no te haapii.’ (Deut. 31:12) Hau atu, “e riro te feia paari i te [“faaroo,” MN], e e tupu to ˈna ite.” (Mas. 1:5) Mai teie atu nei e tae roa ˈtu i te taime tairururaa, e aparau anaˈe e to tatou utuafare no nia i te faufaaraa ia parahi amui, ia faaea noa i to tatou parahiraa i te roaraa o te porotarama, e ia faaroo maitai ia faufaa-rahi-hia tatou.
9 Te hoê huru faanehenehe e auhia mai e Iehova: Ua riro te feia no roto i te nunaa o Iehova ei mataitairaa na teie nei ao. (Kor. 1, 4:9) I te rahiraa o te mau tupuraa, ua matauhia tatou no ta tatou huru ahu e to tatou pahereraa rouru nehenehe. E rave rahi o te feia e faaohipa nei i te mau faaueraa tumu a te mau Papai i roto i te Timoteo 1, 2:9, 10 e te Petero 1, 3:3, 4, o tei taui roa i to ratou huru rapaeau mai te tau mai â a haamata ˈi ratou i te amuimui mai i roto i te amuiraa kerisetiano. Te faaite ra te reira i te hoê taa-ê-raa rahi e te huru ahu e te pahereraa rouru a teie nei ao o te haere noa ˈtura i te inoraa. E tia ia tatou ia ara maitai ia ore tatou ia pee i te huru o teie nei ao na roto i te oomoraa mai i te tahi mau ahu huru ê roa, te faaitoitoraa ia pee i te mau peu a teie nei ao na roto i to tatou pahereraa rouru aore ra na roto i te hoê huru faanehenehe au ore roa. E tia hoi i to tatou huru faanehenehe e to tatou pahereraa rouru ia tauturu i te feia apî e haere mai nei i te tairururaa, ia ite papu e eaha mau te huru faanehenehe e au i te Kerisetiano.
10 I te matahiti i mairi aˈenei, e mea maitai roa te hiˈoraa i horoahia i te mau tairururaa; teie nei râ, ua ite-faahou-hia te tahi mau taeae e mau tuahine o tei rave mai i te huru faanehenehe e te pahereraa rouru a teie nei ao, i te taime faafaaearaa iho â ra. Ia faanaho anaˈe tatou no te haere i te tairururaa, e tia ia tatou ia hiˈopoa i to tatou huru faanehenehe e to tatou pahereraa rouru. E te mau metua, a maiti maitai i te ahu o ta outou mau tamarii nainai aore ra o ta outou mau tamarii taurearea. E tia ia tatou ia ara e ia ore roa ˈtu tatou e vaiiho i te mau huru no teie nei ao aore ra ta ˈna mau peu, ia faaino mai i to tatou huru faaetaraa kerisetiano.
11 Ei haerea nehenehe to tatou: Ua riro te hoê haerea nehenehe ei tapao no te mau Kerisetiano mau. (Pet. 1, 2:12) Noa ˈtu eaha te vahi ta tatou e haere, i te tairururaa anei, i te fare tamaaraa, i te hotela, aore ra na nia i to tatou mau tere, e nehenehe to tatou haerea e horoa i te hoê faaiteraa maitai, e e tauturu i te taata ia ite e eaha ta te faaroo i te Atua e i roto i ta ˈna Parau e nehenehe e faatupu. E nehenehe te reira e aratai i te tahi mau taata ia hinaaro atoa e ite e o vai o Iehova. (Hiˈo Petero 1, 3:1, 2.) E hopoia na tatou te faahanahanaraa ia Iehova na roto i to tatou haerea. I te hau Marite no Alabama, ua parau te mau rave ohipa a te hoê hotela e, i rotopu i te mau pǔpǔ atoa o ta ratou e farii nei, o te feia tairuru “te feia maitatai roa ˈˈe, e to ratou te haerea tura roa ˈˈe.” Ua parau atoa ratou e: “E oaoa roa matou i te farii-faahou-raa ia outou i te mau tau i mua nei.” Ua papai te hoê piha ohipa no te mau rururaa e te mau ratere i te pae apatoerau tooa o te râ o te fenua Marite e: “I te mau matahiti atoa, te tiai ru nei to matou huiraatira taatoa i te tairururaa a te Taiete Watchtower. Mea oaoa roa ia hiˈo atu i te mau melo o ta outou haapaoraa; mea ite roa ratou i te peu e mea faatura roa ratou. Ua tapao mai te mau fatu fare toa o to matou vahi i te reira, e te hinaaro nei ratou e ia hoˈi noa mai to ratou ‘fetii’ feia ratere i te mau matahiti atoa.” E mea oaoa roa ia taio i te mau parau mai teie te huru, e ere anei? Teie râ, e tia ia vai ara noa no te paruru i te roo maitai o te nunaa o Iehova.
12 Te faahaamanaˈo-pinepine-hia nei tatou ia haapao maitai i te haerea o ta tatou mau tamarii, ia ore tatou ia vaiiho noa ia ratou ma te hiˈopoa-ore-hia, aore ra ia horohoro na roto i te mau hotela, e faahuehue hoi te reira i te tahi atu feia faaea i te hotela. I te mau matahiti atoa, te faarooroo nei te Taiete e te vaiiho-noa-hia nei ta tatou mau tamarii ma te hiˈopoa-ore-hia na te hiti o te mau vahi hopuraa pape e i roto atoa i te pape, aore ra te horohoro noa nei ratou na roto i te mau vahi haereraa taata e vetahi atu mau vahi a te hotela. E piti taime to te hoê fatu hotela i taoto i reira, faaararaahia i muri aˈe i te hora 11 i te po, na te tahi mau pǔpǔ tamarii Ite no Iehova o tei haere mai e patoto i te opani no te imi i te tahi atu mau Ite no Iehova. Noa ˈtu e ua riro te tairururaa ei ravea no te farereiraa i to tatou mau taeae, e no te amuimui e o ratou, eiaha râ ia moehia i te mau metua e e tia ia ratou ia hiˈopoa i ta ratou mau tamarii i te mau taime atoa. E hopoia teie ta Iehova e titau nei i te mau metua tane e te mau metua vahine atoa. (Mas. 1:8; Eph. 6:4) E nehenehe hoi te mau ohipa e ravehia e te mau tamarii hiˈopoa-ore-hia, e faaino i te roo maitai ta te tahi atu mau Ite no Iehova i tutava noa na i te patu.—Mas. 29:15.
13 Ia pee te mau haamâuˈaraa no te tairururaa: Te haamâuˈa pauroa nei tatou i te moni no te haere atu i te mau tairururaa. Te vai nei râ te tahi atu haamâuˈaraa te tia ia tatou ia feruri. Mea rahi te moni e pau nei no te mau fare tairururaa. Te vai atoa ra te tahi mau haamâuˈaraa te tia ia aufau. No reira, te haamauruuru-rahi-hia nei outou no te mau ô maitatai roa o ta outou e pûpû nei i te mau tairururaa.—Ohi. 20:35; Kor. 2, 9:7, 11, 13.
14 Parahiraa: E tano noâ te mau faaueraa i horoahia mai i te mau matahiti i mairi aˈenei: E FAAHEREHERE NOA I TE MAU PARAHIRAA NO TO ˈNA UTUAFARE ANAˈE E NO TE FEIA I HAERE MAI NA MURI IA TATOU I ROTO I TE PEREOO. E mea oaoa ia ite e, i te mau matahiti i mahemo aˈenei, ua rahi noa ˈtu te feia tairuru o tei faatura i teie faaueraa, e ua faarahi te reira i te aroha e itehia nei i ta tatou mau tairururaa. I te rahiraa o te mau vahi tairururaa, te vai nei te tahi mau parahiraa mea ohie aˈe ia naeahia. No reira, a faatura ˈtu ia vetahi ê na roto i te vaiihoraa i te mau parahiraa ohie aˈe ia naeahia, no te feia e fifihia nei.
15 Pata hohoˈa, taviri video, e matini haruharu: E nehenehe e faaohipa i te mau pata hohoˈa e vetahi atu mau matini haruharu. Teie râ, eiaha tatou ia faahuehue i te tahi atu feia tairuru. Eiaha tatou ia hahaere noa i te mau taime rururaa no te pata i te hohoˈa, no te mea e nehenehe te reira e faahuehue i te feia e tutava ra i te faaroo. Eiaha roa ˈtu te tahi matini haruharu, noa ˈtu eaha te huru, ia tamauhia i nia i te faanahoraa uira aore ra te faanahoraa haapurororaa parau o te tairururaa, aore ra ia faaapǐapǐ i te mau eˈa e te mau vahi haereraa taata, aore ra ia tuuhia i te mau vahi e haafifi i te taata ia ite i mua.
16 Utuuturaa matamua: E haapao noa te tuhaa utuuturaa matamua i te mau tupuraa ru. E ere na ˈna e haapao i te mau taata e maˈi tupu tamau to ratou. No reira, e tia ia outou ia feruri atea i te mau utuuturaa o ta outou iho e ta te mau melo o to outou utuafare e hinaaro. A rave i ta outou huero raau aspirine, ta outou mau raau no te faatoparaa i te maa, ta outou mau taamu pepe, te mau pine e te tahi atu mau huru tauihaa aita e vai ra i te tairururaa. Te feia atoa e maˈi mafatu to ratou, aore ra e hiaai ra i te raau insuline, e vetahi atu â, e tia ïa ia ratou ia faanaho atea ia ratou. Ia rave mai ratou i te mau raau e hinaarohia, e e tia ia vai noa te hoê melo o to ratou utuafare aore ra o ta ratou amuiraa o tei ite i to ratou maˈi, i pihai iho ia ratou i te mau taime atoa no te tauturu ia ratou mai te peu e e hinaarohia. Ua itehia i te tahi mau tairururaa e, ua maˈihia te tahi mau taata e maˈi tupu tamau to ratou, e ua vaiiho-noa-hia ratou o ratou anaˈe, e ua tupu ïa te mau fifi. Ua titauhia te pu haapao i te tairururaa, ia faaara i te mau pǔpǔ utuuturaa ru no te afai ia ratou i te fare maˈi. Mai te peu e te hinaaro ra te hoê taata i te mau rapaauraa taa ê, e aita hoê melo o to ˈna utuafare e nehenehe e haapao ia ˈna, e tia ia faaarahia te mau matahiapo o ta ˈna amuiraa, e e rave ratou i te mau faanahoraa e titauhia no te tauturu ia ˈna. Eita e faataahia te mau piha taa ê no te feia e maˈi tati (allergies) to ratou.
17 Maa: Na roto i te faaoreraahia te tunuraa maa, e nehenehe ïa tatou e haapao rahi aˈe i te tuhaa no te maa pae varua i te mau taime rururaa. Mai te tau a haamatahia ˈi teie huru raveraa, e rave rahi parau haamauruururaa tei faataehia mai no teie faaohieraa i ravehia. E tia ia tatou tataitahi ia faaineine i te tahi mau maa paia maitai e te ohie ia afai no te taime tamaaraa i te avatea, mai tei faahitihia i roto i te tumu parau hau o Te taviniraa o te Basileia no Me 1995, paratarapha 26. Eiaha e tomo i roto i te vahi tairururaa e te mau mohina hapaina, e e te mau ava atoa. A rave i te mau afata faatoetoe nainai, ia ô i raro aˈe i to outou parahiraa. Ua itehia te tahi mau taata te amu ra i te maa i te taime e vauvauhia ˈi te porotarama. E ere roa ˈtu te reira i te haerea faatura. I te tahi mau tairururaa, i te vahi tairururaa iho aore ra i rapaeau mai, te vai ra hoi te tahi mau fare toa hoo maa, ua itehia te tahi mau taeae i te haereraa ˈtu e hoo mai i te maa i te taime rururaa. Eita atoa te reira e tano.
18 Te oaoa rahi nei tatou i ta tatou oroa pae varua e te huru hau e te autaeae e fanaˈohia i te taime tamaaraa i te avatea. Ia au maite i te tumu o teie nei faanahoraa, e mea maitai aˈe ia afai mai i ta outou iho maa, maoti hoi i te faarue mai i te vahi tairururaa no te haere e hoo mai i te maa. E rahi aˈe ïa to outou taime no te amuimui e to outou mau taeae e mau tuahine.
19 Te oaoa nei tatou i te feruriraa i te Tairururaa Mataeinaa “Te faaroo i roto i te Parau a te Atua” e fatata maira! E tia ia tatou paatoa ia haapao e ua rave anei tatou i te mau faanahoraa no te tae atu i te porotarama taatoa, ia nehenehe tatou e fanaˈo i taua tamaaraa maitai roa ra i te pae varua ta Iehova i faaineine mai na tatou na roto i te arai o ta ˈna faanahonahoraa. Ia na reira tatou, e nehenehe ïa tatou e riro ei taata tei ‘au roa i te mau ohipa maitatai atoa ra’ i te mau tau e haere mai nei.—Tim. 2, 3:17.
[Box on page 6]
Tairururaa mataeinaa—Faahaamanaˈoraa
Bapetizoraa: E parahi te feia e bapetizo i nia i te mau parahiraa i faataahia no ratou na mua ˈˈe i te haamataraa o te rururaa no te poipoi mahana maa. E rave te taata tataitahi e bapetizo i te hoê ahu hopuraa au maitai e te hoê tauera. I mutaa iho, ua oomo mai vetahi i te mau ahu tura ore o tei faaino i te faufaaraa o te bapetizoraa. E haapapu te mau matahiapo e tuatapapa ra i te mau Uiraa na te feia e hinaaro ra e bapetizo e ua taa maitai anei i te feia tataitahi e bapetizo i teie mau tuhaa. Ia oti anaˈe te oreroraa parau e te pure a te taeae orero, e horoa te peretiteni o te rururaa i te himene. Ia oti te tuhaa himene hopea, e aratai te mau melo o te pǔpǔ fariiraa taata i te feia e bapetizo i te vahi bapetizoraa. Ua riro te bapetizoraa no te faataipe i te pûpûraa ia ˈna iho ei ohipa i rotopu i te taata iho e o Iehova. No reira, aita i faanahohia te mau “bapetizoraa tapǔpǔ” i reira e piti taata aore ra hau atu e tauahi ai te tahi e te tahi aore ra e tapea ˈi i to ratou rima ia taumihia ratou i raro i te pape.
Tareta iˈoa: A tamau i ta outou tareta iˈoa no 1997 i te tairururaa e tae noa ˈtu i te mau tere i rotopu i te tairururaa e to outou vahi nohoraa. E horoa pinepine te reira i te hoê faaiteraa maitai roa. E ani outou i te mau tareta iˈoa na roto i ta outou amuiraa. Eiaha e tiai i te mau mahana hopea na mua noa ˈˈe i te tairururaa no te ani atu i te mau tareta iˈoa no outou e no to outou utuafare. Eiaha ia moehia ia rave i ta outou tareta faaueraa no te toto (“Instructions médicales—Pas de sang”).
Vahi faaearaa: E ara te papai parau a te amuiraa ia hapono-oioi-hia te mau aniraa no te piha (Demande de chambre pour cas particuliers) i te vahi nohoraa a te tairururaa. Mai te peu e e tia ia outou ia faaore i te hoê tapaoraa i te hoê piha no te hoê tupuraa taa ê, a faaara oioi atu i te taata e farii mai, aore ra i te hotela, e i te tuhaa haapao atoa i te vahi faaearaa a te tairururaa, ia horoahia te piha na vetahi ê.
Mau pereoo turairai tamarii e mau parahiraa tufetu: I roto e rave rahi vahi, e opanihia ia faaohipa i te mau pereoo turairai tamarii i te mau haaputuputuraa huiraatira. Aita te mau ture i te pae no te parururaa e faatia ra ia vaiiho-noa-hia te reira i roto i te mau vahi haereraa taata, i roto i te mau eˈa aore ra te mau area i rotopu i te mau parahiraa. I te mea hoi e e nehenehe teie mau vahi e apǐ roa i te taata, e mea atâta te mau pereoo turairai tamarii no te mau aiû iho e te feia e topa ˈtu i nia iho. A ara ia ore ia hopoi mai te reira i te vahi tairururaa. Teie râ, e faatiahia te mau parahiraa tamarii aore ra te mau parahiraa e nehenehe e tuuhia i roto i te pereoo uira, no te mea e nehenehe te mau metua e tuu atu i nia i te hoê parahiraa i pihai iho ia ratou. A ara atoa ia ore e hopoi mai i te mau parahiraa tufetu. Mea atâta hoi e eita e faatiahia ia faaohipa i te reira i te mau haaputuputuraa huiraatira rahi. Te haamauruuru-rahi-hia nei to outou tururaa mai i roto i teie na tuhaa e piti.
Rima tauturu: E nehenehe anei outou e faaherehere i te tahi taime i te tairururaa no te tauturu i roto i te hoê o te mau tuhaa ohipa? E nehenehe tatou e tauturu e e oaoa rahi mai te peu e e tavini tatou i to tatou mau taeae, noa ˈtu e te tahi tau hora noa. Mai te peu e e nehenehe outou e tauturu mai, a haere atu ïa i te tuhaa haapao i te mau rima tauturu i te tairururaa. E nehenehe atoa te mau tamarii i raro mai i te 16 matahiti e tauturu maitai mai ma te rave i te ohipa na muri i to ratou metua tane, to ratou metua vahine aore ra te tahi atu taata paari.
Faaararaa: Ia ara tatou i te mau fifi e nehenehe e tupu mai ia araihia te mau peapea faufaa ore. E pinepine te feia eiâ e te tahi atu mau taata manaˈo ino i te tamoemoe i te feia apî no taua vahi ra. A ponao noa i te mau opani pereoo e eiaha roa ˈtu e vaiiho i te mau taoˈa ia itehia e te taata. Mea au roa na te taata eiâ e te feia eiâ pute i te mau haaputuputuraa rarahi. E ere i te mea paari ia vaiiho i te hoê taoˈa faufaa i nia i to outou parahiraa. Eita outou e ite e mai te peu e e mau Kerisetiano pauroa te feia e haaati ra ia outou. No te aha e faahema ˈi i te hoê taata? Ua tae atoa mai te tahi mau tabula parau e faataa ra e ua tamata te tahi feia matau ore i te ume i te tahi mau tamarii iti i rapaeau. EIAHA ROA ˈTU E VAIIHO I TA OUTOU MAU TAMARII MA TE ORE E ITE-MATA-HIA E OUTOU.
Eiaha e taniuniu aore ra e papai atu i te feia haapao i te vahi tairururaa no te ani i te mau haamaramaramaraa. Mai te peu e eita ta te mau matahiapo e nehenehe e horoa mai i te mau haamaramaramaraa o ta outou e hinaaro ra, e nehenehe outou e papai atu i te vahi nohoraa a te Taiete i Tahiti nei.